চাঙমা জাদর আঝল দিভ্যে শত্তুর -ফুল সদক শাক্য


Cutting_own_branch

ইক্কো মানুচ বা জাদর দি বাবদর শত্তুর থান – বারর শত্তুর আ ভিদোরর শত্তুর। ওমি জাদর লঘে হোল-হোচ্যে, নাধা জাগা, আমনত্তুন উজুলো জাদ’র থেলা-মেহ্জা – ইয়েনিরে আমি বারর শত্তুর হোই পারিই আ জাদর ভিদোরর শত্তুরুন ওহ্লাক্কে – জাদত গম মুকপাত্তি ন থানা, সঙ ন থানা, পাদারা অহ্ না, ধর্ম-সুধোম ন মানানা, নিজো জাদরে পোচ ন পানা আ নানাক্কান। এক্কা চিদে গরিলে বুঝি পারা জায় জে আমার বারর শত্তুরোনুত্তুন ভিদোরর শত্তুরুন নাদাধি ভোজোমান ভোজোমান বেচ আ ভিদোরর শত্তুরুন আগে দমেই ন পারিলে আমি হন’ দিন বারর শত্তুরুনো লঘে লারেয়োত জিদিদঙ নয়।

আমা জাদর ভিদোরর জিদুক্কো শত্তুর আঘন সিগুন নিমোন গরি তলেই চেলে আজলে সিগুন ইক্কো গাঝরই ধেলা-পালা আ শিঙোর-পাঙোর ভিলি হিয়েচ অহ্য়। সে এক্কান বেধিই আঝলে আমারে নানান জাগাত নানান ধগে পাগোচ্যেসান গরি বেরেই ধরে আ লারে লারে জাবেদেই ধরি রুধুকমরা আ লেমপোচ্যে বানায়। হি সেই মুল বেধিগান ? সিয়েন অহ্লদে – আমার চিগোন মন। চিগোন মনর মানুঝে হন’দিন গম মুকপাত্তি ওহ্ই ন পারন, চিগোন মনর মানুচ পাদারা অহ্ন, তারাত্তুন ঈঙঝে-পিঝুম বেচ থায় আ তারা হন’দিন সঙ ওহ্ই ন পারন, তারা ধর্ম ন মানন, সুধোম ন মানন, তারা বানা নিজোর হধা ভাবন আ সেনত্তেই তারা জাদরেয়ো পোচ ন পান।

এ রাচবেধিগানর দারু হি ? সে পইদ্যেনে ইয়োত তেম্মাঙ ন গরিবোঙ। হারন ইয়েনর দারু এগেক জনে এগেক্কান দেঘেই দোন আ তলবিচ গরিলে হার’ জনর হধা ফেলেবার নয়। এ বেধিগানর দারু এক দাগিয়ে গম ইস্কুলোত পেভ’ হ’ন আ একদাগিয়ে হিয়োঙত পেভ’ হোধাক চা’ন। সেনত্তেই দারু তোগানা ত’ গরি থোনেই আমা হামত হ’ন দিয়েন পধেদি সিয়েনে নিজোরে ফগদাঙ গরের আ হিঙিরি সিয়েন আমা ভালেদি হামত পাদারি গাচ ওহ্ই থার সিয়েন ইয়োত আমি বিজিরেই চেভঙ।

(১) লারে লারে অহবঃ এ চিগোন হধাগান ইক্কুনু আমা জাদর ইক্কো বিরেত শত্তুর ইজেবে দেঘা দ্যে। আমি হন’ আগাত্যে হামত আহ্ত বাজেলেই আমা চাঙমা রিবেঙত সমি থেয়ে চিগোন পাদারা মনানে হোই উধে – ‘লারে লারে অহ্ব’। এ লারে লারেগানে আমা হামান আর হন’দিন গরি নদে। আমি একবারো ভাবি ন চেই এচ্ছে জনি মুই সিয়েন আরম্ভ ন গরঙ সালে সিয়েন হেল্লে হিঙিরি অহ্ব’ ? সিয়েন হেল্লে শুরু গল্লেদ’ পরশু তে অহ্ব’দে। পরশু শুরু গরিলে তরশু। এঝান গরিনেই আমার দিন গঙি জায়, উজু হামান সময়র এজাল পেনেই আগাত্যে ওহ্ই উধে আ সিয়েন আমি হন’দিন উভেই ন পারিই।

আমা বৌদ্ধ নাটকত আমি দেঘিই – শুম্ভ-নিশুম্ভর যুদ্ধ। হন’ হাম গরিবার আগেধি আমা মনত শুম্ভ-নিশুম্ভর লারেই বাঝে। সে লারেয়োত শুম্ভ জিদিলে আমি গম হাম গরিই আ ভান্যে হামানি ন গরিই, মাত্তর নিশুম্ভ জিদিলে আমি গম হামানিত পিচবাগলি হেহ্ই আ ভান্যে হামানি আরম্ভ গরিই। শুম্ভর আহ্ত্যের অঝার ন দরেয়ে মন আ নিশুম্ভর আহ্ত্যের চিগোন পাদারা মন। আমা মনানি অঝার ন অহ্নার হারনে আমা মনর ভিদোরর এ লারেয়োত অনসুর নিশুম্ভই জিদে আ মুওত্তুন নিহ্গিলি এঝে – ‘লারে লারে অহ্ব’।

