পজিটিভ রাচনীতি, নেগেটিভ রাচনীতি


আমন’ ধক্যে চাঙমা চাঙমা গোরি থেয়্যে (অনেগর মতে হুয়ো বেঙ) মুনিচ্যরে আবাধা গরি রাচনীতি বাবদর মেলাক জিনিঝোর পইদ্যেনে হলম ধরিলে অনেগে আমক ওহ্বাক হামাক্কায়। অহ্লেয়ো ইরুক হয়েক্কো পতপত্যে চাঙমা পুও-ছাবায় রাচনীতিত লাম্যন হিনেত্তেই তারার উধিঝে এ লেঘাগান। তবে ইয়োত তুলোপারা গোচ্যে জিনিচ্চানি বে’ক জাগার পইদ্যেনে থে’ হেলেয়ো আঝলে সিয়েনি চা’ ওহ্য়ে মুলত তিবুরার রাচনীতির নজরে। সেনত্তেই, জে পরভুও লক্কুন তিবুরা হুল্লে নয় তারা হয়ত বেক ব্যাপারানি বুঝোদে এক্কা লেবর-ঝেবর ওহ্ই পারে সেনত্তেই মুই তারাত্তুন আকমুলিম হেমা চাঙর।

পজিটিভ রাচনীতি হি আ নেগেটিভ রাচনীতিই বা হি ? ভিশন ছাড়া পজিটিভ রাচনীতি ওহ্ই ন’ পারে। পজিটিভ রাচনীতি গরিয়েই পতপত্যে গরি দেঘে তার দায়িত্য পরিলে তে আদামানি হেধক্যে গরি সাজেব’। পত্তানি হেধক্যে গরি বানেব’। হন ছড়ান’ উগুরে হেধক্যে গরি রেগা দিবো। হন হন জাগাত ইস্কুল-কলেচ বানেব’। সে ইস্কুলানি হিঙিরি চলিবো। হন হন জাগাত হাসপাতাল বানেব’। সে হাসপাতালানির পতপত্যে ছাবা তা চোঘোত ভাজি বেড়ায়। তে হবর পায় তে হেধক্যে আদাম চায়, হেধক্যে রেজ্য চায়, হেধক্যে দেচ চায়।

নেগেটিভ রাচনীতি গরিয়ের হন’ ভিশন ন’ থায়। থেলেয়ো সিয়েনি বানা তার ভাষণত নলে ইলেকশন মেনিফেস্টোত। সিয়েনি তে সবন ন’ দেঘে। সিয়েনির সবনে তে পাগলো নয়। সেনত্যেই জিদিবার পরে সিয়েনি তে পুরিয়ো ফেলায়োই ঝাদিমাদি।

নেগেটিভ রাচনীতি গরিয়ের দিয়েন আহ্ত্যের-লুভ দেঘানা আ দর দেঘানা। তরে চাগুরি দিম, তরে বেতন বারেই দিম, এক তেঙা দরে চোল দিম, রেগা হাম দিম, ভাতা দিম। ইয়েন দিম, উভোন দিম গরি লুভ দেঘানা। আ দর দেঘানা, জেমন তরে বদলি গরি দিম, ত’ পুওভো চাগুরি ন’ পেভ’, তর রেগা কার্ড হাবা জেব’, বিপিএল কার্ড হাবা জেব’। তুই ঘর ন’ পেভে। গাড়ির পারমিট ন’ পেভে। কারেন্ট ন’ পেভে। তমা আদামানে পত ন’ পেভ’, রেগা ন’ পেভ’। থানাত নানান বাবদর কেজত ফেলেনেই দলত তানানা। ইয়েনি ভেক্কানি নেগেটিভ রাচনীতির আহ্ত্যের। তুই ম’ দলত থেলে বে’ক পেভে আ ম’ দলত ন’ থেলে হিচ্চু ন’ পেভে।

