ধক আ মাজারা

ইক্কো জাদর তুগুন সম্পত্তি তার ধক আ মাজারাগানি। আহ্জার আহ্জার বঝর ধরি ইক্কো জাদত জনম লোয়ে পোতপোত্যে মানেয়ুনোর ফুদো ফুদো মেহ্ত এগত্তর ওহ্নেই জনম লয় ইক্কো জাদর ধক, হাচ্যেক আ মাজারা। ইক্কো জাদর পরানঘর হোই পারা জায় জার জার এ মাজারাগানি।

মাজারা বাজেই রাঘানার লারেই ইক্কু আমার আঝল লারেই। আমা জাগাগানি আ সিয়েনির নাঙ, নাঙত্তলে সমি থেয়ে বিজক্কানি, আমা হধা – তার ঘাচ্চারা আ লিগিভার অহ্রক্কুন, আমা পিনোন, হাহ্দি, হবঙ, সিলুম, আমা উভোগীত, ওলিগীত, ঝরাগীত, তান্যেবিগীত, আমা ধুদুক, হেঙগরঙ, শিঙে, বাঝি, আমা বনভান্তে, মানবেন্দ্র লারমা, হালিন্দি রানী, শিপচরন, পেথ্যে ফগির, আমা হেবাঙ, হোরবো, গোরাম, গুদেয়ে, তাবাদ্যে, তেলদ্যে, পোগোনোতদ্যে, সেক্কে, পুচ্চে – ইয়েনি আমা জাদর পরানর এক-এক্কো হোলোই। ইয়েনি লুগেই জানা মানে চাঙমা জাত লুগেই জানা।

আমা জাদর সম্পত্তিগানি সিদি পোচ্ছে নানান বামত নানান ধগে – মিয়ানমারত, ভারদত, বাংলাদেঝত, দৈঙনাক্যেত, তোঙতোঙ্যেত, আনোক্যেত – ইয়েনি ভেক্কানি বাজেই রাগেবাত্যেই একজমালে বালা ধারাধারিগরি গিল দিবার হামত লামা পরিবো। ন অহ্লে গায় গায় হন’ জনে বুরেই ন এভঙ।

জাদর মাজারা বানানা আ আগেধে মাজারাগানি বাজেই রাঘেবার হামত বিঝুফুল বেঘর সেপবত্তা আ বলাবল লোনেই লেবেদেই আঘে ১৩ বঝর ধরি। দুমুরি ন পারিলেয়ো চিগোন চিগোন হুচ ফেলেই আমি আক্কোই জের নিরঘন্দি গরি। আমার আঝা একদিন আমি সাল্যেঙত লুঙিবঙ্গোয়ই।

বিঝুফুল, নাদা-১৩, বিঝু-২০১৩

Advertisements

বিঝুমেলা-২০১১

বঝর পত্তি বিঝু মেলা যদি আমি তিবুরার চাঙমাগুনে ন গত্তঙ সালে পারাপাঙ আমা সুদোমর ভালোক্কানি দোল দোল জিনিচ আহ্জেই ফেলেলঙন। বিঝু মেলাত আমি জানিই ন জানিই নাজিই, পারি ন পারি গিত গে’ই। তুও আমার নাচ-গীত বাজি থোক, বলবলা ওহ্ই উধোক – এ ধারাজে। গদা বঝরবো ক্রিকেট-ফুটবল আ নানাক্কান বেজাদি খারালোই লুদুপুদু গরি থেনেই বঝর’ শেজত এক বার অহ্লেয়ো সিদেন’ হোনা বিজিরেই নিহ্গিলেই আমা ঘিলে-নাদেঙুন। মা-ভোনুনে পিনোন পিনোন-খাদি। চান্দা-ভিক্কে গরি, সিলুমোর জেপ বিজিরেই বিজিরেই অহ্লেয়ো ছাবেদঙ চেই ইক্কো চাঙমা বই। গিত গেয়েগুনেয়ো লাভ-লোকসানর হধা পিঝেদি লুঙিমারি চাঙমা জিঙহানির ধারাচ পুরোন ইক্কো গিদোর সিডি ফগদাঙ গরি। বিঝু দিনোত আমা সিধু হাক্কনত্তেই অহ্লে লতা-কিশোর-কুমার সানু ডাগিত্তুন ডাঙর অহ্য় অভিক কুমারে।

