ধক আ মাজারা

ইক্কো জাদর তুগুন সম্পত্তি তার ধক আ মাজারাগানি। আহ্জার আহ্জার বঝর ধরি ইক্কো জাদত জনম লোয়ে পোতপোত্যে মানেয়ুনোর ফুদো ফুদো মেহ্ত এগত্তর ওহ্নেই জনম লয় ইক্কো জাদর ধক, হাচ্যেক আ মাজারা। ইক্কো জাদর পরানঘর হোই পারা জায় জার জার এ মাজারাগানি।

মাজারা বাজেই রাঘানার লারেই ইক্কু আমার আঝল লারেই। আমা জাগাগানি আ সিয়েনির নাঙ, নাঙত্তলে সমি থেয়ে বিজক্কানি, আমা হধা – তার ঘাচ্চারা আ লিগিভার অহ্রক্কুন, আমা পিনোন, হাহ্দি, হবঙ, সিলুম, আমা উভোগীত, ওলিগীত, ঝরাগীত, তান্যেবিগীত, আমা ধুদুক, হেঙগরঙ, শিঙে, বাঝি, আমা বনভান্তে, মানবেন্দ্র লারমা, হালিন্দি রানী, শিপচরন, পেথ্যে ফগির, আমা হেবাঙ, হোরবো, গোরাম, গুদেয়ে, তাবাদ্যে, তেলদ্যে, পোগোনোতদ্যে, সেক্কে, পুচ্চে – ইয়েনি আমা জাদর পরানর এক-এক্কো হোলোই। ইয়েনি লুগেই জানা মানে চাঙমা জাত লুগেই জানা।

আমা জাদর সম্পত্তিগানি সিদি পোচ্ছে নানান বামত নানান ধগে – মিয়ানমারত, ভারদত, বাংলাদেঝত, দৈঙনাক্যেত, তোঙতোঙ্যেত, আনোক্যেত – ইয়েনি ভেক্কানি বাজেই রাগেবাত্যেই একজমালে বালা ধারাধারিগরি গিল দিবার হামত লামা পরিবো। ন অহ্লে গায় গায় হন’ জনে বুরেই ন এভঙ।

জাদর মাজারা বানানা আ আগেধে মাজারাগানি বাজেই রাঘেবার হামত বিঝুফুল বেঘর সেপবত্তা আ বলাবল লোনেই লেবেদেই আঘে ১৩ বঝর ধরি। দুমুরি ন পারিলেয়ো চিগোন চিগোন হুচ ফেলেই আমি আক্কোই জের নিরঘন্দি গরি। আমার আঝা একদিন আমি সাল্যেঙত লুঙিবঙ্গোয়ই।

বিঝুফুল, নাদা-১৩, বিঝু-২০১৩

Advertisements

বিঝুমেলা-২০১১

বঝর পত্তি বিঝু মেলা যদি আমি তিবুরার চাঙমাগুনে ন গত্তঙ সালে পারাপাঙ আমা সুদোমর ভালোক্কানি দোল দোল জিনিচ আহ্জেই ফেলেলঙন। বিঝু মেলাত আমি জানিই ন জানিই নাজিই, পারি ন পারি গিত গে’ই। তুও আমার নাচ-গীত বাজি থোক, বলবলা ওহ্ই উধোক – এ ধারাজে। গদা বঝরবো ক্রিকেট-ফুটবল আ নানাক্কান বেজাদি খারালোই লুদুপুদু গরি থেনেই বঝর’ শেজত এক বার অহ্লেয়ো সিদেন’ হোনা বিজিরেই নিহ্গিলেই আমা ঘিলে-নাদেঙুন। মা-ভোনুনে পিনোন পিনোন-খাদি। চান্দা-ভিক্কে গরি, সিলুমোর জেপ বিজিরেই বিজিরেই অহ্লেয়ো ছাবেদঙ চেই ইক্কো চাঙমা বই। গিত গেয়েগুনেয়ো লাভ-লোকসানর হধা পিঝেদি লুঙিমারি চাঙমা জিঙহানির ধারাচ পুরোন ইক্কো গিদোর সিডি ফগদাঙ গরি। বিঝু দিনোত আমা সিধু হাক্কনত্তেই অহ্লে লতা-কিশোর-কুমার সানু ডাগিত্তুন ডাঙর অহ্য় অভিক কুমারে।

বিঝু মেলার হালে­াংঙো আমি যদি আ এক্কা ডাঙর গরিই সালে বানা নাচ-গিত নয় জুদো দরকারি জিনিচ্চানিয়ো আদিবো অহ্লে! যেমন ইক্কু বিঝুরে মুজুঙে লোনেই গদা পিত্থিমির চাঙমা গুনোর মিলিবার এক্কান জাগা বানেবার হধা চিদে গরা অহ্র। দিল­ী, কোলকাতা আ বিদেঝত থান্নে আমা জাত ভেই-ভোনুনোরো তারা তারা মিলিবার জু বানা বিঝুবো। সেধক্যে বিঝু দিন্নোত যদি তিবুরা, মিজোরাম, অরুনাচল, দেচকুল আ আরাকানর আনক্যা, তোঙতোঙ্যা আ দৈংনাক্যা চাঙমাঘুন এক উদোনত মিলি পারিদোঙ সালে সিয়েনত্তুন পারা দোল আ হিচ্ছু ন থেলুন।

