চাঙমা ফ্যাশন


ইরুক হালে অনেগে ফ্যাশন শো গরধন। অনেগে চিগোন-দাঙর ফ্যাশন শোত নাঙো গরধন আ অনেগে ফ্যাশন শোর নাঙ শুনিলে তদাত হামেরেই উধোন। অক্তে অক্তে ঘ’ ঘ’ গরি গাবুচ্যে লক্কুনে চাঙমা ফ্যাশনর নানান হিচ্ছু লোনেই জাগুলুগো বদন। জনিয়ো চাঙমাগুনে জিয়েনি গরন সিয়েনি ফ্যাশন শো না বিউটি কনটেস্ট সিয়েনো গমে বুঝি ন পাচ্যে। তুয়ো, সে ভেক্কানি আমি ইয়োত ফ্যাশন শো ইজেবেই তলবিচ গরিবোঙ।

আমি জনি জাগা ভেদে সাগি’ চে’ই, সালে দেভঙ, এ পইদ্যেনে মিজোরামর চাঙমাঘুন বেঘর আগে পত ফুরেয়ে, সে পিঝে অরুনাচলর চাঙমাঘুন, তিবুরার চাঙমাঘুন এভ’তে এক্কা এক্কা মহ্ মহ্ চু চু গরি লর দিবের জুক্কুলাদন। মাত্তর দেচহুলোর চাঙমাঘুন সে হিত্যে হুচ ন’ বারেলেয়ো অন্য আরেক হিত্যেধি তারা ভালুদ্দুর আক্কোয়ে। সিয়েন হেত্তেই হঙর, সে হধাগান পরভুও লক্কুনে হাক্কে বুঝি পারিবাক।

চাঙমা ফ্যাশন গরিয়েগুনোরে আমি জনি গমে রিনি চেই, সালে তারারে আমি দি দলে ভাক গরি পারিবোঙ। এক দলে পিনোন-হাদি গানিরে নুও ধগে ন’ বানেনেই বানা সিয়েনিরে নুও ধগে পিনিভার চেয়োন। পিনোন-হাদিগানিরে চলন্দি নিয়মে ন’ পিনিনেই সিয়েনির নুও ধক আনিবেত্তেই সিয়েনিরে নুও নুও ধগে পিনেনা। বেচভাক মিজোরাম আ অরুনাচলর ফ্যাশন গরিয়েঘুন এ দলত পরন।

এ দলুনোর ফ্যাশনানি ইংরেজিধি জিয়েনরে haute couture হ’ন সে বাবদর। এ বাবদর হাবরানি আগেধি বানানি অহ্দ’ রানী/রাজার ঝি আ ন’ অলে ধনী মানুঝোর বো-ঝিত্তেই। ইক্কুনু দিনোত haute couture-র টার্গেট অলদে নানান দেঝর সেলেব্রিটিগুন। তারার হাবর-চুবোরর আ পিনিভার ধক্কানি দেলেই বুঝি পারা জায় সিয়েনি সাধারন মানুচ্চুনোত্তেই নয়, সিয়েনি পিনিনেই হামত-ওফিঝত জেবার মতয়ো নয় আ সিয়েনি পিনিনেই ঘরদো থেবার মত নয়। তারার হাবরানির দামো সেনত্তেই সে বাবদর।

2.jpg

Haute couture

আরেক দলে পিনোন আ হাহ্দিগানি নুও নুও ফুল আ সাবা দিনেই আরেক্কা দোল বানেবার চেরেচতার লগে লগে সিয়েনিলোই নুও নুও উরিভার আ পিনিভার বানেবারো চেচথা গত্তন। দেচহুলোর বেচভাক ফ্যাশন গরিয়েই এ দলত পরন। তারার ফ্যাশনানি ইংরেজিধি জিয়েনি ready to wear ফ্যাশন হন সে বাবদর। এ বাবদর হাবরানি বানানি অহ্য় ঘরত/হামত সাধারন মানুঝে লারঝার গরিবেত্তেই।

