Chakma Customary Law-2011

This is the 2011 edition of Tripura Chakma Customary Law prepared on the basis of 1998 edition of the same. Though, Tripura State Chakma Samajik Panchaye Parishad had adopted a new version in its Ehde Gumet conference held on 12th & 13th May, 2018, but it is good to study till now to trace evolve of our social movement. 

Here is the pdf version of the same 

Advertisements

জাদর পরান আদামত

 

জাদর পরান আদামত,
তজিম চাঙমা আদাম,
তজিম চাঙমা জাত।

ও আমা আদামান, আমা পরানান
আমার আহ্ওজোর গেদি সাগিনান।

চেরোপালা ঘিরি আঘে তারে এহ্ল তারুমান,
হরত বঝেই রাঘেয়ে তারে প’ন সোরাগান,
ভুয়ে-জুমে ভরন-ভিরোন হন’-হিচ্ছু নেই পরা,
ধানে-চোলে তোন-পাদে বেঘর আঘে ঘর ভরা।

সঙ মধ্যে আদাম’ পরান আমা হিয়োঙান,
আঘে আর’ তা হুরে আমা ইসকুলান,
হিয়োঙত জেনেই বেন্যে-বেল্লে বুদ্ধরে পুজিয়োই,
ইসকুলোত জেনেই পোরভুওলগে লেঘা শিগোন্নোই।

বেঘেমিলি আমা আদামান তজিম বানেবঙ,
সেজান গরি আমা জাত্তো তজিম বানেবঙ।

অক্টোবরর ৮ আ ৯ রেজ্য হাবর মিলনিসভা – চাঙমা কাস্টমারি ল লোনেই তেম্মাঙ

মাধব মাস্টর আদাম ঃ অজিত কান্তি চাঙমা, নলিলাক্স চাঙমা আ অনিরুদ্ধ চাঙমা ঃ চাঙমা কাস্টমারী লভুও সোর গরিবেত্যেই ১৩ আঘস্ট ২০১১ মনুগাঙর মাধব মাস্টর আদামত আগরির এমএলএ অনিল চাঙমার সভানানুগিরিত এক্কান মিলনিসভা বিদি জেয়ে। তেম্মাঙত সময়র নাগানাক্যে আ শিলেসুরি, ঝরঝরি, গন্ডাসরা আ শান্তির বাজারর মুকপাত্তিঘুন গারির অনতিত্যেই জুক দি ন পারিবাল্লি হারনে মিলনি সভাত বানা তেকহাবা তেম্মাঙ ওয়ে। ঠিক গরা ওয়ে এজেত্তে অক্টোবরর ৮ আ ৯ তারিখ বিরেতগরি গদা তিবুরাত্তুন দাগিনেই এগই জাগাত মিলনিসভা গরা অহ্ব’।

সে পইদ্যেনে অনিল চাঙমারে সভানানু, নিরঞ্জন চাঙমা আ বভ্রু বাহন চাঙমারে এজাল সভানানু বানেনেই ১৫ জন্যে ইক্কো দাগনিদিয়ে জধা বানানি ওয়ে। সুওত বাগি চাবাঙিঘুন ওহ্লাক্কে এমএলএ অরুন কুমার চাঙমা, শোভা রঞ্জন চাঙমা (কাঞ্চনপুর), আনন্দ মোহন চাঙমা (তুইচাঙমা), অশোক মিত্র হারবারি (মাধব মাস্টর আদাম), কাকলি চাঙমা (আগরতলা), পদ্ম রঞ্জন চাঙমা (ছমনু), দেবানন্দ চাঙমা (দেবীপুর), সুমন্ত সেন চাঙমা (গন্ডাছড়া), ললিলাক্স চাঙমা (ঝরজরি), কমল কিশোর দেওয়ান (শিলেসুরি), জগৎ জ্যোতি চাঙমা (তিলকপারা) আ মনোরঞ্জন চাঙমা (নবীনসরা)।

এতা ভিদিরে পত্তি চাগালাত কাস্টমারী লভুও ভাক গরিদ্যে অহ্ভ’ আ তারা চাগালা ভিদিরে তেম্মাঙ গরিনেই হি হি সোর গরা পরিবো, হি হি ভরা পরিবো আ হি হি বাদ দ্যে পরিবো থিক গরিভাক। সে থিক গোচ্ছে সোর গরানিগানি সে চাগালার মুকপাত্তিগুনে মিলনিসভাত তুলি ধরিবাক্কি।

