এগত্তরর জধা বানেবঙ ফারগর নয়

চাঙমা লেঘাদি তিন মাস্যা সার্টিফিকেট বলাগুনে ‘চাঙমা ভাচ ভালেদি জধা’ নাঙে ইক্কো নুও জধা বানেয়োন। চাঙমা লেঘা জনে জনে শিগোদোক তারার মনঝুক। এর আগে গেল্লে মাহ্জত ‘চাঙমা গাবুচ্যা জধা’ (YCA)-র তিবুরা ধেলা বানানি ওয়ে। শুনো যেয়ে তারা ২০১১-র ভিদিরে গদা তিবুরাত চাঙমা গাবুচ্যা জধার ধেলা বানেবাক। চাঙমা জাদর ভালেত গরানা তারার মনর ধারাচ।

ইন্ধি তিবুরা চাঙমা ছাত্র জধা এতা ভিদিরে মোটামুটি গদা তিবুরার চাঙমা বেচ কলেজচানিত তারার ধেলা বানেই ফুরেয়োন। তারায়ো চাধন জাদর ভালেত গরিভার। সেবাদে আঘন গন্ডাছড়ার সি.এস.সি.ডি.এস. (চাকমা সোসিেেয়া কালচার‌্যাল ডেভেলপমেন্ট সোসাইটি), শান্তির বাজারর সি.এস.সি.ও. (চাকমা সোসিেেয়া কালচার‌্যাল অর্গ্যানাইজেশন), কাঞ্চনপুরর ওয়াই.বি.এস. (ইয়ং বুদ্ধিস্ট সোসাইটি) আ আদামে আদামে নানান চিগোন-ডাঙর জধা, আঘে নুও-পুরোন ক্লাবপানি। বেঘর আহ্ওচ আমা জাদর ভালেত।

বেঘর ধারাচ যদি জাদর ভালেত অহ্য়, সালে আমি এক সমারে হাম গরি পারিবঙনি ? যদি ন পারিই সালে আজলে হি আমি জাদর ভালেত চেই ? আমি যদি বাম ভাক গরিনেই জাগায় জাগায় এগই হাম এক লঘে গরি পাত্তঙ। আদামত যদি দিব্যা জধা থান সালে আমি আদামান দি-ভাক গরিনেই একসঙে হাম গরিলে আর’ বেচ হাম অহ্ব’। এ উজু হধাগান বুঝিলে, মানিলে, তে মানা যায় আমি ঘেচ্চেক গরি জাদর ভালেত চেই।

অনেগে আরক্কান হধা ইয়োত তুলি পারন। হধাগান অহ্লদে – আমি যদি ভেক্কুনে মিলিনেই ইক্কো জধা বানেই পারিই ? হধাগান শুনোদে যেত্তোমান উজু, ঘেচ্চেক গরি গরদে সেত্তোমানই আগাত্যা। ইয়েনর উজু জুওপ অহ্লদে – হন’ জধা যদি ঘেচ্চেকগরি হাম গরদে অহ্য় সালে সিবে লারে লারে ডাঙর অহ্ব’ হামাক্কায়গরি। আ যদি হাম ন গরে সালে সিবে লারেগরি মিলেই যেবগোই। হন জনে যদি হাম ন গচ্যা গরি আঝা গরে তা জধাবোত দুনিয়ের বেক চাঙমাঘুন এগত্তর ওহ্বাক্কি, সালে তার চাঙমাগুনোরে ‘পাল্লাত তুল্যা বেঙ’ ভিলি বন্নাম তাঙেই দেনা বাদে হন’ পথ নেই।

সেনত্যায় নিজো জাত্তোরে বন্নাম ন গরি, অন্য বেক জধাগুনোর সমারে আহ্দে-আহ্ত ধরা-ধচ্যা গরি হাম গরানা। সমার এক জন পেলে এক জন্নোই, দি জন পেলে দি জন্নোই ন জিরেয়ে গরি হাম গরানা। হামে আমারে এগত্তর গরেব’ – হামে আমারে ভালেত আনি দিবো।

মাদি, জানুয়ারী, ২০১১, ন’ বঝর, নাদা-৫৮

Advertisements

এগত্তরর তালিক তোগানিত

এগত্তরে বাজন, ফারগত মরন – হধাগান যুগে যুগে বে’ক জাদর আর্য্য মানেইয়ুনে হোই যেয়োন। এই সময়ত বে’ক হিঝু যেক্কে আমা ধগর চিগোন জাত্তুনোর সাদাঙা, সেক্কে বাজিবের এগাতারা দারু অহ্লদে আহ্দে-আহ্ত ধরি বুকপাদি ঠিয়েই উধোনা।