এবারর বিঝু মেলাবো হয়ত বিজগত নাঙ রাগেব’ যদি তার আরেয়ে হামানি গমে সির নেজেই পারে – ১) তিরিচ বঝর পরে যুগোর লগে তাল মিলেনেই এবারর বিঝু মেলাত হয়ত ‘তিবুরা রেজ্য হাবর বিঝু মেলা’ তার ঠায়ঠিক ‘লোগো-ভো পে’ই পারে। ২) রেজ্য হাবর বিঝু মেলা এজেত্তে বঝর হন জাগাত পরিবো সিয়েন আগাম ঘোষনা দি থবার সুদোম হয়ত এ বিঝু মেলাত্তুন ধরি চল ওহ্ই পারে। লগে বানানি ওহ্ই পারে তিবুরা রেজ্য হাবর বিঝু মেলার নানু জধা। যদি পারা যায় সালে আমি হোয় পারিবোঙ তিবুরার বিঝু মেলার তিরিচ বঝরে এক্কা এক্কা লেবাঙ’ ফোর গে’ল সালে !

বিঝু নিজেনিহ্, ২০১১

বিঝুমেলা ২০১২

অরুনাচল, আসাম, মিজোরাম, তিবুরা, দেচহুল – গদা চাঙমা-পিত্থিমিত বে’ক চাঙমাঘুন এক তোলোয়োত বঝিবার এক মাত্র জাগা তিবুরার বিঝুমেলা। আঝা রাঘেই দৈঙনাক্যে-তোনচোঙ্যে-আনোক্যে বুদ্ধিজীবীঘুন বঝরে একবার মিলিবার আরকানিয়ো গরি পারিবোঙ ইয়োত মুজুঙোর দিনুনোত। দেচহুলোর ‘আদিবাসী মেলা’, মিজোরামর ‘সিএডিসি ডে’ আর’ নানান চিগোন-দাঙর জধার বৈ-সা-বি পালনী/বিঝু পালনীদো আঝা গরিই এ পইদ্যেনে এক্কা-উক্কো চিদে গরাহ্ অহ্ব’।

এ বঝর ৩১ পল্লার বিঝুমেলা ফেলা অহ্র। এ বঝরত্তুন ধরিনেই বিঝুমেলাগানরে নুও ধগে সাজেবার আরকানি নেজা অহ্ল’। গদা তিবুরারে অট্ট্যভো বামে ভাক গরিনেই বামে-বামে খারা আ নাচ-গীদর জিদেজিত্যে এ বঝরত্তুন ধরিনেই চালু গরা অহ্ল’। লগে আমার জে জিনিচ্ছানি আহ্জি জাল্লোই সে – উভো গীত, ঝরা গীত, অলি গীত, তান্যাবী গীত, হেঙগরঙ বানা, ধুদুক বানা, শিঙে বানা, পোত্তি খারা, ঘিলে খারা, নাদেঙ খারা, বাদল তাক চানা, ফু তাক চানা – এ বাবদর জিনিচ্ছানি বামানিত্তেই হামাক্কায় গরি দ্যে ওয়ে। হয়েক বঝর পরে এ জিদেজিত্যেগানি চাঙমা সাংস্কৃতিক জগদত নুও তুবোল আনি দিবো ভিলি আমার আন্দাচ।

বিঝুর তিন্নো দিন বেঘর গমে হাদোক, সুঘে হাদোক। মায়ুগাঙ, ধিকনদী, লাঙফের, সাজেক-থেগা-তৈজোঙ, দেরগাঙ-মনুগাঙ-গুমেত, কাজলঙ-মেয়েনি-চেঙেই গাঙর অঝার হলগত বোই জোক হুঝির বরব’। চাঙমা জাদর জয় ওহ্ক।

                                 বালাতুলি মনকঝড়া বেক ফেঝেড়া, মানেই উধো জাগিরে
ফি-বলা, আপদ বলা, দূরত যোক – কই উধে বিঝুপেঘে ডাগিরে।
– জনেশ আয়ন চাকমা।

বিঝু নিজেনিহ্, ২০১২

১৮ আঘস্টত আমি হি পেলহ্ঙ?

১৮আঘস্ট ২০১১। আগরতলা রাচপধত ৪০০-র উগুরে চাঙমার ৭ জানুয়ারি ২০১১-ত লোয়ে চাঙমা ভাচ ভালেদি শল্লাদারি জধার চাঙমা লেঘা চালু গোরিভার সিদ্ধান্তগান বলাবত গোরিভার দাবি গোরিনেই মিছিল। এ মিছিলানে আমারে হি দিলো ? ২৯ আঘস্ট ফদাঙতাঙ ওয়ে ইয়েনে আমারে চাঙমা লেঘা দি ন পারিলো। সালে আমার হি গাত পরিলো ?