তিবুরার উপজাদিগুনোর সুধোম বেইয়ে বিজের আরুক্কানি সরকারীধগে গঝি লোভার আরকানির জুক্কোল ইজেবে কাস্টমারী ল কোডিফিকেশনর হাম আরম্ভ গোচ্ছে এডিসি। রিদি-সুদোমানি সাগি-তুনি বই-ধক বানেনেই গৌহাটির ল রিচার্স ইন্সটিটিউটত গঝা পরিবোগোই। তারা সুওত ভারত-সংবিধেনর উগুধো হন’ হিচ্ছু আঘে নেনা, গুরো আ মিলেগুনোর গা-রোখ্যে অজন মজিম আঘে নেনা আ নানাক্কান নিমোন গরি বিজিরেনেই তলবিচনামা দিবাক আ তারার তলবিচনামা ইঁ-বাবত্যে পেলেহ্ এডিসি কাস্টমারী ল-ঘুন বিল বানেনেই গঝি লোভার আরকানি নেজেব’।

এ আহ্বালত চাঙমা কাস্টমারী লভুও ঝাদিমাদি সোর গরিভার এগ’ পরা দরকার এই পোচ্ছে। মাত্তর খবর লোনেই জানা জেয়ে তিবুরা চাঙমা সামাজিক রেজ্য পঞ্চায়েত পরিষদর সভানানু এমএলএ অরুন কুমার চাঙমা নিজেয়ো খবর ন পায় চাঙমা কাস্টমারী ল ভুও, জিভে ১০-১১ বঝর আঘে লেঘা ওয়ে, সুওত হি আঘে। বার বার মাঘানা সত্তেয়ো তারে হন’ জনে ইক্কো কপি ন দুওন।

গেল্লে ৬/৭ বঝর ধরি তারা এক বারো চিগোন এক্কান তেম্মাঙদো বঝি ন পারন। গদা তিবুরাত চাগালা পঞ্চায়েত আ ষুলয়ানী পঞ্চায়েত বানেবার হন আরকানি নেই। একমাত্র দেরগাঙ বাদে তিবুরার হন’ চাঙমা বামত চাগালা পঞ্চায়েত আ ষুলয়ানী পঞ্চায়েত নেই। রেজ্য পঞ্চায়েত পরিষদর আদাম পঞ্চায়েত্তানির হন’ র পা’পি নেই। জার ফলে আদাম পঞ্চায়েত্তানি তারার মনে মনজক্কা বিজের গরন, রেজ্য পঞ্চায়েদর সম্মেলনত গঝি লোয়ে সিদ্ধান্তর উগুধো হাম গরন, এক ধাল্যে বিজের গরন, আদামর চিগোন চিগোন জাগুলুক্কানিয়ো পাধি ওফিসত তানি নেজান আ এক-এক্কো আদাম পঞ্চায়েত ন বদল্লে গরি ৮-৯ বঝর ধরি হাম গরধন। ইয়েনিয়ে চাঙমা জাদর বেঘত্তুন বলবলা জধাবো মরামরা বানেয়ে আ মানুঝোর বিশ্চেজো চাঙমা সামাজিক পঞ্চায়েদর উগুরে দিন দিন হমি জার।

এ আহ্বালত জেক্কে চাঙমা গাবুচ্যে জধা (YCA)-র মুকপাত্তিগুনে মুরুব্বিগুনোরে ঝাদিমাদি কাস্টমারি লভুও সোর গরিভার প্রস্তাপ দুওন, তারা বেচভাগে মতামত দুওন, ইক্কুনু জেয়ান্নে ওহ্ক এডিসিরে পাশ গরিবেত্যেই দেনা আ পরেধি সোর গরানা। চাঙমা গাবুচ্যে জধার মুকপাত্তি অনিরুদ্ধ চাঙমা গেল্লে ৬ আগস্ট খুমুলুঙত এডিসির সিইএম রনজিত দেববর্মালোই হধা হোনেই জানি পাচ্ছে, কাস্টমারী লভুও গমে সোর ন গরিলে (মানে ইন্ডিয়ান পেনাল কোর্ডর লঘে মিলেনেই আ গুরো-মিলেগুনোর গা-রোখ্যে রাগেনেই) গৌহাটির ল রিসার্চ ইন্সটিটিউটে তলবিচনামা দিবার জু হম আ এক বার এডিসি-ত পাশ অহ্লে সিবে সোর গত্তে ভালক্কানি ঘদর-মদর গরা পরিবো। সেক্কেনে চাঙমাগুনে, এমনকি এডিসিয়েয়ো সিবে মনে-মনজক্কাগরি সোরগরি পাত্ত নয়। সেক্কেনে সোর গরিভার প্রস্তাপ্পানি চাঙমা জাদর তপ্পেত্তুন গৌহাটির ল রিসার্চ ইন্সটিটিউটত গঝা পরিবোগোই আ তারা সিয়েন দোল মনে গরিলে তে এডিসি আহ্দত জমা দ্যে গরিবেঘি। সেক্কে এডিসিয়ে সোর গরানি প্রস্তাপ অধিবেশনত তুলিভাক আ অধিবেশনত সোরগরানি প্রস্তাপ পাশ অহ্লে তে সিয়েনি সোর ওয়ে ভিলি মানা অহ্ব’। সে আহ্বালত পর’ আহ্দত আমা কাস্টমারি লভুও গঝানি অহ্ব’ নেনা সে পইদেনেয়ো অনেগে হধা তুলধন।