3.jpg

Ready to wear

উগুরোর হধাগানিলোই বুঝি পারা জায় আমা ভারদর ফ্যাশন গরিয়েগুনো হামানি আঝলে আমা চাঙমাগুনোত্তেই হন’ হামদোই ন’ লাগে। আমা জাদত এভ’ সঙ সে বাবদর সেলেব্রিটি/উবর হাবর ধনি জনম ন’ লন জিগুনে তারা ডিজাইন গোচ্ছে হাবরানি হিনিবাক। আ জে ফ্যাশনানি হন’ জনে গঝি ন’ লন সে ফ্যাশনানির হন’ দামো আঘে ভিলি ধরা ন’জায়। আঝলে আমা জাত্তো ইক্কু জে হাবত আঘে সে হাবত আমার ভারি অহ্লে ready to wear বাবদর ফ্যাশনর দরকার আগেধে।

ইক্কুনু জিগুনে রেডি টু ওয়্যার বাবদর ফ্যাশন গরধন তারা হামানি এক্কা রিনি চা’ জোক। তারা হামানিয়ো আমি দি ভাগে ভাক গরি পারিই। এক ভাক হামত পিনোন আ হাহ্দিগানি আর’ রঙচোঙ্যা বানেবার আ আর’ বেচ দোল বানেবার চেচতা গরা ওয়ে। এ বাবদর হামানি উগুরে হন’ হধা নেই। মাত্তর পিনোন আ হাহ্দি লোনেই জে স্কার্ট/ব্লাউচ আ নলে সালোয়ার/কামিজ এমনকি অনেক সময় শাড়ী সঙ বানানি ওয়ে সিয়েনি আমি চাঙমা ফ্যাশন হোই ন’ পারিই। স্কার্ট/ব্লাউচ বানেলে সিয়েনরে ওয়েস্টার্ন ফ্যাশন আ সালোয়ার/কামিজ বানেলে সিয়েনরে আমার পাঞ্জাবী ফ্যাশন হুও পরিবো।

াি.jpg

পিনোনর সান স্কার্ট  নাহি স্কার্টর সান পিনোন

ইয়োত দাঙ্গু/দাঙ্গুবী ডিজইনানুরে এক্কান হোজলি গরিম্বে, তারা জেন তারা ডিজাইনানি রিনি চেনেই এক্কা নিজে নিজে ভাবন, তারা সিয়েন হি পিনোন’ ধক্যে স্কার্ট/সালোয়ার বানেলাক, নাহি স্কার্ট/সালোয়ার’ ধক্যে পিনোন বানেলাক। তারাহি হাহ্দি ধক্যে ব্লাউচ/কামিজ বানেলাক নাহি ব্লাউচ/কামিজ’ ধক্যে হাহ্দি বানেলাক। জনি স্কার্ট/সালোয়ার আ ব্লাউচ/কামিজ’ ধক্যে পিনোন-হাহ্দি বানান সালে থিক আঘে আ জনি সিয়েনি পিনোন-হাহ্দির ধগর স্কার্ট/সালোয়ার আ ব্লাউচ/কামিজ বানানি অহ্য় সালে সিয়েন চাঙমা ফ্যাশনর তেঙেরা ভিদিরে ন’ সমিবোগি।