বিঝু মেলার হালে­াংঙো আমি যদি আ এক্কা ডাঙর গরিই সালে বানা নাচ-গিত নয় জুদো দরকারি জিনিচ্চানিয়ো আদিবো অহ্লে! যেমন ইক্কু বিঝুরে মুজুঙে লোনেই গদা পিত্থিমির চাঙমা গুনোর মিলিবার এক্কান জাগা বানেবার হধা চিদে গরা অহ্র। দিল­ী, কোলকাতা আ বিদেঝত থান্নে আমা জাত ভেই-ভোনুনোরো তারা তারা মিলিবার জু বানা বিঝুবো। সেধক্যে বিঝু দিন্নোত যদি তিবুরা, মিজোরাম, অরুনাচল, দেচকুল আ আরাকানর আনক্যা, তোঙতোঙ্যা আ দৈংনাক্যা চাঙমাঘুন এক উদোনত মিলি পারিদোঙ সালে সিয়েনত্তুন পারা দোল আ হিচ্ছু ন থেলুন।

এবারর বিঝু মেলাবো হয়ত বিজগত নাঙ রাগেব’ যদি তার আরেয়ে হামানি গমে সির নেজেই পারে – ১) তিরিচ বঝর পরে যুগোর লগে তাল মিলেনেই এবারর বিঝু মেলাত হয়ত ‘তিবুরা রেজ্য হাবর বিঝু মেলা’ তার ঠায়ঠিক ‘লোগো-ভো পে’ই পারে। ২) রেজ্য হাবর বিঝু মেলা এজেত্তে বঝর হন জাগাত পরিবো সিয়েন আগাম ঘোষনা দি থবার সুদোম হয়ত এ বিঝু মেলাত্তুন ধরি চল ওহ্ই পারে। লগে বানানি ওহ্ই পারে তিবুরা রেজ্য হাবর বিঝু মেলার নানু জধা। যদি পারা যায় সালে আমি হোয় পারিবোঙ তিবুরার বিঝু মেলার তিরিচ বঝরে এক্কা এক্কা লেবাঙ’ ফোর গে’ল সালে !

বিঝু নিজেনিহ্, ২০১১

ন দোরেম মুই হমলে

লারেই লারেই লারেই চে’ই, লারেই সারা গুদি নেই। সেই লারেই গত্তে দরেলে ন অহ্য়। জাদত্তেই, দেঝত্তেই ঘিলেগান পিঝেদি দিনেই লারেয়োত বুক ফুলেই মুজুঙেধি উজেই জা পরে। পাদারা জাদে, পাদারা মানুঝে লারেই গোরি ন পারন আ লারেই গোরি ন পারিলে অধিকারর হধা হনায়ো তারা মুওত ন সাজে।

মাত্তর আমা তিবুরার চাঙমাগুনোরে রিনি চেলে হধাগান মিঝে মনে অহ্য়। আমাত্তুন হুও ন হুরিনেই পানি পরানে মাঘে, ন মাক্যে গোরি বে’ক বাবদর অধিকার পরানে মাঘে। হয়েক জন সমাচ্যে মিলিনেই আমার ইয়েন নেই, উভোন নেই, আমারে ইয়েন ন দোন, উভোন নদোন হলে আমি বিরেত আন্দোলন গরি ফুরেয়েই মনে গরিই। আ দঝ’ মুজুঙে চাঙমা জাত্তো এবাবদর. চাঙমা জাত্তো ওবাবদর গরি গবি পারিলেধ’ হধাই নেই – সিবেরে আমি জাত ভালেদি হামত্তেই মেডেল দিবেত্তেই ধারাচ গরিই।