গমে তলবিচ গরিলে ১৮ আঘস্টর আরকানিগানে আমারে চাঙমা লেঘা আনি দি ন পারিলেয়ো সবায় গাত ন পরে। ভালক্কানি হারনে সেদিন্যে তিবুরার চাঙমা বিজগত ইক্কো নুও ধেলা হোর উত্তে ভিলিই আমি ধরি নেজেই পারিইঃ

১) হম হম গরি অহ্লেয়ো এবারদই পলিম তিবুরার বে’ক বামত্তুন মানুচ এনেই হনক্কান হামত জুক দুওন্নি, ফেনি, গুমেত, মনুগাঙ, দেরগাঙ এক জাগাত মিল্লোন – ইয়েন চিগোন হধা নয়। ইয়েন হিঝু ইরুক জুগোর উদো লো-লি গোরিভার পত্থানি দবদবা ওহ্বার হারনেয়ো ধুরি পারা জায়।

২) তিবুরার চাঙমা জাত ভালেদি হামত গঙ ন থেবার এক্কান মুলুক হারন আমা বুরো আ গাবুচ্যেগুনো ভিদিরে গম তালমিল ন থানা। বুরো, গাবুচ্যে আ ছাত্রগুনোরে এক জাগাত মিলেবাত্যেই এবারদই পলিম এক্কান ভেইল ধরি চেরেসথা গরা ওয়ে। অল ইন্ডিয়া চাকমা কালচারেল কনফারেন্স, ইয়ং চাকমা এনোসিয়েশন আ ত্রিপুরা চাকমা স্টুডেন্টস এসোসিয়েশন – এবারর সান জুদি মুজুঙোর দিনুনোদ’ ঘেচ্ছেকগোরি এক ঘজায় হাম গরি পারন সালে তিবুরার চাঙমাগুনোর মুজুঙোর দিনুনোর বিজক জুদোবাবদর অহ্দে বাধ্য আ

৩) এ আরকানিগানত আমার জিয়েন বেগ’ দাঙর উঝোল হোই পারিই সিয়েন অহ্লদে – এ আরহানিগানে হামাক্কায় গোরি চাঙমাগুনোর রুমে রুমে ভিদি থেয়ে ্ঔপনিনেশিক মানসিকতার পাগোচ্যে গাচ্ছোত দরমর’ হুপ বোঝেই পাচ্ছে। আগেধি মনে গরা অহ্দ’ আমি ব্যানারানিত হি লেগিলোঙ তারা ন বুঝিলে আমার হন’ লাপ নেই, আমি শ্লোগানেদি হি মাঘির সিয়েনি তারা ন বুঝিলে হনা ন হনা সঙ – এই জে চাঙমাগুনোর ‘তারা’ কেন্দ্রিক মানসিকতা – ইয়েন চাঙমাগুনোর জুক জুক ধুরি পরর অধীনত্তল থেবার ফল, জিয়েনরে হুও অহ্য় ঔপনিনেশিক মানসিকতা। আগরতলা টাউনর শন শত বেজাদির সেরেদি চাঙমা লেঘাদি বর বর গোরি লেখ্যে ব্যানার ধুরিনেই বুক ফুলেই উজেই জানা, হাজা চাঙমা হধাদি জোগার পারি পারি শ্লোগান দেনা – ইয়েনিয়ে তিবুরার চাঙমা বিজগর তেক ঘুরেই দিবো সিয়েন দায়হাম মারি হুও জায়।

মাদি, সেপ্তেম্বর, ২০১১, ন’ বঝর, নাদা-৬৬

ন দোরেম মুই হমলে

লারেই লারেই লারেই চে’ই, লারেই সারা গুদি নেই। সেই লারেই গত্তে দরেলে ন অহ্য়। জাদত্তেই, দেঝত্তেই ঘিলেগান পিঝেদি দিনেই লারেয়োত বুক ফুলেই মুজুঙেধি উজেই জা পরে। পাদারা জাদে, পাদারা মানুঝে লারেই গোরি ন পারন আ লারেই গোরি ন পারিলে অধিকারর হধা হনায়ো তারা মুওত ন সাজে।

মাত্তর আমা তিবুরার চাঙমাগুনোরে রিনি চেলে হধাগান মিঝে মনে অহ্য়। আমাত্তুন হুও ন হুরিনেই পানি পরানে মাঘে, ন মাক্যে গোরি বে’ক বাবদর অধিকার পরানে মাঘে। হয়েক জন সমাচ্যে মিলিনেই আমার ইয়েন নেই, উভোন নেই, আমারে ইয়েন ন দোন, উভোন নদোন হলে আমি বিরেত আন্দোলন গরি ফুরেয়েই মনে গরিই। আ দঝ’ মুজুঙে চাঙমা জাত্তো এবাবদর. চাঙমা জাত্তো ওবাবদর গরি গবি পারিলেধ’ হধাই নেই – সিবেরে আমি জাত ভালেদি হামত্তেই মেডেল দিবেত্তেই ধারাচ গরিই।