ম’ হধাগান আরক্কা পোতপোত্যা গরিবেত্তেই আমি পিনোনর আরাঙ ধক্কানি এক্কানা বিজিরেই চে’ই পারিই। তার জেমেন একখান সাবা ধক আঘে, সেমেন তার একখান থায়িথিক আরুগর ধগো আঘে। সে আরুগর ধক্কান অহ্লদে তার দি-মাধা আ-সিলেয়ে। গদা পিত্তিমির মিলের হাবর চুবুরোর তলেধি পিনোন্নে ভাক্কো জনি আমি গমে রিনিই সালে দেভঙ সিয়েনি আজলে তিন বাবদর- (১) দি-মাধা আ সিলেয়ে – জেমেন চাঙমা, তিবিরে, মগ, ভারদর উত্তর-পুক বামত থেয়ে মঙ্গোলয়েড জাদন মিলেগুনোর পিনোনানি, মিয়ানমারর মিলেগুনোর থামি আ থাইল্যান্ডর মিলেগুনোর পানুঙ এ বাবদত পরে। এমনহি ভারদর নানান জাদর মিলেই পিন্যে শাড়ীগানো এ বাবদত পরে। (২) দি মাধা সিলেয়ে – জেমেন ইউরোপ/আমেরিকার মিলেগুনোর স্কার্ট আ গাউনুন বাদেয়ো এ বাবদত পরিবাক চিনোর মিলেগুনোর চিপাও, মালয়েশিয়ার মিলেগুনোর বাজু কুরুঙ আ ভিয়েত নামর মিলেগুনোর আও দাই। (৩) মধ্যে সিলেয়ে – পাঞ্জাবীগুনোর সালোয়ারবো এ বাবদত পরে।

সেনত্তেই পিনোনর ধক্কান এক্কা জুদো গরিবেত্তেই জনি আমি তার দি-মাধা সিলেই (মানে স্কার্ট বানেই) বা তারে মধ্যে সিলেই (মানে সালোয়ার বানেই) সালে তার জাত্তোই বদলি জায়োই ভিলি আমার মনে অহ্য়। তুয়ো মাত্তর গরিলে গরি পারে, জেমেন, মালয়েশিয়ার মিলেগুনোর বাজু কুরুঙর দি মাধা সিলেয়ে অহ্লেয়ো লাগে জেমেন দি মাধা আ-সিলেয়ে আ জাপানি মিলেগুনোর কিমোনোঘুন দি-মাধা আ-সিলেয়ে অহ্লেয়ো লাগে জেমেন সিগুনোর দি-মাধা সিলেয়ে। তে পিনোনর দি-মাধা সিলেলেয়ো জনি উগুরে আ তলে সঙ থায় মানে স্কার্টর সান তলে দাঙর আ উগুরে চিগোন ন’ অহ্য় সালে আমার মনে অহ্য় পিনোনর ধক্কান জে অহ্দেঅহ্ত থেব’।

ইক্কু চাঙমা ফ্যাশনর আরেক হিত্যেধি এক্কা রিনি চা’ জোক। ফ্যাশনর এক্কান আরাঙ জিনিচ অহ্লদে অক্ত। পঝিম দুনিয়ের ফ্যাশন ডিজাইনারুনে তারা হাবর-চুবোরানি সিজন মজিম শো গরন। জেমেন – সামার, উইন্টার, স্প্রিং আ অটাম। আমা ফ্যাশন ডিজাইনারুনে হি হন’ সময় চিদে গোচ্ছোন আমা চাঙমা মিলেগুনোর জারহাল্যে হি বাবদর পিনোন পিনি পারন আ ন’লে বারিজে দিনোত হন বাবদর উরোন-পিনোন ওহ্ই পারে ? ওফিসত জাদে হি বাবদর উরোন/পিনোন ওহ্ই পারে আ ঘরত থেলে হি বাবদর হাবর-চুবোর পিনি পারে ? আ নলে হিয়োঙত জাদে হন বাবদর উরোন-পিনোন ওহ্ই পারে ?

Bali Hiyong dressবালির মিলেগুনোর হিয়োঙত জেবার ড্রেস

দেচহুলোর ডিজাইনারুনে এক্কা এক্কা বার্মিজ সাবা লোনেই এক বাবদর মিলেগুনোর মেলা ড্রেস বানেয়োন। দেগধে মন্দ ন’লাগে। সেজান গরি ভিদিরে স্ট্র্যাপ আ হুক লাগেনেই হারোচ্চে মিলেগুনোত্তেই, জিগুনে এভ’ গমে পিেিনান পিনি ন’ জানন, তারাত্তেই নাক্ক-পিনোন বানেই পারন। সালে তারা সিয়েনি চোরোত-চারাত wrap around skirt-র সান গরি পিনি পারিবাক। ভিদিরে লেগিংস ফিট গরিনেই স্পোর্টস পিনোন বানেই পারা জায় জিয়েনি মিলেগুনোর সুধোম বেয়্যে হারাগানি হহ্দে হামত লাগিবো।

