ব্রেইন ড্রেইন-ফুল সদক শাক্য


ব্রেইন ড্রেইন ইক্কুনু চাঙমা জাদর এক্কান বিরেত অসম্বিচ্য। ইক্কো জাত নলে এক্কান জাগাত্তুন গম গম মাধাবলা মানুচ্চুন নিহ্গিলি জানাগানরে ব্রেইন ড্রেইন হুও অহ্য়। ব্রেইন ড্রেইন ইক্কো জাদরে অলর গোরি লারে লারে গোরি মাত্তর হামাক্কায় মারেই ফেলায়। ইয়েনরে নিজো জাদরে নিজে মারেই ফেলানায়ো হোই পারা জায়।

চাঙমা জাদর ব্রেইন ড্রেইন হেত্তেই অহ্য় ঃ আমা জাদর ব্রেইন ড্রেইনত্তেই তলর দিয়েন হারনরে আমি বেঘত্তুনবেচ দায়ি ভিলি থারেই পারিই –

(১) আমা জাগানিত জু হম থানা ঃ আমা আদামানিত চাগুরি আ জুদো বাবদর জু রাত অহ্নার হারনে আমা মাধাবলা মানুচ্চুন আদাম সারি জেই পান্নোই। গমে লেঘা-পরা সিগি অজল হাবর চাগুরি পেলেই তারা আজলে চাঙমা জাদত্তুন ফারক ওহ্ই জেই পান্নোই মনে হোক ন হোক। এচ্চে সঙ আমা জাদত জিদুক্কো বর বর দাক্তর, ইঞ্জনিয়ার, ওফিসার, রাচনিতি-মুরুকবি আ নানান বাবদর অজল হাবর মানুচ জনম লোয়োন তারা জিঙহানির বেচভাক সময় হাদেই পেয়োন পোরেয়ে জাদরে ভালেত গরদে। তারার মাধাগুন আঝলে আমার হন’ হামত ন লাগে। ইয়োত আমি বিদি জেয়ে চাঙমা জাদর পলিম আইএফএস মুকুর কান্তি খীসার হধা দাগত তুলিনেই ঈদোত গোরি পারিই। দুঘোর হধা অহ্লেয়ো আমি হোই পেভঙ জে তে আইএফএস ওহ্নেই চাঙমা জাদর হন’ ভালেত ওয়ে ভিলি আমি ঈদোত গরি ন পারিই। এগই হধা হুও জায় ইক্কুনুর পয়নাঙি কেমিকেল ইঞ্জিনিয়ার ড. অমিত চাঙমার পইদেনেয়ো। তে ইক্কু কানাডার ওয়েস্টার্ন ইউনিভার্সিটির ভাইস চ্যান্সেলর জার বেতন (২০১১ ইজেপ মজিম) মুতামুতি মাহ্জে ২১ লাহ্ক ৫ আহ্জার তেঙা। মাত্তর তে আমা জাদত্তেই হি গোচ্ছে ? এ বাাবদর আর’ সয়সাগর অজল হাবর মানুচ আমি আমা জাদত তোগেই পেভঙ জিগুনে গদা জিঙহানিঘান পর’ জাদরে ভালেত গোরিভার হামত লেবেদেই এলাক বা আঘন। বানা অজল হাবর মানুচ্ছুন নয়, জিগুনে ইক্কুনু চিগোন-মাচ্যেঙ চাগুরি গত্তন সিগুনোর হামো চাঙমা জাদর বরবেচ হামত লাগের ভিলি আমি হোই ন পারিই। তারার দিনোর বেচভাক সময় বিদি জায় পেত তরেবার ধারাজে তেঙার বদলে পর’ জাদ’ সিধু ভারা খাদদে। ইঙিরি দেঘা জেব’ আমা জাদর ৯৯.৯৯% অজল আ মাচ্যেঙ হাবর মানুচ্ছুন আমা জাদর হন’ হামত ন লাগদন। আমক ওহ্বার অহ্লদে, তারারে লোনেই আমা জাদর অনেগে বার গোরিনেই গপ দিদাক চা’ন আমা জাদত এদে আঘে, আমা জাদত ওদে আঘে হোনেই। অহ্ক হধাগান অহ্লদে ইগুনে অনেগর ভিনদেচ্যে লগে মেলা অহ্য় আ নলে পো-সাবা গুনে ভিনদেচ্যে/জুদো জাদর মানুচ লন আ তারার পরর তম্ভাবো লারে লারে পরর জাদর লগে মিলি জায়। আমি এক্কা চিদে গরি চেই, এম. এন. লারমা জনি এমপি ওহ্নেই ঢাকাত বঝি থেনেইে সুগে থেই থেই পো-সাবা পরেদগোই বা বনভান্তে জনি গরিপ-অমি চাঙমা জাত ভেয়ুন সারিনেই জাপানত জেনেই বিরেত হিয়োঙত থেনেই ধর্ম বিলেদগোই সালে আমা জাত্তোর হি ওহ্লুন ? ইক্কুনু ইউরোপ, আমেরিকা, অস্ট্রেলিয়ার হধা বাত দিলেয়ো দিল্লি, কলকাতা, গৌহাতিত আমা জাদর অজল হাবর অনেক সুনানুর নাদিন-পুদিন পরর জাদর লঘে মিঝি জাঙ জাঙ গরিহ্ আঘন। আমা জাত্তো এভ’ সঙ লেমপোচ্যে থেবার ইয়েনই বেগ’ দাঙর হারনান ভিলি আমি হিয়েচ গরি পারিই।