ভালুক্কো গম গম মানুঝে (মানে মনে-দিলে ঘেচ্চেক গরি গম) পুঝোর গরন-সিয়েনি ন’ গরিলে হিঙিরি তুই রাচনীতি গরিবে ? সালেদ’ ত’ দলত হন’ জন ন’ এভাক। তার জবাবে মুই হধুঙ চাঙ-সালে তর ত’ উগুরে আ ত’ সবন’ উগুরে পুরোপুরি বিশ্চেচ নেই। সুশাসন আ নিরপেক্ষ ভালেদি হামে জিদুক্কো মানুচ হায় টানিবো, লুভ আ দর দেঘেনেই সিদুক্কো মানুচ হায় টানি ন’ পারিবো হামাক্কায়। পজিটিভ পলিটিক্সত হয়েক জন দুলো ধরিয়ে মানুঝে চাগুরি, এক তেঙা দরে চোল, এক জাগাত গদা জিঙহানি চাগুরি গরানা বাদা ন’ পেভাক থিগই মাত্তর আহ্জার আহ্জার জুওইয়ে পুও-ছাবা চাগুরি পেভাক, বেচভাক মানুঝে দোল স্কুল পেভাক, দোল হাসপাতাল পেভাক। এক তেঙা দরে চোলর দরকার নেই। তারারে হাম দিলে তারা নিজেই বাজার দরে চোল হিনি হেই পারিবাক। নেগেটিভ রাচনীতিয়ে মানুঝোরে গরীব রাঘায়, অশিক্ষিত রাঘায়। হারন তেঙা-পোঝে থেলে মানুচ লুভত ন’ পরন, শিক্ষিত অহ্লে মানুচ পাদারা ন’ থান। সেনত্যেই নেগেটিভ পলিটিক্সে তরে ভাতা দিবো, বিপিএল দিবো, এক তেঙা দরে চোল দিবো, ইয়েন-দিবো, উভোন দিবো-বে’ক দিবো মাত্তর তর ইনকাম বারেই ন’ দিবো। স্কুলোত স্টাইফেন্ড দিবো-মাত্তর গম স্কুল ন’দিবো।

নেগেটিভ পলিটিক্সর আরক্কান দাঙর বিপদ অহ্লদে-সিয়েন মাত্র এক্কান লেভেল সঙ তিগি থায়। লেভেল পার ওহ্ই গেলে সিয়েন গারে-গায় নিজে নিজে ভাঙি পরে। হারন তার জে মেইন দিয়েন আহ্ত্যের-লুভ দেঘানা আ দর দেঘানা তার ফলে সে দলুনোত সয়-সাগর লুভি আ পাদারা মানুচ জমা অহ্ন। তারা তর মতাদর্শ গম পেনেই ন’ এঝন। তারা এচ্চোন্নে লুভে, নয় দরে। তারা সেক্কেনে রাচনীতি ন’বুঝোন। বুঝোন্নে পেটনীতি। সাইকোলজির নজরে রিনিলে হিন্তুক লুভি আ পাদারা প্রায় এক জিনিচ। হারন লুভি মানুঝোরই আহ্রেআর দর থায় বেচ। সেনত্যেই তারা দরানো বেচ। নির্লোভ মানুঝোর আহ্রেবার দর ন’-থায়। সেনত্যেই তারা দরানো হম। নেগেটিভ পলিটিক্স গরিয়ে দলুন জেক্কে বেচ দাঙর ওহ্ই জান্নোই, সেক্কে তার চাবাঙীগুনোর ভিদিরে স্বার্থর হোচ্যে বাঝি জায়। সে হোচ্যেত হামাক্কায় গরি তলরুনেই, জিগুনে ইক্কো দলর আঝল শিঙোর সিগুনেই ন জিদোন। ফলে স্বার্থে আ দরে ভেক্কুনে সে দল্লোরে গঝি ললেয়ো ভিদিরে ভিদিরে তারার মনদুখ বারি জায় আ সে শিঙোরত ইক্কো দরমর হুব পরিলেই বিরেট পার্টিয়ো মরা গাঝ’ সান ভাঙি পরি পারে।

সেনত্যেই, নিজোর উগুরে, নিজোর সবনর উগুরে পুরো বিশ্চেচ থেলে নেগেটিভ নয়, পজিটিভ পলিটিক্স গর’।

০৭ নভেম্বর, ২০১৭

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s