জুমহাবা পালা


 

রাধামনঃ
ধন’ হেল্লে জেবঙ আমি জুমহাবা
উই সোচমোন তাগি ভালোক-দুরোত
দিওমুরো জার নাঙ, আবিদি তারুম
ভালোক-ভুলোনোত্তেই – ধনপাদা সারি-

ধনপুদিঃ
দিওমুরো-জুমহাবা ! আমারে ইরিনে ?
দুরোত-ভালুদ্দুরোত ! হমলে ফিরিবা ?
মনানত  নউধিবো সবায় আমারে,
ত সমারুন, ঘিলে হারা নাদেঙ হারার
এ খলাগুন। সমার আমা দিজনর
লাঙেলর সাবাগান চামিনি বনর।
তলে জার দিজনর মনর ধারাচ
নিরিবিলি একসঙে পাঘোর মিলিলো।
জুনো প’রত সমারবদি নানা খারা,
চলাচলি গরিনেই রাক জলাজলি
আর’ ফিরি পোচপানা আর’ বেচগরি।
ঈদোত উধিবো নাহি আমা সিদেনর
মা-লকখীমা ফুলর ঝুবুর গাচ্ছো
তলে জার বারিজ্যের সাজন্যে খেনর
দিজনর ঈদোদর পত্তাপত্তি
সয়সাগর উরোন অনসুর গরি।

রাধামনঃ
লেবেদেই আঘে বে’ক – ভেক্কানি তুংঙোবি
মনানর রিবেঙত। হানেব’ পরান-
অনসুর অজিরেন হানেব’ মনান-
পরানর ধনপাদা – ভরন্দি আদাম
পরানর ধনপুদি – সমারি দোলবি –

ধনপুদিঃ
সালে নজেচ পরান –

রাধামনঃ
                           সিঙিরি ন’হোচ
ধনবি, মুই হি আর আঘঙ চিগোন
আগ’ সান ? বানাবানা সময় বিদানা
নয় আর। বাপমায় দাঙর-দিঘোল
গরিলাক সিয়েনহি বেনামা বেনামা ?
জুম হাবিম এবার মুই। তারুমর
ফিবলা, আপদবলা বুঘোত ফলেম
সবনর সোনাধান, বানাবানা নয়
আর তর আর মর মালা ভাঙালোই
ঘর-গিরিত্থি খারা, ঘেচ্চেক গরি,
পরানি, তরে লোনেই বানিধুঙ চাঙ
চিগোন সুঘোর ঘর – ভরন-বিরোন –
ধনপাদার বুঘোত – দিজনর ঘর –
তর আর মর।

ধনপুদিঃ
                    মুই পুজিলুঙ চোক
মাপ গরিচ দা রে, নবানিম তরে
পাদারার তেঙেরায় চিগোন মনর।
তবনা সুগোজেনরে, আকপাদা জে’ন
পরে তর ধারাজত, আ মর মনর
তবনা দাধো ত সিধু, পুরি নফেলেচ
ত হবালপুরনিরে, নিঝি ফারগত।

রাধামনঃ
ধনপাদা-ধনপুদি – পুরি ন’ফেলেম
সকুরি ঘরর এই দোল আদামান
মিঝি আঘে জার বোয়েরত ম’ নিঝেচ।
ফিরিলে হামত্তুন বেল্লে মাধান
চাবাঙ গরি বেরান গাবুচ্চেলগে;
নিঝিরেত ধাকফিরে হেঙগরঙর,
বাঝির আর ধুদুগোর নোনেয়ে সুরোত।
রিপরিপ সুনো জায় রাদার – ধিঙির
মিধে র’ দুরোত্তুন। বারিজ্যের রেদোত
বেঙ ধরন আঘুন লুরো জালিনেই।
রেত মাধানত লগে এঘামার গরি
চরঘা-চরঘির র’ সুনি পেভে তুই।
জার কালত বঝিনে আঘুন ফুয়ান
বারে বুরো-বুরিলক, তগান – তুলোন
সুর ধরি নানা হধা, জেন ঈদোদর
বেরচাগা বুনোনান। দুঘোর সুঘোর
ঈদোদর জাল বুনোনা তানদে তানদে
মিদিঙে বাঝর দাবা। জুনর প’রত
সঙসমারে মিলিনে নানা খারা খনা।
দিবুচ্ছে মাধানত বুনন বেইন
মিলেলগে বঝিনেই পত্তি ঘরত।
অনসুর ভারিগরি ঈদোত উদিবো।
ঈদোত উদিবো লগে আজু চলাবাবরে।
ঈদোত উদিবো তরে, তর মেয়েবান।
পুরি ফেলেবে নাহি মে তুই পরানবি ?

ধনপুদিঃ
পুরিদ’ মুই ফেলেম তরে পরানদা
পুরি ফেলেই পারিদ’ নয় ম-মনানে
অনসুর তোগেবাক তরে চোক্কুনে
মিধে আঝায় ভুলেই রাঘেম তারারে

রাধামনঃ
গমে থেচ, সুঘে থেচ জাঙর এবার –

ধনপুদিঃ
ইয়ো, হধা হলে একখান মানিবেনি ?

রাধামনঃ
হি হধা হধে পরান ?

ধনপুদিঃ
                                   হধা দ্যন বেঘে
নিলদা, মেয়েদাদাঘি তুলি থোই দিবাক
সুচ্চেক-তাগলক গম গম বে’ই –

রাধামনঃ
বুঝিলুঙ, নভাবিচ, তুলিদিম মুয়ো –

ধনপুদিঃ
সুচ্চেক বাচ লভে দঘিন ধাগর
পুক ধাগর ব’-কাধি, লগে থুরচুমো
একজুর তাগলক লভে পঝিমর।

রাধামনঃ
বুনিদিম তত্তেই নিল বেত দিনেই
ফুলর সাম্মো ইক্কো –

ধনপুদিঃ
                             চিগোন হুরুম
সালে বুনিদিচ নিল বেধর দোলেে
আ সেলঘে হেঙগরঙ মিদিঙে বাঝর।
তোনতোগা সলনাদি এভঙ মোনত
ভেক্কানি পেধুঙ্গি এলে সিদু মুই।

রাধামনঃ
বাগত লামিলে আমি চিনিবে হিধগে
তর সচপদরানি ?

ধনপুদিঃ
                                        চিন্নক দিচ
পান’পিচ রাঙাগরি, চিনিমস্যা সালে।

রাধামনঃ
রাদাভো দাক হারের, এবার জাঙর
মোনোত দগত্তন মোনবগা ঝাক।
ফুদিবো প’র হাক্কে, উদিভো বেলান
সাঙু লামিবোঙ আমি দুরোর উদিঝেে
একসঙে একগঙে হমর বানিনে
জুমহাবাত – তত্তেই-ধনপাদাত্তেই।

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s