বেঘত্তুন বেচ আমক ওহ্বার হধা – আমা গদা জিঙহানিগানত ন দোরেনেই এক্কা ধিবে হুহ্লি অহ্ক হধা হোভাত্তেই হন’ সময় নেই। গদা জিঙহানিগানত ন দোরেবার হন’ সময় নেই আমার। ছাত্র লক্কে আমি দোরেই – নিজো জাদত্তেই হধা হলে লেঘা-পড়া শিগি-সাগাই চাগুরি ন পেভঙ। চাগরি পেলে আমি দোরেই – বেচ বেচ গোল্লে মরে উতারা প্রমোশন ন দিবাক, জু-সুনজুক ন দিবাক, বর বর সরকারি কমিটিত বর বর পোস্ট ন দিবাক আ নলে রুখ্যাঙত বদলি গরি দিবাক (অনেগে দর দেঘান, সাসপেন্ডো গরি পারন) । চাগুরি সেচ গরি পেন্সনত গেলেয়ো আমার দর ন জায় – আমার পেন্সন বন্ধ ওহ্ই পারে বা ম পো-সাবাগুনে চাগুরি ন পে’ই পারন।

গদা পিত্থিমিত পারাপাঙ একমাত্র তিবুরার চাঙমাগুনেই আঘন্নে জারা নিজোত্তেই, নিজো জাদত্তেই হধা হনাগান পাপ মনে গরন, দুচ মনে গরন। পেদর পিঝেদি দুমুরোদে গরিপ্পুনোর জাদর হধা ভাবিবার সময় নেই, ধনিগুনোর জাদর হধা ভাবিবার গরচ নেই। ছাত্রই ন ভাবিবাক, চাগরিবলাই ন ভাবিবাক, গরিবে ন ভাবিবাক, ধনিয়েয়ো ন ভাবিবাক – সালে জাদর হধা ভাবিবো হন্না ?

এই জে আমার জনমভুরি পিত্তোমরা ভাপ, নিজোরে চিগোন মনে গরানা, নিজোরে পরর অধীনত্তল মনে গরানা – ইয়েনর হি হন’ দারু আঘে ? অভিধম্মর বিদর্শনরসান আঘে নেনা হন’ পত, জিয়েনে এ আহ্জার বঝরর পাদারা ঔপনিবেশিক মানসিকতাগানি হাজেনেই আনি দি পারে স্বাধীন মানসিকতা ?

মাদি, আঘস্ত, ২০১১, ন’ বঝর, নাদা-৬৫

চুমুলোঙ তেম্মাঙ

চাঙমা হধাত আঘে, ‘পুনোত ঘু থেনেই, মাধাত পানি ধালানা।’ ইয়েনই গরির আমা তিবুরার চাঙমাগুনে ইক্কুনু। আমার রাচনৈতিক অধিকার দিনোদ্দিন লেজাত লামি যাল্লোই, আমার হধা-লেঘা আহ্জি যাঙ যাঙ – সে কিত্যে আমার আমল নেই। আমি অনসুর চুগি থেই হনে হিঙিরি চুমুলোঙ গরের চেবাত্যেই, আ এক্কা বেতিরিক্কে দেলে তারে ‘চাঙমা সুধোম সুম মারেই দিলো’ হোনেই বিজেরত তুলিবাল্লোত্তে। এমনকি তারে আদামত এক ঘাচ্ছে গরিবারো পুদুপাদা চলে।

দেঘা যোক আমা চাঙমা মেলাত চুমুলোঙান আজলে হি। চাঙমা মেলা-জামেয়েগানি গমে রিনি চেলে আমি তিনান হত্থা দেঘিই -১) জরা বানি দেনা, ২) চুমুলোঙ আ ৩) খানা সিরেনা।