মাত্তর ….. আমি ভালক ভুলোনত্থুন ধরি দেঝে-বিদেঝে ছিদি পচ্ছেই। সেনে সেনে ভাক ওয়েই আনক্যা, তোঙতোঙ্যা, দৈংনাক্যা। বাংলাদেচ্যা, তিবুরা কুল্যা, মিজোরাম্যা, অরুনাচল্যা। লারে লারে রেগাভুও পুঘে খার, মনর বান সজ অহ্র। মঘর, মুজুরমানর, বাঙালর, মিজোর ছাবাত্তলে থাগদে থাগদে নিজর আরাঙ ধক্কান হেধক্যা এল’ সিয়েন শুনিলে পশ্চনর সান লাগে। পর মানুজে নিজোর জাগাত তেঙেরা বেড়ি দিলাক। রেদোর ঘুমোত আহ্মত্তল ভাজেই দিলাক গধা পানিয়ে। শুনো যার দেঝকুলোর খাগাড়াছুড়ি জেলার হন’ হন’ বামর চাঙমাঘুন ভিলে ইক্কুনু খৃষ্টান অহ্দন। পাধা-পাধিগরি ধুনো-ধুনি চলে অনসুর। ….. ফারগর অসুখ ভালক বাবদর। মাত্তর দারু ?

এক্কা এক্কা গরি আমিয়ো হোচ্চের। প্রধীর তালুকদারে রেগা বানেয়ে ভারত-বাংলাদেঝে। রঞ্জিত দেবান, জ্যাসিদাঘির গীদো র’ ঈধু সঙ লুঙিলগি। বীরব্রত বানিলো ধর্মর রেগা। নন্দপাল ভান্তে লুঙেই দিলঘি বনভান্তের ধর্ম সদক। অনিরুদ্ধ বানিলো চাঙমা লেঘার বান মিজোরামর লঘে। জয়ন চাঙমার বলাবলে চাঙমা লেঘা ইক্কুনু আমার আঙুলো মাধাত। বৈদ্যনানুদাঘির হরলা বইয়র পাদাত্থুন কম্পিউটারর ঝকঝক্যা স্ক্রীনত। যেন আহ্জার আহ্জার বঝর পুরোনী মিশরর মমি সোরান পেল’ পোতপোত্যা বেলর সদগত। যিয়ে, যিয়ে হোই পায় ‘মাত্তর …. এঝ’ ভালুদ্দুর পধ বাগি …..।’

বাত্তো পেঘে খবর দিলো চাঙমা গাবুচ্যা-গাবুরী জধা বদদন। মিজোরামর চাঙমা গাবুচ্যা জধার ধেলা লুঙেল্লি তিবুরা সঙ। ধেলায় শিঙোর গারেই পারিবঘি ধ ? দ’সোচ্ছে ঘর সামালাদে গিরিভো দরমর’ লাগে। পিজোরর হধা সিঙোবার তেম্মাঙরে লঙেদ’ চায়। পরেধি আমি যাতে হোই ন’পেই, মানে-সম্মানে বেলক অহ্নাগান ভালা এল। ইন্ধি শুনো যার গদা পিত্থিমির তোঙতোঙ্যাগুনো এক গুধিত বজিনেই এগত্তরর তালিক তোগেবাক। তোগেই পেভাকনি ?

মাদি, ডিসেম্বর, ২০১০, আট্য বঝর, নাদা-৫৭

চাঙমাগুনোর পালেবার দিন

পত্তি জাদর নাঙহিনি পারে পারা হয়েকজন মানুচ থান, যিগুনে তারার নিজর গুনে বানা নিজর ঘোরবোর/হুদুম্মোর/আদাম্যার ন থান। কাবিল হাম আ অঝার বুঘোর গুনে তারা ওহ্ই উধোন জাদর পত্তি মানুঝোর সদর হুদুম। সিগুনোর হধা জাদর পত্তি জনে জনে বার বার ঈদোত তুলোন। আর এধেক্কেয়ো হয়েকখান ঘটনা থায়, সুঘোর বা দুঘোর, যিয়েনি তারা পুরি ফেলেই ন’ পারন। বঝর ঘুরি সে দিন্নো এলেই বেঘর মনত আভর খায় সে দিন্নোর কধা। সে মানুচ্চুনোরে, সে ঘটনাগানিরে ঈদোত তুলোনাই অহ্লদে দিন পালানা।