বেঘত্তুন বেচ আমক ওহ্বার হধা – আমা গদা জিঙহানিগানত ন দোরেনেই এক্কা ধিবে হুহ্লি অহ্ক হধা হোভাত্তেই হন’ সময় নেই। গদা জিঙহানিগানত ন দোরেবার হন’ সময় নেই আমার। ছাত্র লক্কে আমি দোরেই – নিজো জাদত্তেই হধা হলে লেঘা-পড়া শিগি-সাগাই চাগুরি ন পেভঙ। চাগরি পেলে আমি দোরেই – বেচ বেচ গোল্লে মরে উতারা প্রমোশন ন দিবাক, জু-সুনজুক ন দিবাক, বর বর সরকারি কমিটিত বর বর পোস্ট ন দিবাক আ নলে রুখ্যাঙত বদলি গরি দিবাক (অনেগে দর দেঘান, সাসপেন্ডো গরি পারন) । চাগুরি সেচ গরি পেন্সনত গেলেয়ো আমার দর ন জায় – আমার পেন্সন বন্ধ ওহ্ই পারে বা ম পো-সাবাগুনে চাগুরি ন পে’ই পারন।

গদা পিত্থিমিত পারাপাঙ একমাত্র তিবুরার চাঙমাগুনেই আঘন্নে জারা নিজোত্তেই, নিজো জাদত্তেই হধা হনাগান পাপ মনে গরন, দুচ মনে গরন। পেদর পিঝেদি দুমুরোদে গরিপ্পুনোর জাদর হধা ভাবিবার সময় নেই, ধনিগুনোর জাদর হধা ভাবিবার গরচ নেই। ছাত্রই ন ভাবিবাক, চাগরিবলাই ন ভাবিবাক, গরিবে ন ভাবিবাক, ধনিয়েয়ো ন ভাবিবাক – সালে জাদর হধা ভাবিবো হন্না ?

এই জে আমার জনমভুরি পিত্তোমরা ভাপ, নিজোরে চিগোন মনে গরানা, নিজোরে পরর অধীনত্তল মনে গরানা – ইয়েনর হি হন’ দারু আঘে ? অভিধম্মর বিদর্শনরসান আঘে নেনা হন’ পত, জিয়েনে এ আহ্জার বঝরর পাদারা ঔপনিবেশিক মানসিকতাগানি হাজেনেই আনি দি পারে স্বাধীন মানসিকতা ?

মাদি, আঘস্ত, ২০১১, ন’ বঝর, নাদা-৬৫

মুই জলি ন উধিম হেত্তেই

দেচহুল আ সিধুগোর চাঙমাগুনোর আহ্বালর হধা ভাবিলে কবিতা চাঙমার হবিদে সুরবো গারেগায় ইধোত উধে – ‘মুই জলি ন উধিম হেত্তেই।’ আঝলে অয়, অলর গরি থেবার বে’ক পত্থানি এক্কান এক্কান গরি নাদা গেলে হিঙিরি থেই পারে জলি ন উধি ?

বাংলাদেচ সরকারে তা সংবিধানত জুম্মোগুনোর, জুম্মোধ’ ওহ্বোলার হধা, আদিবাসীগুনোর নাঙ লেঘা থোগো ন চায়। সরকারর মুকপাত্তি দুনিয়ের বে’ক দেঝর মুকপাত্তিগুনো মুজুঙে বাংলাদেঝত আদিবাসী নেই হোই পারে। এমনকি প্রধান মন্ত্রীয়ো সাংবাদিক সম্মেলনত আদিবাসী নেই ভিলি ফগদাঙ গরি পারে। সে সরকারে জে ঘেচ্ছেক গরিয়ো চিগোন জাত্তুনোর মাজারা লুগেই দিবার আরকানি নেজেবদে সিয়েন এক্করে বান্ধা হধা।

জে আওয়ামী লীগ সরকারে জেএসএস-র লগে চুক্তি গরিলো, জে দল্লোরে জুম্মোগুনে আগেত্তুন ধরি হিঝু অহ্লেয়ো সদর ভাবন, সে আওয়ামী লীগর সরকারে এক কলমর গুদোয় বে’ক চাঙমাগুনোরে বাঙাল বানেই দিলো। তে এসান গরিবধে পারাপাঙ জেএসএস-র মুলুক্কুনে সবনেয়ো ভাবি নবারন। সিত্তুনদ’ বিএনপি ভালা এল, তে ধ সংবিধানর ‘বাংলাদেচর ভেক্কুনে বাংলাদেশী ইজেবে চিনপচ্য পেভাক’-এ লেঘাগান পুঝি ফেলেই নদে।

ইধোত উধে ১৯৭২ সনর হধা। সেক্কেয়ো ঠিক এবাবদর গরি শেখ মুজিবুরোর মলাদারির সরকারে সংবিধানত লেক্যে, ‘বাংলাদেঝর ভেক্কুনে বাঙালী ভিলিনেই চিনপচ্য ওহ্বাক।’ সেক্কেনে এমপি মানবেন্দ্র নারায়ন লারমা সংসদত থিয়েনেইে হোয়ে, “একজন বাঙাল জেমন হন দিন চাঙমা ওহ্ই ন পারে, সেধক্যে এক জন চাঙমায়ো হন দিন বাঙাল ওহ্ই ন পারে। আমি বাংলাদেঝর মানুচ ইজেবে বাংলাদেশী, বাঙাল নয়।” হধা মানামানি ন ওনেই তে সংসদত্তুন নিহ্গিলি এচ্ছেগোই।