এ তিনান হত্থাত্থুন ‘জরা বানি দেনা’গানরে আমি মেলার আঝল হত্থা ধরি পারিই। হারন, যক্কে ‘জরা বানি দিবার উগুম আঘে না নেই ?’ হনার পরে বেঘে হোই উধোন ‘আঘে আঘে’ সুয়োদই নুও বৌ-জামেয়ে তারার জদন ওয়ে গরি দঝর অনুমোদন পা’ন। চুমুলোঙ আঝলে নুও বৌ-জামেয়োর ভালেত বর মাগিনেই পুজো দেনা। ইক্কুনু হন’ জনে হয়ত মনে গরিবো তার পরমেশ্বরী, কালিয়্যে আ নেনাঙ্যেরে পুজো দিলে তার মুজুঙোর দিনুন গমে হাদিবো আ হন জনে হয়ত মনে গরিবো তার মঙ্গল সূত্র শুনিলে গম অহ্ব’। সিয়েন তারে আমিদ’ বলে বলে বিশ্বেচ গরা বাজেই দি ন’পারিই।

বেঘত্থুন ডাঙর হধা, আমি চাঙমাঘুন শাক্য জাদর মানুচ হোলেই, সে ঈজেবে হন জনে যদি তা জামেয়ে বৌদ্ধ মতে গরে আমি তারে হন’ দিন গর দি দিন’পারিই। তে যদি কালী পূজো গরিনেই মেলা সিরেদ’ সালে হিঝু হধা থেলুন। তবে ইয়েনো ঠিক যে, হন’ জনে যদি ঘেচ্চেকগরি কালী পূজো গরিনেই মেলা গরেধে অহ্য়, সালে চাঙমা সুধোম দিন-রেত চুগি থেয়েগুনে হিচ্ছু হোভাক গরি আমার মনে ন’ অহ্য়। যদি হোধাক, সালে ইক্কুনু যিগুনে হিন্দুগুনো সান মেলা লক্কে নিজোর ঝিরে জাগা-গাড়ী-বাইক-খাট-আলমারী-চেয়ার-টেবিল-সোফা এমনকি রোজেই-বালুচ পজ্জোন্ত দেদন, তারারেয়ো হলাক্কুন। ইগুনেহি চাঙমা সুধোমরে ভারি গরি জোলজোল্যে গরধন ? আ তারারে হি আমা মুরুব্বিগুনে এক ঘাচ্ছে ন’গরন ? যিগুনে বৌদ্ধ ধর্ম মানিনেই মেলা গরধন, তারাধ’ নিজোর ধর্মগানরে অজলত তুলোধন আ যিগুনে ‘পণ প্রথা’ নাঙর ফারাঙীগান আমা জাদর হিয়েত সাজুরাদন তারাধ’ পরেয়ের ফেলেয়ে সেপ ফুদো লিয়েই তুলোধন, তারাহি সিয়েন ভারি দোল গরধন ?

মাদি, মার্চ, ২০১১, ন’ বঝর, নাদা-৬০

ন’চাঙ যেবার এ জাগান ছাড়ি …

ভালক বঝর আগে আমা লেগিয়েগুনে গীত জরেয়োন আ গীতগেয়েগুনে গীত গেয়োন ‘‘ন’চাঙ যেবার এ জাগান ছাড়ি…” – মাত্তর আমি চাঙমাগুনে এ গীদোর ভেদ হনদিন ন’বুঝিলোঙ। নিজোর জাগারে পোচপানা, নিজোর মাদিত্তেই লাড়েই গরানা, নিজোর দেঝত্তেই পরান ধালি দিবার অমক্খর শবৎ খানা আমা চাঙমা পরানত নেই। রুনু খান, মানবেন্দ্র নারায়ন লারমা – ইগুনোর লাড়েই আমা চাঙমা গুত্যেত গমে ন’ভেদেগোই। আমি এক্কা ডর দেগেলে আদাম ছাড়ি যেই, জুদো জাগা এক্কা দোল দেলে পরঙ ওয়োই। পরঙ অহ্দে অহ্দে আমি পিত্থিমির বে’ক জাগাত ইক্কুনু নাদা গুলেক, এমনকি নিজো জাগাদো। ফল – পত্তি জাগাত পরর অধীনত্তল।