চাঙমা মিলেগুনোর পিনোন হম পিনিভার দিয়েন দাঙর হারন দেঘান – এক্কান অহ্লদে গরম আরক্কান অহ্লদে লত্তে-চত্তে বেসুনজুক। এ দিয়েন জিনিচ হিঙিরি সোর গরি পারা জায় সে হিত্যে নজর দিবেরো দরকার আঘে। পলিমান পারাপাঙ পিনোন বানেবার হাবরানি বদলেই পারিলেই হিঝু সচ্চরম অহ্ব’ মাত্তর জেররান সেধক উজু নয়। সিয়েন হিচ্চু গরি পারা ন’জায় সঙ আমা দাঙ্গুবিদাঘি এক্কা বল দি পেবাক্কে আয়।

আরেক্কান হধায়ো আমার মনে অহ্য় – আমি জেধক বল হিজিদঙ সাত – আমা লুগেই জেয়ে ‘হোগোই’ভুও ফিরেই আনি ন’পারিলে ড্রেস ডিজাইনত ভ্যারাইটি আনধে আমার হিজেহিচ্যে জেব’। চাঙমা ডিজাইনারুনে বার্মিজ মিলেগুনোর yinzi বদর হোগোই ডিজাইন গরিভার চিদে গরি পারন। আমি হোগোই পিনেনা চালু গরি পারিলে হাহ্দিগান ফ্রি অহ্ব’ আ নুও নুও বাবদর ডিজাইন চিদে গত্তে উচ্চো অহ্ব’।

Yinzi

বার্মিজ মিলেগুনোর yinzi

হধাগান আরক্কা পাঘোর মেলা জোক। আমা দেচহুলোর আ তিবুরার মিলেগুনে হাহ্দিগান লারচার গরন জুদো গরি নয়, পিনোনানর উবুরোর হত্থা ইজেবে। হেত্তেই, পিনোন পিনিলে হাহ্দি হামাক্কায় লাগিবো। জেন শাড়ীর তলেধি ঘিরি পিনিভার হত্থাভুও আ পিঝেন্নিত্তুন বেরেই আনিভার হত্থাভুও এগই। মানে তুই শাড়ীগানোই জে’ন দি বাবদর গরি দি-হত্থা বানেয়োচ্ছে। মাত্তর আমা মিজোরামর একদাঘি দাঙ্গুবীদাঘি আ দেচহুলোত্তুন জিগুনে দেচ-বিদেঝত থান্নোই সিগুনে হাহ্দিগান পিনোনর হত্থা ইজেবে নয় অনেকটা শালোয়ার কামিজর লঘে ওরনা সান গরি লারচার গরন। সিয়েন লঘে রাঘান জনিয়ো, মাত্তর ন’থেলেয়ো সেত্তোমান বজঙ ন’ লাগে। হারন উগুরে তারা টি-শার্ট/টপ বাবদর হোগোই পিনোন। মাত্তর তিবুরা বা দেচহুলোর ধঘে হাহ্দি সারা পিনোন পিনিভার হধা সবনেয়ো ভাবি পারা ন’ জায়।

আমা চাঙমা ফ্যাশন গরিয়েগুনে জাগুলুক বদন হোগোইবোলোই। তারা হাক্কে হাহ্দিলোই হোগোই বানান আ নলে পিনোন্নোই হোগোই বানান। আ অনেগে সে বদলে ওয়েস্টার্ন বাবদর ইনার ওয়্যার নলে টপ বঝেই দ্যন। সিয়েনি ন’গরিনেই উগুরোর টপ/টি-শার্টোর আমি জনি এথনিক লুক আনিনেই সিবেরে হোগোই ইজেবে লারচার গরি পারিই সালে ভজমান ভ্যারাইটি এভ’ ভিলি আমার মনে অহ্য়। সেক্কে হাহ্দিগান থাই মিলেগুনোর সাবাই বা লাও মিলেগুনোর ফা-বিয়াঙর সান গরি লারচার গরি পারা জেব’। ইয়েন দেচহুলোত এক্কা-উক্কো গরিয়ো চা’ ওয়ে। মাত্তর তারার আউট লুক্কান বানা সে বামর মারমা ড্রেস সঙ থেক হানান হারনে সিয়েনি সেত্তোমান জুর ন’পায়।