মাত্তর এবারত এগই জাগাত এগই হধা আরকবার জেক্কে গাগদামি বাংলাদেচ সরকারে লেঘের, সেক্কে উল্লো গরিয়ে হন জন নেই। হিলচাদিগাঙর তিন জন এমপি-দীপঙ্কর তালুকদার, যতীন্দ্র লাল ত্রিপুরা আ বীরবাহাদুর সেক্কে চেয়ারর লুভে বুপ সাজি রয়োন। ইউপিডিএফ আ জেএসএস – তারা তারা মারামারি গত্তে বরবেচ হিজেক সারি ন তাঙরন।

বানা রাজা দেবাশীষ রায় এবার রাজারলাক হাম গোচ্ছে। বাংলাদেচ আদিবাসী ফোরাম. জেএসএস, সিধুগোর বামপন্থী, মানবাধিকার হাম্মো আ অঝার মনর জধাগুনোর মুকপাত্তিগুনোরে সমার লোনেই ৩০ জুন সংবিধান সোরগরানার আগর দিন সঙ বাংলাদেচ সরকাররে তে মানেবার চেষ্ঠা গরি জেয়ে। মাত্তর সিয়েনি আমল দিবের বেদা বাংলাদেচ সরকারে নয়। বাংলাদেঝর সান ন ইল্যে সরকাররে জে হোজলি গরানা বেনামা বেনামা সিয়েন আরকবার প্রমান পা’ গেল’।

মাদি, জুলাই, ২০১১, ন’ বঝর, নাদা-৬৪

হেত্তেই বিঝুমেলাঘান সোর গরিভার দরকার

আমি, তিবুরার চাঙমাগুনে গেল্লে ৩০ বঝর ধরি বিঝুমেলা গরির। ৩০ বঝর সময় হেচ্চার হধা নয়। মাত্তর ৩০ বঝরে তিবুরা বিঝুমেলাঘান সানে আ সিক্যেই জেত্তোমান দোল আ পতপত্যে ওহ্ই উধিবার হধা এল’ সেত্তোমান জে ন অহ্য় সিয়েন ভেক্কুনে খাম খেই পেভাক। জে জে উনোগানি আমার তিবুরা রেজ্য হাবর বিঝুমেলাত চোঘত পরে সিয়েনি তোলেই চা’ জোক –

১) নাঙে রেজ্য হাবর বিঝুমেলা অহ্লেয়ো আমি হন’ বঝর হন’ বিঝুমেলারে ঘেচ্ছেক গরি তিবুরার গদা চাঙমাগুনো সিধু লুঙেই দি ন পারিয়োই। জেমন, আগেরে গুমেত বামর তুইচাঙমাত জুদি বিঝুমেলা পরে সালে দেরগাঙর বাঘেইসুরি আদামর হন’ চাঙমার তিবুরাত বিঝুমেলা অহ্র গরি হিয়েত হন’ ব’ ন লাগে।

২) চাঙমা সুধোমর বে’ক ধেলাগুন তিবুরা বিঝুমেলায় লেহ্বেই ন পারে। জেমন, হন’ বিঝুমেলাত আমি ঝরা গীত, উভো গীত, ওলি গীত, ধুদুক বা’না, হেঙগরঙ বা’না বা পত্তি খারার জিদেজিত্যে ওয়ে গরি ন শুনিই। জার ফলে, তিবুরার বিঝুমেলাগানে চাঙমা সুধোমরে আরকানি মজিম বা’ক ধরি উজেই ন নেজেনেই, হনক্কান বিঝুমেলা বানা তার আরকানি গরিয়ে হয়েক জনর গমপানা-নপানা মজিম চাঙমা সুধোমরে ফগদাঙ গরি এঝের।

৩) জেহেতু রেজ্য হাবার বিঝুমেলা, সেনত্যেই সুওত রেজ্যর বেঘত্তুন দোল নব্ভাচ গোচ্ছে জিনিচ্চানি লুহ্ঙিবাল্লোই হধা এল। মাত্তর তিবুরা রেজ্য হাবর বিঝুমেলা হন’ হন’ বিঝুত এমনো দেঘা জেয়ে তার ধক, হন’ থুমোথুমি আদামর কামসিরিত্তুনো অদ্দরম।

৪) তিবুরা বিঝুমেলার কামসিরিগানির অজন আ অক্ত, আরকানি নানুগুনেই আন্দাচ গরি ন পারন, সেক্কে চেয়েগুনে। সেনত্যেই হা নাচ হক্কে, হা গীত হক্কে, রেত হয়ভো সঙ প্রোগ্রাম চলিবো – বে’ক থায় ঈজেবর বারে। জার ফলে অক্তে অক্তে প্রোগ্রামে রেদে ন হুলোই আ ধগে ন অলে সময় কাদেবাত্যেই অনেগরে বলে বলে থেলি থেলি স্টেজত তুলি দ্যে পরেগোই। ইয়েনি বে’ক আমার দি চোঘে দেঘা।