এ দিন পালানার মধ্যেদি ইক্কো জাদে তার নিজস্বতা তোগেই পায়। জাদর হজমাগুনে, যিগুনে একদিন জাদর পাত্তলী ওহ্বাক তারা জাদর আগরির লাড়েইয়র বিজকর লঘে চিনপচ্য অহ্ন। ইক্কো জধার কর্মী গঠন গরদে অনসুর কামসিরি বাদেয়ো এবাবদর দিনুন পালানা অমহদ’ দরকার। গেল্লে ১৩ সেপ্টেম্বর ২০১০ পেজাত্তলত যে গদা তিবুরা চাঙমা ছাত্রগুনোর তেম্মাঙ ওয়ে সুওত তারা চাঙমা গুনোর হয়েক্কো দিন পালেবাক ভিলি এগেম গচ্ছোন। সে দিনুন লোনেই এচ্চের তেকহাবা তেম্মাঙান।

১. চাঙমা লেঘা দিন (৫ জানুয়ারী) : ২০০৯ সনর এ দিন্নোত ফাঙ ওয়ে তিবুরা চাঙমা ছাত্র জধা আ উদন্ধি সদকর আরকানিত আ মিজোরামর সিএডিসি আ তিবুরার ট্রাইবেল রিচার্স ইন্সটিটিউট-র বলাবল্যাত তিনমাস্যা চাঙমা লেঘার সার্টিফিকেট কোর্স। এ দিন্নোত্তুন ধরি তিবুরাত চাঙমা লেঘা লারচার গঙার ওয়ে, জয়ন চাঙমার আহ্ত ধরি তিবুরাত সোম্মেগি চাঙমা লেঘা সফট্ ওয়্যার। এ দিন্নোয় তিবুরা আ মিজোরামর চাঙমাগুনোর মধ্যে ইক্কো সোনারেগা বানেই দিয়ে।

২. আন্তর্জাতিক মা-ভাচ দিন (২১ ফেব্রুয়ারী) : এ দিন্নো ইউনেসকোর গঝি লোয়ে দিন। এ পইদ্যানে বেঘে খবর পা’ন। সেনত্যায় নুও গরি আর তুলোপারা গরা ন’অহ্ল’।

৩. রাধামন-ধনপুদি দিন (ফাগুনো পুন্নিমা) : রাধামন-ধনপুদি চাঙমা জাদর পোচপানার চিন্নক। ইরুক যুগোর লঘে তাল মিলেনেই, হজমা তম্ভাবোরে পরর আচ্চারাত্থুন আলক রাগেবাত্যায় ঠধষবহঃরহবং উধু বাবদর এ দিন্নো। রাধামন-ধনপুদির নাঙে হন দিন্নো পালেই পারা যায় সিয়েন বজক ঘাদিনেই এভসঙ ঠার গরি পারা ন’যায়। সেনত্তেই গেঙখুলিনানুদাঘির ‘ফাগুনো আহ্বানে ফিরিলো …’ হধাগান ঈদোত রাঘেই এ দিন্নো ঠিক গরা ওয়ে।

৪. শিব চরন দিন (১ জুলাই) : আদিকবি শিবচরনর নাঙে ইক্কো দিন পালেবার দরকার আগেধে হধাঘান ভেক্কুনে খাম খান। মাত্তর জাতগরি তা পইদ্যানে হন’ তারিখ এভ’ সঙ ঠায়ঠিক গরি পারা ন’যায়। তালাভিনানুগুনোর মতে ১১ আষাঢ় দিন্নো শিবচরনর জনম দিন, ফগির ওহ্ই নিগিলি যেবার দিন আ লুক দিবারো দিন। ঈজেপ গরিলে এ ১১ আষাঢ়বো মোটামুটি ১ জুলাই পরে। সেনত্তেই এ দিন্নো লুও ওয়ে। এজেত্তে দিনোত শিপচরনর পইদ্যানে আর’ তালাভি গরি গমে জানি পারা গেলে সেক্কে এ তারিক্কো সোর গরিলেয়ো গরি পারা যায়।

৫. আর্ন্তজাতিক আদিবাসী দিন (৯ আগস্ট) : ইভে জাতিসংঘর খামখেইয়ে গদা পিত্থিমিত পালান্নে দিন। ইভে পালানায়ো জদেপদে দরকার আঘে।

৬. অভিক কুমার জনম দিন (৩ সেপ্টেম্বর) : সুনানু অনিল বরন চাঙমা লেখ্যে ‘‘চাঙমা কধা চাঙমা গীত, শুনিলে মর জুরায় চিৎ’’ আ এ চাঙমা গীদর হধা ঈদোত উদিলে যা নাঙান ঈদোত উধে তে অহ্লদে সুনানু অভিক কুমার চাঙমা। আমি যনি সংস্কৃতির বামত্তুন হন জনরে বঝরপত্তি ঈদোত তুলিভার চেই সালে একমাত্র অভিক কুমারই ওহ্ই পারে সিভে।