হন ইঙরেচ আমলত সেক্কেনর ইঙরেচ সরকারে চাঙমা রাজারে হোয়েধে, ‘চাঙমা রাজা নরপতি, ভুপতি নয়’। মানে চাঙমা রাজা বানা চাঙমাগুনোর রাজা বা মালিক, জাগার রাজা বা মালিক নয়। সিত্তুন ধরি আমার হন’ মাদি নেই, আমি পরর দেঝত থেই পে’র। দেচ ন’থেলে অধিকার হিঙিরি থেব’ ? জাগা ছাড়া হি পঝা লোই পারে ?

আমি ইক্কুনু যে চিগোন চিগোন জাগানি ছিত্রিবঙচগরি ধরি আঘিই সিয়েনিয়ো অনসুর বেজাদিগুনে হারি লোভার তকতোগান। দেচকুলোত, অরুনাচলত, মিজোরামত, তিবুরাত – হুধু নয়। মিজোরামত চাঙমা ডিস্ট্রিক্ট কাউন্সিল হোনেই যিয়েন পেয়েই, সিয়েন দেদেয়ো ৩৮ বঝর আগে আমালে­াই চুবুলি গরা ওয়ে। যেত্তোমান বাম সিএডিসি ভিদিরে ভরেবার হধা এল’ তার বানা চের ভাগর এক ভাক লোনেই সিএডিসি বানানি ওয়ে। তিন ভাগর দি-ভাক চাঙমা রোয় যেয়োন্নোই তার বারেহ্।

ইক্কুনু মিজোরাম সরকারে চাঙমাগুনে যাতে সিএডিসি-বো ডাঙর গরেবার দাবী গরি ন’পারন সেনত্যায় লারে গরি চাঙমাগুনোর মাদিগানি গঝক গরিবার আরকানি গরের। তার এ নুও ভেইলে­া অহ্লদে, চাঙমা বামানি চেই চেই রিজার্ভ ফরেস্ট বানেই দি দি চাঙমা বামানি চিমেই দেনা। একবার রিজার্ভ ফরেস্ট বানেই দিনেই তুলি দি পারিলে, জনমত্তেই জাগাঘান তারা আহ্দত যেবগোই। এমনকি সেনত্যায় তারা লাখ লাখ তেঙা ধালদেয়ো চিদে ন’গত্থন।

হয়েকদিন আগে মামিত জেলার আন্ধারমানেক, রাজীপনগর, শিলসুরি আ নাবা – এ চের আদাম চাঙমারে দাম্পা টাইগার রিজার্ভপান অঝার গরিবোঙ হোনেই ধাবেই দিয়ে ওয়ে। এবারত শুনো যার লুঙলে জেলার সিত্যেপারা, পুনকায় আ মুন্ডো – এ তিনান চাঙমা আদাম ভরেনেই পুনকায় রিজার্ভ ফরেস্ট বানানি অহ্ব’। পত্তি বারর সান এবারদো চাঙমা মুকপাত্তিগুনে বড়গাঙত কাপ্তেই গধা বানধে চাঙমা রাজা ত্রিদীব রায়ে চেই রোয়ে পারা গরি চেই থেবাক। আদাম্মেগুনে যেবার ন’চেলে সরকারে তারারে তারারে হয়েক লাখ তেঙা গুজেই দিবো। সিগুন লোনেই তারা হয়েকদিন মদে-ভাঙে খেবাক। সে পরেধি ….. আঝা গরঙ আর লিঘিবার দরকার নেই। ভেক্কান আমা জাদত বার বার ঘদি যেয়ে পুরোন ঘটনা …. বানা জাগাঘান আ মানুচ্যুন জুদো।