এ বেক পগরাগানি তুনিবেত্যেই রেজ্য হাবর বিঝুমেলা জে মুক্খ্যে হুচ বারেবাত্যেই জার পারাপাঙ হামত লাগিবো। তবে তা পিঝেদি জে খরচ আ জুক্কোলানি লাগিবো সিয়েনি হোত্তোমান জুগুলেই পারা জেব’ সিয়েনোই বেঘত্তুন দাঙর হধা। এবারত বাচ্ছেই আঘিই বিঝুমেলার আরকানি আ রিবেঙ জধার নানুগুনোর তোকতোক্যে আ কাবিলেনি চাঘি চেবাত্তেই।

মাদি, জুন, ২০১১, ন’ বঝর, নাদা-৬৩

মান্যে, ন মান্যে

লাম্বা-বাধি ভেজালত হয় জন চাঙমার পরান জেয়ে ? মান্যে-নমান্যে ভেজালত হয় জন চাঙমায় পরান দিলাক ? ইজেপ ছাড়া। বানা সংস্কার-অসংস্কার ভেজালত, আরম্ভ অহ্দে-নঅহ্দে, এক্কান বেসরকারী ইজেপ মজিম ইক্কুনু সঙ ২৫ জন চাঙমার পরান জেয়ে। সালে আন্দাচ গরি পারা যায় মান্যে-নমান্যে আ লাম্বা-বাধি ভেজালত হয় জন চাঙমা দালি দ্যে জেয়োন।

আজলে ইয়েনর থুম হুধু ? মারা-মারি গরি হি মারা-মারি থুম অয় ? ইউপিডিএফ মনে গরে সন্তু লারমার জেএসএস জেধক দিন থেব’ সেধকদিন হিল চাদিগাঙর জুম্মোগুনোর দুঘোর দিন থুম ন অহ্ব’। ইন্ধি জেএসএস মনে গরে, ইউপিডিএফ-রে ভিদে ন তুলোনা সঙ দেঝর হাম গমে-দালে গরি পারা জেদ’ নয়। যদি পুঝোর গরা অয়, দুও দলে যদি জাদর হাম গত্তাক চা’ন সালে হেত্তেই এক লঘে বা জুদো গরি জা ধগে তে গরি ন পারন ? এ পুঝোরানর দুও দলর জবাব এগই – আমিদ’ গরিভার চে’ই। তারানা আগে আমা মানুচ্ছুন মারা আরম্ভ গচ্ছোন।

বাংলাধি একখান দাঘ’ হধা আঘে, ইচ্ছে থেলে উবোয় নিহ্গিলে। সালে আমার এগত্তরর পধ হিত্যেই ন নিহ্গিলে ? নাহি আমি নিজেই সে পত্থান নাদি থেই ? তারা একজন মারিলে আমি দি জন মারিই। যদি আমা জে মানুচ্ছো তারা লঘে হোচ্ছে বাঝেয়ে, তারে পিদিদোঙ, সালে হি মারামারি ন থামিলুন ? আঝলে ম হধা মানেদে সিবেরে মুই মানুচ ভাবঙর, আ ন মানেেেদ সিবেরে ভাবঙর এহ্মানত্তুনো অদ্দরম। তে মরিলে আমনর হি, বরঙ তে মরিলে দেচ আ জাদত্তেই গম।

এই যে মারামারির রাজনীতি, নিজে থুম ন গরিলে হন’ দিন থুম অহ্দ’ নয়। আঝলে, আমি মনে গরিই, মারামারি থুম গরিবার মনঝুক গমেদালে একবারো নেজা ন অহ্য়। জিয়েন ওয়ে সিয়েন অহ্লদে, ভেজাল সির নেজেবার তেম্মাঙর আন্দলে নিজো দল্লোরে বলবলা গরিবার চুবুলি। আমি যদি ধরি নেজেই যে, মারদে মারদে ইক্কো দলীর, সে জেএসএস বা ইউপিডিএফ যে হন’ দল ওক, ভেক্কুন শেচ ওলাক, গদা দেঝত ইক্কোয়ো নেই আর, সালে হি ভেয়ে ভেয়ে মারামারি থুম অহ্ল’ ? দরমর’ গরি হোই পারা যায়, না হন’ দিন নয়। বিজক সিয়েন ন হয়। ইক্কুনুর ভেজালান আহ্ত্যার দিনেই থুম গরিলে যেয়ান্যে গরি লাম্বা-বাধি ভেজালর বিজিত্তুন মান্যে-নমান্যে ভেজালর চারা গেজেয়ে, ঠিক সেয়ান্যেগরি মান্যে-নমান্যে ভেজালর বিজিত্তুনো জুদো নাঙে এগই ভেজাল মাধা তুলিবো।