৭. উধুবলী দিন (৩ অক্টোবর) : বাবদর বাবদর দিন আমার দরকার পালেবাত্যায়। খারার হধা যদি উধে সালে হন দিন্নো আমি পালেবঙ ? সে জঘার আমার হন’ জন নেই যা নাঙে আমি দিন পালেই পারিই। পুরোনী বুড়ো-বুড়ির মুওত্থুন শুনো যায় হয়েক জন বলীর হধা – উধু বলী, হজ্জাল বলী আর’ নানান নাঙ তারার। সালে সিগুনোর একজনর নাঙে খারার পইদ্যানে ইক্কো দিন পালেলে হেঝান অহ্য় ? সে বাবদরই এগেম ‘উধুবলী’ দিন্নোর।

৮. এম. এন. লারমা দিন (১০ নভেম্বর) : নানান জনে নানান হধা তুলিলেয়ো যদি পুঝোর গরা অহ্য় চাঙমা জাত্তো উগুরে হার রাজনৈতিক প্রভাপ বেঘত্তুন বেচ সালে এক হধায় বেঘে খাম খেবাক সিভে মানেবেন্দ্র নারায়ন লারমা। সালে রাজনৈতিক ব্যক্তিত্ব হন’ জনর নাঙে যদি আমি দিন পালেবার চেই সালে এম. এন. লারমাত্তুন অজল হন’ জনরে দেঘাই ন’ যায়। মাত্তর পারাপাঙ মান্যে/নমান্যে হধাগান চিগোন গরিনেই তার গদা জিঙহানির হামর অঝারান তুলি ধরিভার চেলে আমি (মানে ভারদর চাঙমাগুনে) তার শহীদ দিবসর বদলে জনম দিন পালেই পারিই। যেমন মহাত্মা গান্ধীরো শহীদ দিনর বদলে জনম দিন পালন গরা অহ্য়।

৯. সিএসএ দিন (১৯ নভেম্বর) : ২০০১ সনর এ দিন্নোত, আমার যে জধাবোর নাঙ এচ্চে গদা ভারদত সিদি যেয়ে, সে জধাবোর বিজি আগরতলাত লাগেয়োন আমার হয়েকজন হাম্মো বড় ভেই – বড় ভোনে। তারার হয়েক জন ওহ্লাক কৃতক চাঙমা, সনৎ দেওয়ান, জগৎ জ্যোতি চাঙমা, বরুন চাঙমা, নীল কান্তি চাঙমা, শান্তি রঞ্জন চাঙমা, তবনা চাঙমা, অমিতাভ চাঙমা, সুমঙ্গল চাঙমা, লিপি চাঙমা, সিঞ্চন চাঙমা (ইক্কু নেই), জীননানন্দ চাঙমা, সুজয় চাঙমা, শৈলেখা চাঙমা, বর্ণালী চাঙমা, জুনিকা চাঙমা, মিনতি চাঙমা আ আর’ অনেগে। তারারে আমি এ দিন্নোত পাত্তুরুতুরু জানেবঙ আ খাম খেবঙ – তারার দেঘেয়ে পধ ধরি আমি এগত্তরে আক্কোই যেবঙ। চাঙমা জাদর অধিকার আদায়র লাড়েইয়ত আমি হন’ দিন পিঝেধি ন লামিবোঙ।

১০. ননা হাজি দিন (৫ ডিসেম্বর) : চাঙমা জাদর বিগিধি-হিরিমিরির চিন্নক ননাহাজি। ইরুক যুগোর এপ্রিল ফুল্স ডে সান গরি এ দিন্নো গঝি লুও ওয়ে। মাত্তর ননাহাজির পইদ্যানে হন’ বিজগী মাজারা তোগেই সুগ ন’ পেভার কারনে উজু উজু ইক্কো দিন ফেলা ওয়ে – ৫ ডিসেম্বর। তা পইদ্যানে হন’ সুনানুয়ে যদি হন’ বিজগী তারিখ আমারে জানেই পারন সালে পাত্তুরুতুরুর সমারে আমি সিভে গঝি লভঙ। এ দিন্নোত আমি সমাচ্যা-সমাচ্যার মধ্যে বিগিধি এসএমএস পাধা-পাধি গরি পারিই। হন’ হন’ জাগাত গপ দিবার জিদেজিত্যা গরি পারিই।

উগুরোর দিনুনোর পইদ্যানে নানা জনর নানান বাবদর মতামত থেই পারে । মাত্তর আমাত্থুন ঈদোত রাঘা পরিবো যে ইয়েনই শেজ হধা নয়, ইয়েনদ’ বানা শুরু অহ্লদে।

মাদি, অক্টোবর, ২০১০, আট্য বঝর, নাদা-৫৫