(২) তারা হি ভাবিবাকঃ এ হধাগানে চাঙমা জাত্তোরে জুগে জুগে লেঙ আ বুপ বানেই থোয়ে। ইয়েনে চাঙমা জাত্তোরে খাদাল’ ভিদিরে পত্তিঙগুলোসান গরি বেরেই থোয়ে। আমা সভাত ইক্কো বেজাত থেলেই আমা পিত্তসদ’ মনানে হোই উধে – ‘আমি চাঙমাধি হধা হলে তারা হি ভাবিবাক ?’ আমি আমা জাগা নাঙানি আমা ধগে হোভার চেলেই আমা চিগোন মনানে হোই উধে – ‘তারা ন বুঝিভাক।’ আমি তরা তাঙরি ‘থেগা দুওর’ ন হোনেই ‘ঠেগামুখ’ হোই, ‘হমলানগর’ ন হোনেই ‘চোঙতে’ হোই আ ‘বাঘেইসুরি’ ন হোনেই ‘বাঘাইছড়ি’ হোই। পত্তিবার আমি আমা হধাগান পরর ধগে বদলেই আমা জাদর হিয়েত্তুন ইক্কো চিগোন লো ফুদো ঝরি জায়। ইঙিরি চিগোন চিগোন আহ্জার আহ্জার লো ফুদো ঝরদে ঝরদে আমা জাত্তোর ইক্কু ব্লাড ক্যান্সার ওয়ে হোই পারিই। আমার হন’ দাবি হিজেক সারি মাগিবের চেলেই আমা পাদারা পরানানে হোই উধে – ‘আমি ইক্কুনু এ দাবিঘান গোল্লেই তারা আমারে …………।’ আমি আমা মনানরে উত পেঘে শত্তুরো লঘে দুমুরে বুরেই ন এলে ধুল্যেভুয়োত মুর গুজোন পারা গরি বুচ নেজেই – ‘আমি বরঙ তারা লগে থেনেই লারে গরি আমা দাবিগানি পুরেই পেভঙ।’ জিয়েনর মানে আমি দচ, হুরি, তিরিচ, চল্লিচ বঝরে তে গমে বুঝি পারিই – আঝলে সিয়েনর মানে এলধে ‘আমি বরঙ তারা লগে থেনেই লারে গরি তারা লঘে মিঝি জেয়োই।’

‘তারা হি ভাবিবাক হধাগান’ আর’ বেচ দরগরে পারা ওহ্ই উধে এই হারনে জে ইয়েন আমা সিধু বেচ ভাক সময় অঝার মনর ভেচ ধরিনেই ভেদা দেঘি। আমি শাক্য জাত – বৌদ্ধ জাত। তারা সান চিগোন হজরা মনর মানুচ আমি নয়। আমা পাদারাঘান ধাগিবেত্যেই এ অঝার মনর ভেচ ধচ্যে চিগোন মনর নিশুম্ভরে আমি আহ্ওজে পাত্তুরুতুরু জানেই। আমি পুরি ফেলেয়োই নিজোরে পোচপানা মানে পররে দেই ন পারানা নয়। নিজোর আরাঙ ধক্কান ধরি রাগানা চিগোন মনর নয় অঝার মনর চিন।

আমাহ্ মুজুঙোর পত্থান ঃ মুজুঙোর দিনুনোত আমি জনি ঘেচ্ছেকগরি চিগোন অহ্লেয়ো হন’ জাত ভালেদি হাম গরিদোঙ চে’ই সালে আমার ‘লারে লারে অহ্ব’ আ ‘তারা হি ভাবিবাক’ – এ দিয়েন হধা পুরোপুরি পুরিহ্ ফেলা পরিবগোই।

আমি জিয়েন গরিভার চেই সিয়েন ইক্কু আরম্ভ গরা পরিবো। আ আরম্ভ গরিনেই থিয়েই থেলে ন’ অহ্ব’। হুচ্চুন জিত্তুমো চিগোন ওহ্দোক – মুজুঙে আ অনসুর ফেলেই ফেলেই গেলে আমি হামাক্কায় এক দিন আমা সাল্যেঙত লুঙিবঙ্গোই। হাম জেত্তোমান ইত্তুক ওহ্ক, অনসুর গরি পারানা অহ্লদে আঝলান। তবে ইয়েনো থিক, পুও হুরি মত্তন পানি হেই ন পায়। মাত্তর পুও হুরোনায়ো শুরু ন গরিলে পানি হানাদ’ দুরোত, পানিত আঙুলুনো ভিজেই ন পায়।

আমার ঈদোত রাঘা পরিবো – সাহচ মানে ন দরানা নয়। দরেই দরেই অহ্লেয়ো গরানাগানরে সাহচ হুও অহ্য়। দরকার জেক্কে দররে দিয়েই জায় সেক্কে মুজুঙেধি আহ্দি পারানাঘান হঅ্লদে আঝল অঝার মনর চিন।

chakmamaadi11@ymail.com
https://chakmamaadi.wordpress.com/
http://www.facebook.com/maadi.chakma

পিডিএফ ভার্সন Changma Jador Ajhol Dwibe Sattur

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s