pha-biyang

লাও মিলে আ মরত্তুনোর ফা-বিয়াঙ

মুই ইয়োত এক্কান হোজোলি রাগেম্বে, জিগেুনেই চাঙমাগুনোর উরোন-পিনোনর পইদ্যেনে নুও হিঝু চিদে গরিভের চেভাক তারা জে’ন পঝিমর বদলে পুগেধি রিনি চা’ন। হারন আমা শিঙোরানই পুগেধি। আমি জনি গদা পিত্থিমিঘান রিনি চে’ই সালে দেভঙ ভারদর পঝিমেধি জিদুক্কো জাত আঘন তারা বেচভাক নাক লাম্বা (ককেশাস আ নেগ্রয়েড জাদর মানুচ) আ পুগেধি জিদুক্কো জাত আঘন তারা বেচভাক নাক বাধি (আমা সান মঙ্গোলয়েড)। সেনত্যেই পজিমর মানুচ্ছুনোরে চেলে পুগেধি মানুচ্ছুন্নোই আমার ধগে-ধাগে, আক্কলে-হাচ্যেগে, হানায়-দানায়, উরোনে-পিনোনে ভজমান ভজমান মিল। সেনত্যেই হনজনে ড্রেস ডিজাইন গত্তে ফ্রান্স/ব্রিটেনরে ফলো গরিলে জেত্তোমান বেহুচ্যে লাগিবো থাইল্যান্ড/মালয়েশিয়ারে ফলো গরিলে সেত্তোমান বেহুচ্যে লাগিদো নয়।

বেগ’ জেরে মুই জে হধাঘান তুলিম সে হধাগান শুনিলে অনেগর একখান বাঙাল’ দাঘ’ হধা ইধোত উধিবো। সিয়েন অহ্লদে, ‘সারা রেত রামায়ন পড়িনেই সীতা হার বাপ।’ হধাগান অহ্লদে, আমার ফ্যাশন শো গরিভের দরকার আঘে না নেই ?

২০১২ সনত মিজোরামত বেরা জেনেই বিদিজেয়ে সুনানু ইন্দ্র লাল চাঙমায় মরে হয়ধে, ‘তোমা তিবুরাদো ফ্যাশন শো গরিভের দরকার আঘে। ইধু আমি ফ্যাশন শো গরির ধুরি দেয়ে, আমা নাক্কবীদাগি এক্কা এক্কা চাম চাম ওয়োন্নে।সে আগেধি চাগলগত্তেই চে’ই পারা ন’জেদ।’ মুই তারে জুওপ দোঙ্গে অহ্লদে, ‘না দা, আমি ভেক্কানি গরিলেয়ো সিয়েন নহ্ গরি পারিদঙ নয়।’ ইক্কুনু জনি হন’ জনে সে পুঝোরান আরেক বার গরন ম জুওপ্পান জিয়ে স্যেন অহ্ব’। হেত্তেই, সিয়েন তলে তুলি ধরঙর।