মাদি, ফেব্রুয়ারী, ২০১১, ন’ বঝর, নাদা-৫৯,

এগত্তরর জধা বানেবঙ ফারগর নয়

চাঙমা লেঘাদি তিন মাস্যা সার্টিফিকেট বলাগুনে ‘চাঙমা ভাচ ভালেদি জধা’ নাঙে ইক্কো নুও জধা বানেয়োন। চাঙমা লেঘা জনে জনে শিগোদোক তারার মনঝুক। এর আগে গেল্লে মাহ্জত ‘চাঙমা গাবুচ্যা জধা’ (YCA)-র তিবুরা ধেলা বানানি ওয়ে। শুনো যেয়ে তারা ২০১১-র ভিদিরে গদা তিবুরাত চাঙমা গাবুচ্যা জধার ধেলা বানেবাক। চাঙমা জাদর ভালেত গরানা তারার মনর ধারাচ।

ইন্ধি তিবুরা চাঙমা ছাত্র জধা এতা ভিদিরে মোটামুটি গদা তিবুরার চাঙমা বেচ কলেজচানিত তারার ধেলা বানেই ফুরেয়োন। তারায়ো চাধন জাদর ভালেত গরিভার। সেবাদে আঘন গন্ডাছড়ার সি.এস.সি.ডি.এস. (চাকমা সোসিেেয়া কালচার‌্যাল ডেভেলপমেন্ট সোসাইটি), শান্তির বাজারর সি.এস.সি.ও. (চাকমা সোসিেেয়া কালচার‌্যাল অর্গ্যানাইজেশন), কাঞ্চনপুরর ওয়াই.বি.এস. (ইয়ং বুদ্ধিস্ট সোসাইটি) আ আদামে আদামে নানান চিগোন-ডাঙর জধা, আঘে নুও-পুরোন ক্লাবপানি। বেঘর আহ্ওচ আমা জাদর ভালেত।

বেঘর ধারাচ যদি জাদর ভালেত অহ্য়, সালে আমি এক সমারে হাম গরি পারিবঙনি ? যদি ন পারিই সালে আজলে হি আমি জাদর ভালেত চেই ? আমি যদি বাম ভাক গরিনেই জাগায় জাগায় এগই হাম এক লঘে গরি পাত্তঙ। আদামত যদি দিব্যা জধা থান সালে আমি আদামান দি-ভাক গরিনেই একসঙে হাম গরিলে আর’ বেচ হাম অহ্ব’। এ উজু হধাগান বুঝিলে, মানিলে, তে মানা যায় আমি ঘেচ্চেক গরি জাদর ভালেত চেই।

অনেগে আরক্কান হধা ইয়োত তুলি পারন। হধাগান অহ্লদে – আমি যদি ভেক্কুনে মিলিনেই ইক্কো জধা বানেই পারিই ? হধাগান শুনোদে যেত্তোমান উজু, ঘেচ্চেক গরি গরদে সেত্তোমানই আগাত্যা। ইয়েনর উজু জুওপ অহ্লদে – হন’ জধা যদি ঘেচ্চেকগরি হাম গরদে অহ্য় সালে সিবে লারে লারে ডাঙর অহ্ব’ হামাক্কায়গরি। আ যদি হাম ন গরে সালে সিবে লারেগরি মিলেই যেবগোই। হন জনে যদি হাম ন গচ্যা গরি আঝা গরে তা জধাবোত দুনিয়ের বেক চাঙমাঘুন এগত্তর ওহ্বাক্কি, সালে তার চাঙমাগুনোরে ‘পাল্লাত তুল্যা বেঙ’ ভিলি বন্নাম তাঙেই দেনা বাদে হন’ পথ নেই।

সেনত্যায় নিজো জাত্তোরে বন্নাম ন গরি, অন্য বেক জধাগুনোর সমারে আহ্দে-আহ্ত ধরা-ধচ্যা গরি হাম গরানা। সমার এক জন পেলে এক জন্নোই, দি জন পেলে দি জন্নোই ন জিরেয়ে গরি হাম গরানা। হামে আমারে এগত্তর গরেব’ – হামে আমারে ভালেত আনি দিবো।