সেনত্তেই, জুদো ধগর সমাধান তোগেদ’ গেলে বাংলাদেচর চরম রাচনীতির সুধোমর লগে শান্তিবাহিনীর সামরিক মানসিকতার মিঝেলে ইক্কুনু যে রাচনৈতিক ধারাবো দেচকুলোত বলবলা ওয়ে সিয়েনরে বদলেবার দরকার আঘে। লগে ইয়েনো মনত রাঘা পরিবো, এক জনে আধু সঙ লামিলে আরেকজনে যদি ফার সঙ ন লামে সালে বুঝিবোঙ ভেজাল সির নেজেবার মনঝুক হারত্তুন নেই।

মাদি, মে, ২০১১, ন’ বঝর, নাদা-৬২

আনক্যা-তঞ্চঙ্গ্যা-দৈংনাক্যা

দেবীপুরোত বিদি গেল’ পলিম বারত্তেই তঞ্চঙ্গ্যা-দৈংনাক্যা মিলনীসভা। সিধু জেনেই জানি পারা গেল’ দৈংনাক্যাঘুন আজলেহ্ তঞ্চঙ্গ্যা। মিলনীসভার তেম্মাঙর রিবেঙ হধাঘান অহ্লদে তঞ্চঙ্গ্যাঘুন চাঙমা অহ্য় না ন’য়। মিলনীসভা আরকানিনানুগুনে পিত্থিমির জিধু জিধু বেচ তঞ্চঙ্গ্যা আঘন সিত্তুন সিত্তুন মুকপাত্তি দাগিবার জুক্কোল গচ্ছোন। মাত্তর মিজোরাম আ আরাকানত্তুন মুকপাত্তি এ’ই ন পারন। জার ফলে তেম্মাঙান ওয়ে বানা দ-সোচ্ছে – তিবুরা আ দেচকুলোর তঞ্চঙ্গ্যাগুনো ভিদিরে।

এবার দেঘা জোক তেম্মাঙত হি ওয়ে। তেম্মাঙত তিবুরার তঞ্চঙ্গ্যাগুনো তপ্পেত্তুন চাকমা সোসিও কালচারে‌্যল অর্গানাজেশনর কাবিদ্যেঙ দেবানন্দ চাঙমা (তঞ্চঙ্গ্যা), দেচকুলোর তঞ্চঙ্গ্যাগুনো তপ্পেত্তুন এডভোকেট দীননাথ তঞ্চঙ্গ্যা আ মধ্যে ‘মাদি’ মুকপাত্তিঘুন। তিবুরার তপ্পেত্তুন জানানি অহ্য়, তারার বাপ-আত্যা-চৌদ্ধ পুরুচ ভেক্কুনে নিজোরে ‘চাঙমা’ ভিলি চিন দি এচ্যন। ইক্কুনু হি কারনে হিল চাদিগাঙ আ মিজোরামর তঞ্চঙ্গ্যাঘুন নিজোরে আলাদা জাত ইজেবে চিন দেধন ? সিয়েন হি বাংলাদেচ সরকারর চাঙমাগুনোরে ভাক গরিনেই রুধুক মরা বানেবার একখান হেরাবর ফল না জুদো হিচ্ছু ?

জবাবে দাঙ্গু দীননাথে জানেয়ে, এ পইদ্যেনে বাংলাদেচ সরকারর হিচ্ছু নেই। বরঙ, তারা নিজে আন্দোলন গরিনেই তারার জাতিসত্বার পরিচয় সরকারত্তুন আদায় গচ্যন। বাংলাদেচ সরকারে তারারে সাংবিধানিক স্বীকৃতি দেদে বাধ্য ওয়ে আ সে মজিম তারা নানান বাবদর কোটার সুজোক-সুবিধেয়ো পাধন।

সুনানু জানেয়ে, পলিম বেলক মন’ঘজা আনক্যা চাঙমাগুনোত্তুনোই নিহ্গিল্লে। এমনকি, চাঙমা রাজা দেবাশিষ রায় আ বিদি জেয়ে অশোক কুমার দেবানদাঘিয়ো নাহি ভিলে তঞ্চঙ্গ্যাগুন জুদো জাত ইজেবে মতামত দুয়োন।

তেম্মাঙত জে তিনান হধা দিনো সান পতপত্যে ওহ্য়ে সিয়েনি অহ্লদেঃ ১) হার দুঝে আমি ভেয়ে ভেয়ে বেলক অহ্লঙ সিয়েন বিজিরেবাত্যেই গেলে দুচ দিয়ে-দি লামা হন’ দিন থুম অহ্দ’ নয়, ২) বাংলাদেচর তঞ্চঙ্গ্যাগুনোর তপ্পেত্তুন ‘তঞ্চঙ্গ্যা’ টাইটেল লেঘা বন্ধ গরানা সম্ভব নয়। হারন সে লঘে সরাসরি আর্থিক লাভালাভর জুক আঘে। ৩) মিলিবার-মিলেবার সাঙুগান পাদা পরিবো আগে আনক্যাগুনোত্তুনোই। জেহেতু বড় ভেইবো তে।