(২) ঔপনিবেশিক মানসিকতা ঃ ঔপনিবেশিক মানসিকতার হারনে আমা অজল হাবর মানুচ্ছুনে আমা আদামানিত্তুন পরর জাদর জাগানি বেচ পোচপান। এক্কেনা অজলত উদিলেগোই নিজো আদাম সারি জানা আমি অনসুর দেঘিই। চিগোন, মাচ্যেঙ, বর তাউনত পরঙ জানা আ পরিবেত্যেই বা চাগুরি গরিবেত্যেই দুরোত বা বিদেঝত জেনেই নিজো জাদ’ সিধু ফিরি ন এজানাগান এক্কান বর পিরেসান আমা জাত্তোরে দিনে দিনে হেঙেদাত্তুন আর’ হেঙেদা বানার।

আমি হি গোরি পারিয় ঃ আমা জাদর মাধাগুন আমা জাদর ভালেদি হামত লাগেবাত্যেই আমি হামাক্কায় তলর হামানি গরি পেভঙ ঃ

(১) চাঙমা জাতিয়তাবাত বলবলা গরানাহ্ ঃ আমা গম গম মাধাবলা পো-সাবাগুন জাতে বর বর ওফিসার ওহ্ই উধিবার লগে লগে বর বর চাঙমায়ো ওহ্ই উধোন সে হিত্যে আমার নজর দ্যে পরিবো। স্কুলানিত চাঙমাধি লেঘা-পরা আরম্ভ অহ্লে এ পইদ্যেনে আমি বেঘত্তুন বেচ বলাবল পেভঙ। নিজো জাত পোচনপানা নিজো বাপ-মারে পোচনপানারই সঙ সঙ। পো-সাবাগুনোরে চিগোনত্তুন ধরিনেই নিজোর বাপ-মা, ইত্য-হুদুম, আদাম্যে-পারাল্যে, নিজো আদাম, গাঙ, বাম, নিজো জাত্তোরে পোচপানা সিগে পরিবো। বানা চাঙমা গিদোত, বিঝুমেলাত, মেলা-মেচবানত, ম্যাগাজিনোর লেঘাত আ লেকচারত চাঙমা জাতিয়তাবাদরে ঘিরি রাগেলে ন অহ্ব’। আমার পত্তি হামত জাতে চাঙমা জাতিয়তাবাত ফুদি উধে আ পো-সাবাগুনে চিগোনত্তুন ধরি স্যেনি সিগোন সে পইদ্যেনে আমার সজাক থা পরিবো। আঝলে ইক্কু জুগোত তেঙেরা বেরিনেই হন’ জাদে হাররে ধরি রাঘেই ন পারিবাক। অজল হাবর জু তোগেবাত্যেই বারে জেবার মানা গরানাগানো ইক্কো অজল গাঝরে বলে বলে চাবি রাঘাই পারা অহ্ব’ জিয়েন হন; বাবদে ওহ্বার নয়। সেনত্যেই আমার চা’ পরিবোদে জে জিধু থেদাক সাত, জে জে’ হাম গত্তাক সাত তারার নিচ ঘর জাতে হামাক্কায় তারার আদামত থায় আ তারা জে জার ধগে জিত্তুর পারন জাদর হাম গরি জান।

(২) দর’মর’ ছাত্র জধা ঃ আমা ছাত্র জধাগুন দর’মর’ গরা পরিবো আ তারা জাতে বেজাদর সংস্কৃতি চর্চার বদলে নিজো জাদর সংস্কৃতি চর্চা গরন সে পইদ্যেনে আমার তারারে পত দেঘা পরিবো। আমি জনি ছাত্র জধাগুন স্কুল লেভেল সঙ লুঙেই পারিয়োই আ পত্তি কলেচ আ স্কুলোত সিগুন সিদি দি পারিই সালে সিগুন আমা জাদর সাগুনিসান হাম গরিভাক। মানে, আমা পো-সাবাগুন ইগুনো লগে স্কুল-কলেঝত দি-তিন বঝর জাদর হাম গরানার পরেধি জে জে’ অহ্দাক্কোই সাত তারার এক্কা নয় এক্কা জাত ভালেদি চিদেঘান এভ’।