মাদি, জানুয়ারী, ২০১১, ন’ বঝর, নাদা-৫৮

এগত্তরর তালিক তোগানিত

এগত্তরে বাজন, ফারগত মরন – হধাগান যুগে যুগে বে’ক জাদর আর্য্য মানেইয়ুনে হোই যেয়োন। এই সময়ত বে’ক হিঝু যেক্কে আমা ধগর চিগোন জাত্তুনোর সাদাঙা, সেক্কে বাজিবের এগাতারা দারু অহ্লদে আহ্দে-আহ্ত ধরি বুকপাদি ঠিয়েই উধোনা।

মাত্তর ….. আমি ভালক ভুলোনত্থুন ধরি দেঝে-বিদেঝে ছিদি পচ্ছেই। সেনে সেনে ভাক ওয়েই আনক্যা, তোঙতোঙ্যা, দৈংনাক্যা। বাংলাদেচ্যা, তিবুরা কুল্যা, মিজোরাম্যা, অরুনাচল্যা। লারে লারে রেগাভুও পুঘে খার, মনর বান সজ অহ্র। মঘর, মুজুরমানর, বাঙালর, মিজোর ছাবাত্তলে থাগদে থাগদে নিজর আরাঙ ধক্কান হেধক্যা এল’ সিয়েন শুনিলে পশ্চনর সান লাগে। পর মানুজে নিজোর জাগাত তেঙেরা বেড়ি দিলাক। রেদোর ঘুমোত আহ্মত্তল ভাজেই দিলাক গধা পানিয়ে। শুনো যার দেঝকুলোর খাগাড়াছুড়ি জেলার হন’ হন’ বামর চাঙমাঘুন ভিলে ইক্কুনু খৃষ্টান অহ্দন। পাধা-পাধিগরি ধুনো-ধুনি চলে অনসুর। ….. ফারগর অসুখ ভালক বাবদর। মাত্তর দারু ?

এক্কা এক্কা গরি আমিয়ো হোচ্চের। প্রধীর তালুকদারে রেগা বানেয়ে ভারত-বাংলাদেঝে। রঞ্জিত দেবান, জ্যাসিদাঘির গীদো র’ ঈধু সঙ লুঙিলগি। বীরব্রত বানিলো ধর্মর রেগা। নন্দপাল ভান্তে লুঙেই দিলঘি বনভান্তের ধর্ম সদক। অনিরুদ্ধ বানিলো চাঙমা লেঘার বান মিজোরামর লঘে। জয়ন চাঙমার বলাবলে চাঙমা লেঘা ইক্কুনু আমার আঙুলো মাধাত। বৈদ্যনানুদাঘির হরলা বইয়র পাদাত্থুন কম্পিউটারর ঝকঝক্যা স্ক্রীনত। যেন আহ্জার আহ্জার বঝর পুরোনী মিশরর মমি সোরান পেল’ পোতপোত্যা বেলর সদগত। যিয়ে, যিয়ে হোই পায় ‘মাত্তর …. এঝ’ ভালুদ্দুর পধ বাগি …..।’

বাত্তো পেঘে খবর দিলো চাঙমা গাবুচ্যা-গাবুরী জধা বদদন। মিজোরামর চাঙমা গাবুচ্যা জধার ধেলা লুঙেল্লি তিবুরা সঙ। ধেলায় শিঙোর গারেই পারিবঘি ধ ? দ’সোচ্ছে ঘর সামালাদে গিরিভো দরমর’ লাগে। পিজোরর হধা সিঙোবার তেম্মাঙরে লঙেদ’ চায়। পরেধি আমি যাতে হোই ন’পেই, মানে-সম্মানে বেলক অহ্নাগান ভালা এল। ইন্ধি শুনো যার গদা পিত্থিমির তোঙতোঙ্যাগুনো এক গুধিত বজিনেই এগত্তরর তালিক তোগেবাক। তোগেই পেভাকনি ?