মাত্তর সে আগে, লাগ’ উগুরে হুধি তেঙার পুঝোর জিয়েন, সিয়েন অহ্লদেঃ জিধু পত্থম আগুনান বাচ্যে, সে দেচকুলোর আনক্যাগুনে হি মানিবাক জে আনক্যা-তঞ্চঙ্গ্যা-দৈংনাক্যায় এগত্তর ওবার ঘেচ্ছেক হন’ দরকার আঘে ভিলি ? যদি ন মানন, সালে, আদাম সামালাদে নিজো ঘর ভাঙি ফেলানাগান মুজুঙোর দিনুনোত্তেই হোত্তোমান গম অহ্র সিয়েন ভাবি চেভার হিল চাদিগাঙ’ চাঙমাগুনো সিধু হোজোলি থেল।

মাদি,  এপ্রিল, ২০১১, ন’ বঝর, নাদা-৬১

চুমুলোঙ তেম্মাঙ

চাঙমা হধাত আঘে, ‘পুনোত ঘু থেনেই, মাধাত পানি ধালানা।’ ইয়েনই গরির আমা তিবুরার চাঙমাগুনে ইক্কুনু। আমার রাচনৈতিক অধিকার দিনোদ্দিন লেজাত লামি যাল্লোই, আমার হধা-লেঘা আহ্জি যাঙ যাঙ – সে কিত্যে আমার আমল নেই। আমি অনসুর চুগি থেই হনে হিঙিরি চুমুলোঙ গরের চেবাত্যেই, আ এক্কা বেতিরিক্কে দেলে তারে ‘চাঙমা সুধোম সুম মারেই দিলো’ হোনেই বিজেরত তুলিবাল্লোত্তে। এমনকি তারে আদামত এক ঘাচ্ছে গরিবারো পুদুপাদা চলে।

দেঘা যোক আমা চাঙমা মেলাত চুমুলোঙান আজলে হি। চাঙমা মেলা-জামেয়েগানি গমে রিনি চেলে আমি তিনান হত্থা দেঘিই -১) জরা বানি দেনা, ২) চুমুলোঙ আ ৩) খানা সিরেনা।

এ তিনান হত্থাত্থুন ‘জরা বানি দেনা’গানরে আমি মেলার আঝল হত্থা ধরি পারিই। হারন, যক্কে ‘জরা বানি দিবার উগুম আঘে না নেই ?’ হনার পরে বেঘে হোই উধোন ‘আঘে আঘে’ সুয়োদই নুও বৌ-জামেয়ে তারার জদন ওয়ে গরি দঝর অনুমোদন পা’ন। চুমুলোঙ আঝলে নুও বৌ-জামেয়োর ভালেত বর মাগিনেই পুজো দেনা। ইক্কুনু হন’ জনে হয়ত মনে গরিবো তার পরমেশ্বরী, কালিয়্যে আ নেনাঙ্যেরে পুজো দিলে তার মুজুঙোর দিনুন গমে হাদিবো আ হন জনে হয়ত মনে গরিবো তার মঙ্গল সূত্র শুনিলে গম অহ্ব’। সিয়েন তারে আমিদ’ বলে বলে বিশ্বেচ গরা বাজেই দি ন’পারিই।

বেঘত্থুন ডাঙর হধা, আমি চাঙমাঘুন শাক্য জাদর মানুচ হোলেই, সে ঈজেবে হন জনে যদি তা জামেয়ে বৌদ্ধ মতে গরে আমি তারে হন’ দিন গর দি দিন’পারিই। তে যদি কালী পূজো গরিনেই মেলা সিরেদ’ সালে হিঝু হধা থেলুন। তবে ইয়েনো ঠিক যে, হন’ জনে যদি ঘেচ্চেকগরি কালী পূজো গরিনেই মেলা গরেধে অহ্য়, সালে চাঙমা সুধোম দিন-রেত চুগি থেয়েগুনে হিচ্ছু হোভাক গরি আমার মনে ন’ অহ্য়। যদি হোধাক, সালে ইক্কুনু যিগুনে হিন্দুগুনো সান মেলা লক্কে নিজোর ঝিরে জাগা-গাড়ী-বাইক-খাট-আলমারী-চেয়ার-টেবিল-সোফা এমনকি রোজেই-বালুচ পজ্জোন্ত দেদন, তারারেয়ো হলাক্কুন। ইগুনেহি চাঙমা সুধোমরে ভারি গরি জোলজোল্যে গরধন ? আ তারারে হি আমা মুরুব্বিগুনে এক ঘাচ্ছে ন’গরন ? যিগুনে বৌদ্ধ ধর্ম মানিনেই মেলা গরধন, তারাধ’ নিজোর ধর্মগানরে অজলত তুলোধন আ যিগুনে ‘পণ প্রথা’ নাঙর ফারাঙীগান আমা জাদর হিয়েত সাজুরাদন তারাধ’ পরেয়ের ফেলেয়ে সেপ ফুদো লিয়েই তুলোধন, তারাহি সিয়েন ভারি দোল গরধন ?

মাদি, মার্চ, ২০১১, ন’ বঝর, নাদা-৬০