(৩) আদামানিত জু বারানাহ্ ঃ বেজত্তুন বেচ অজল হাবর মানুচ আমা আদাম আ বামানিত আদন পারা সে চেচ্তাঘান আমার গরা পরিবো। ন অহ্লে আমা আদামানিত্তুন আমা জাদর অজল হাবর মানুচ্ছুন নিহ্গিলি জানা আমি বন্ধ গরি ন পারিবোঙ। জেমেন, আমি জনি আমা আদামত এক্কান ব্লক বানেই পারিই সালে সুওত হমেধি তিন জন তিচিএচ ওফিসার আদিবাক। আমি জনি আমা বামত এক্কান কলেচ বানেই পারিই সালে সুওত চের-পাচ জন ডক্টরেত, দচ-বার’ জন নেট কমপ্লিট এমএ পাচ হামাক্কায় আদিবাক। সেনত্তেয়ো ইক্কুনু জে চিগোন চিগোন তাউনানিত চাঙমা বেচ সিয়েনি আমা আহ্দত রাগানা এগ’পরা দরকার ওয়ে। তিবুরার হধা ধরিলে কাঞ্চনপুর, ছৈলেঙতা আ গন্দাসরা – এ তিনেন জাগা এ জাগা হামাক্কায় আমা আহ্নজামত থায় পারা সে চিদে গরিভার দরকার আঘে। এসান্যে গরি গধা দিনেই আমা জাদর মাধাগুন আমা জাদর হায়-হুরে রাগেভার জু আমি বানেই দি পেভঙ। আ ন অহ্লে পানি জেমেন ঝরর পরেধি লামোন্যে লামি জায় আ হরান্যে দিনোত পানি রাত পরে থিক সেজান আমা বেক গম গম মাধাগুন আমা মুরো তুগুনোর আদামানি সারিনেই সঙ জাগার বেজাদির তাউনানির হামত লাগিবেক্কোই আ আমা আদামানিত মাধা রাত দেঘা দিবো।

(৪) আদামানিত গম স্কুল আ গম হাসপাতাল বানানা ঃ আমা আদামর স্কুলানি আ হাসপাতালানি জাতে দিন দিন দাঙরত্তুন দাঙর আ গমত্তুন গম ওহ্ই উধে অনসুর সে চেষ্টা চালা পরিবো। ইক্কুনু জুগোত বেচভাক মানুচ টাউনত পরঙ জান গম মাচ্তর আ গম দাক্তরর আঝায়। সিয়েনি জনি আমি তারারে নিজো আদামত দি পারিই সালে আমার অজল হাবর মানুচ্চুন আমা আদামানিত ধরি রাঘেই পারিবোঙ।

(৫) জাদর হাম গরিয়েগুনোরে মান গজানাহ্ ঃ বিদেঝত থেলেগোই, বর ওফিসার অহ্লেগোই তারা জাদর হন’ হামত লাগদোক ন লাগদোক আমি তারারে বিরেত বাগেনি গরিই। এক্কান হধা আগেধে, ‘জে জাদে জারে মান দেঘায়, সে জাদত সিগুন জনম লন’। সেনত্তেই আমা জাদত ইক্কুনু জাত ন চিন্যে বর বর মানুচ দিন দিন বারদন। আজলেদ’ লেঘা-পরা হম সিক্যে ইক্কো গম আদাম্যে জাদত্তেই জেত্তোমান গরে সে বর মানুচ্ছো তার গদা জিঙহানিত তার আধায়ো ন গরে। তুও আমা পো-সাবাগুনোরে আমি হোই – তুই ওমুগোসান ওহ্চ। ইক্কুনু আমার সময় এচ্চে আমার জিঘুন হামত লাগন সিগুনোরে মান দেঘানা আ হামত ন জোয়েঘুন এক হুরেধি ফেলেই থনা। বাপ-মা রিনি ন চেয়ে বর ওফিসার পোভোত্তুন হামাক্কায় দুক-হাম গোরি হেয়ে বাপ-মারে গমে পালেয়ে পোভো গম। আমার সে মরা গাঝত হোর উত্তে লোকলোক্যে আগাগুনোত পানি ন দিনেই ইক্কুনু শিঙোরবলা মরা মরা পিরেই ধচ্যে চারাঘুন জত্তন গরা পরিবো। আ ন অহ্লে আমা জাত্তো বাজিদো নয়।

বেগ’ জেরে হোই পারা জায়, আমা জাদত গম মাধা বলা মানুঝোর রাত নেই। দরকার বানা সে মাধাগুন নিজোর জাদর হামত লাগানা। জেধকদিন আমি সিগুন হামত লাগেই ন পারিবোঙ সেধক দিন আমি ভালেদির মু ন দেভঙ।

Chakmamaadi11@ymail.com
https://chakmamaadi.wordpress.com/
http://www.facebook.com/maadi.chakma

PDF version of the article Brain drain

Advertisements
By MAADI Publication Board Posted in ARTICLES

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s