মাদি, আঘস্ত, ২০১১, ন’ বঝর, নাদা-৬৫

চুমুলোঙ তেম্মাঙ

চাঙমা হধাত আঘে, ‘পুনোত ঘু থেনেই, মাধাত পানি ধালানা।’ ইয়েনই গরির আমা তিবুরার চাঙমাগুনে ইক্কুনু। আমার রাচনৈতিক অধিকার দিনোদ্দিন লেজাত লামি যাল্লোই, আমার হধা-লেঘা আহ্জি যাঙ যাঙ – সে কিত্যে আমার আমল নেই। আমি অনসুর চুগি থেই হনে হিঙিরি চুমুলোঙ গরের চেবাত্যেই, আ এক্কা বেতিরিক্কে দেলে তারে ‘চাঙমা সুধোম সুম মারেই দিলো’ হোনেই বিজেরত তুলিবাল্লোত্তে। এমনকি তারে আদামত এক ঘাচ্ছে গরিবারো পুদুপাদা চলে।

দেঘা যোক আমা চাঙমা মেলাত চুমুলোঙান আজলে হি। চাঙমা মেলা-জামেয়েগানি গমে রিনি চেলে আমি তিনান হত্থা দেঘিই -১) জরা বানি দেনা, ২) চুমুলোঙ আ ৩) খানা সিরেনা।

এ তিনান হত্থাত্থুন ‘জরা বানি দেনা’গানরে আমি মেলার আঝল হত্থা ধরি পারিই। হারন, যক্কে ‘জরা বানি দিবার উগুম আঘে না নেই ?’ হনার পরে বেঘে হোই উধোন ‘আঘে আঘে’ সুয়োদই নুও বৌ-জামেয়ে তারার জদন ওয়ে গরি দঝর অনুমোদন পা’ন। চুমুলোঙ আঝলে নুও বৌ-জামেয়োর ভালেত বর মাগিনেই পুজো দেনা। ইক্কুনু হন’ জনে হয়ত মনে গরিবো তার পরমেশ্বরী, কালিয়্যে আ নেনাঙ্যেরে পুজো দিলে তার মুজুঙোর দিনুন গমে হাদিবো আ হন জনে হয়ত মনে গরিবো তার মঙ্গল সূত্র শুনিলে গম অহ্ব’। সিয়েন তারে আমিদ’ বলে বলে বিশ্বেচ গরা বাজেই দি ন’পারিই।

বেঘত্থুন ডাঙর হধা, আমি চাঙমাঘুন শাক্য জাদর মানুচ হোলেই, সে ঈজেবে হন জনে যদি তা জামেয়ে বৌদ্ধ মতে গরে আমি তারে হন’ দিন গর দি দিন’পারিই। তে যদি কালী পূজো গরিনেই মেলা সিরেদ’ সালে হিঝু হধা থেলুন। তবে ইয়েনো ঠিক যে, হন’ জনে যদি ঘেচ্চেকগরি কালী পূজো গরিনেই মেলা গরেধে অহ্য়, সালে চাঙমা সুধোম দিন-রেত চুগি থেয়েগুনে হিচ্ছু হোভাক গরি আমার মনে ন’ অহ্য়। যদি হোধাক, সালে ইক্কুনু যিগুনে হিন্দুগুনো সান মেলা লক্কে নিজোর ঝিরে জাগা-গাড়ী-বাইক-খাট-আলমারী-চেয়ার-টেবিল-সোফা এমনকি রোজেই-বালুচ পজ্জোন্ত দেদন, তারারেয়ো হলাক্কুন। ইগুনেহি চাঙমা সুধোমরে ভারি গরি জোলজোল্যে গরধন ? আ তারারে হি আমা মুরুব্বিগুনে এক ঘাচ্ছে ন’গরন ? যিগুনে বৌদ্ধ ধর্ম মানিনেই মেলা গরধন, তারাধ’ নিজোর ধর্মগানরে অজলত তুলোধন আ যিগুনে ‘পণ প্রথা’ নাঙর ফারাঙীগান আমা জাদর হিয়েত সাজুরাদন তারাধ’ পরেয়ের ফেলেয়ে সেপ ফুদো লিয়েই তুলোধন, তারাহি সিয়েন ভারি দোল গরধন ?

মাদি, মার্চ, ২০১১, ন’ বঝর, নাদা-৬০