গদা পিত্থিমিত হন’ সরকারে হন’ বাবদর ফ্যাশন শো গরে ভিলি আমার জানা নেই। সিয়েনি ভেক্কানি আঝলে আরকানি গরন হন জনে গায় গায়, হয়েক জনে সমার বদিনেই, হন’ ইক্কো জধায় আ ন’লে হন’ বিজনেস ফার্মে। তে আমা চাঙমাগুনোত্তুন হন জাগাত নিজোর হন’ সরকার নেই। সেনেত্তেই আমি বিঝুমেলা, সামাজিক পঞ্চায়েত/টিসিএসএ, ওয়াইসিএ, এমসিএসইউ, এপিসিএসইউ-রেই সরকার ইজেবে ধরি নেজেইে পে’ই। হনক্কান জিনিচি বিঝুমেলাত বা ওয়াইসিএ-র মিলোনিসভাত দেগানি ওয়ে মানে চাঙমাগুনো সিধু সিয়েন সরকারী ধগে চালু ওয়ে গরি আমি ধরি নেজেই পেভঙ। সেনত্তেই আমি সে জাগানিত ফ্যাশন শো গরিবেত্তেই অমহদ’ গরি উগুধো গরিই। মাত্তর হন জনে গায় গায় বা হয়েক জন সমার বদিনেই আ নলে ‘চাঙমা ফ্যাশন হাউস’ বাবদর হন জধা বানেনেই ফ্যাশন শো গরিলে আমার হামাক্কায় বলাবল দিবের গরজ আঘে। এগই হধা হিপ-হপ নাচ বা জুদো বাবদর আল্ট্রা মডার্ন জিনিচ্চানির বেলায়ো খাদে।

ইয়োত আরক্কান হধা তুলোপারা গরি পারা জায়। জে হন সমাজ চলন্দি। তে অনসুর অক্তর লগে লগে নিজোরে বদলি বদলি নেজায়। সে বদলি নিবার গঙত এক দাঘি পুরোনিঘান শক্ত গরি ধরি থান আ এক দাগিয়ে ঝাদি ঝাদি বেচ বেচ গরি বদলি জান। শক্ত গরি ধরি থেয়ে দল্লো জনি গদা সমাজর ১০% অহ্য় আ বেচ বদলি জেয়ে দল্লোয়ো জনি ১০% অহ্য় সালেন তারারে সাপোর্ট গরিয়ে থেবাক আর’ ১০%-র দরে। দি-মাধাদি দি-দলর তানাতান্যাত বাগি ৬০% মানুচ একখান মধ্যপত ধরিনেই ব্যালেন্স গরিনেই চলন।

জে জাত্তো নুও আ পুরোনর ভিদিরে ব্যালেন্স গরি চলি পারিবো সিবে নিজোরে তিগেই রাঘেই পারিবো। জে জাদত বদলি জেয়েত্তুন পুরোনিগানি শক্তগরি ধরি থেয়ে বেচ ওহ্বাক, সে জাত্তো লারে লারে রুধুক মরা ওহ্নেই মরি জেবগোই। আ জে জাদত পুরোনিগানি শক্তগরি ধরি থেয়েত্তুন ঝাদি ঝাদি বদলি জেয়ে বেচ ওহ্বাক, সে জাত্তো পত আহ্রেনেই নিজোরে পরর হাবুগোত ফেলেবগোই। সেনত্তেই মুই জানিশুনি পুরোনিগানি শক্তগরি ধরি থেয়ে দলত। হারন আমিয়ো জনি বদলি জেয়ে দল্লোত ভিরিয়োই সালে আমা জাত্তোর ব্যালেন্স ন’ থেব’ ভিলি আমার হিয়েচ। আমার ইয়েনো বুঝিভার দরকার আঘে, জে হামানিত আমি ইক্কু বল ন দির সিয়েনিই হয়ত ১০০ বা ২০০ বঝর পরে চাঙমা জাদর সুধোম অহ্ব’, মাত্তর আমা শক্তগরি পুরোনিগানি ধরি থেয়ে দল্লোর সাগনিত সেক্কেনে সিয়েনি এতই সাগা জেব’ জে সিয়েন আর বেচভাক চাঙমায় গঝিলধে না ন’গরিভাক আ সিয়েনর ধক্কান চাঙমার নয় ভিলি মনে ন’ অহ্ব’।

০৪ জুন, ২০১৯

PDF version of the article Chakma Fashion

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s