মাদি, ডিসেম্বর, ২০১০, আট্য বঝর, নাদা-৫৭

চাঙমা ভাষা ভালেদি জধার হয়েকখান পুঝোরর জুওপ

গেল্লে দি মাহ্জে দি বার চাঙমা লেঘা দাবী গরিনেই চাঙমা ভাষা ভালেদি শল্লাদারী কমিটি সিধু ডেপুটেশন দিনেই আমার মানবলা শল্লাদারী কমিটির মেম্বারুনে হয়েকখান পুঝোরর তুলোপারা গচ্চোন। আমার মনে অহ্য় সিয়েনি ভেক্কানি ঝাদি মাদি চাঙমা জাদর মুজুঙে ভাঙাচুরো গরিভার দরকার আঘে। ন’অহ্লে সে পুঝোরানিয়ে আমারে অনসুর পিঝেদি টানিবো। হি সেই পুঝোরানি ? এগে এগে তোলেই চা’ যোক –

১॥ চাঙমা মিডিয়াম চালু অহ্লে আমা চাঙমা পুও-ছাবাঘুন ইরুক যুগোর জিদেজিত্যাত লেম পরিবাক নেনা ঃ পুঝোরানর উজু মানে, মা-ভাষন্দি শিক্ষের উগুদো গরানা। যে জাগাত গদা পিত্থিমির বে’ক শিক্ষে কাবিলুনে মা-ভাষন্দি শিক্ষে দিলে বেঘত্থুন গম হন, সবায় ন’পারিলে অন্তত চিগোন’ লক্কে হন’গুরোয় মা-ভাষন্দি শিক্ষে পেলে দোল ভিলি তুলোপারা গরি যেয়োন, সে জাগাত আমা চাঙমা ভাষা দরদী মেম্বারুনে সন্দেহ গরন, আমা হধাদি আমা গুরোগুনে শিক্ষে পেলে হন’ বরবাদ যেবাকনি! তে আমাত্থুন পারা পরাকবাল্যা জাত আর পিত্থিমিত হুধু পা’ যেব’ ? ইয়েন অহ্লদে আমা বুদ্ধিজীবিগুনো উগুরে ঔপনিবেশিক প্রভাপ যে হোত্তোমান তার পতপত্যা প্রমান। আমার মনত রাঘা পরিবো, ন’বুচ্চে গরি মনত ভরেই পরীক্ষে দি দি আমি হয়ত আমা জাদত বড় বড় অফিসার পেভঙ, বড় বড় ডাক্তর-ইঞ্জিনীয়ার পেভঙ – মাত্তর ডাঙর মানুচ ন’পেভঙ।

২॥ চাঙমা লেঘাদি বই ছাবেবার টেন্ডার ধরি পারে পারা পাবলিশার্স আমি হুধু পেভঙ ঃ সরকারী কন্ট্রাক্ট লোনেই বই ছাবাদে সে পাবলিশার্সচোর হয়েকখান ঠায়ঠিক গুনগত মাপকাঠি লাগে। যেমন, হয়েক বঝরধরি তার সে বাবদর বই ছাবেবার এক্সপেরিয়েন্স থা’ পরে। মাত্তর ধাপ থেলে সরকারে বা শিক্ষে দপ্তরে হি সে শর্তগানি সজমজ গরি ন’পারে ? সালে, পত্থম যেক্কে ককবরক বা বিঞ্চুপ্রিয়া মনিপুরী বই ছাবেলাক, সিগুন হন্না ছাবেই দিলো ? ইক্কুনু যে চাঙমা বোয়ুন বাংলা অহ্রগে ছাবা অহ্র সিগুনদ’ সরকারী প্রেসে ছাবেই দে’র। সালে সিগুনো সরকারী প্রেসেই ছাবেই দিবো। ফারক্কান অহ্লদে, বাংলা অহ্রগে অহ্লে আমার বানা পান্ডুলিপি জমা দিলেই ছাবেই দি পাত্তাক আ চাঙমা লেঘাদি অহ্লে আমার কম্পোজ্ড্ কপি জমা দিয়ে পরিবো। ন’ অহ্লে তারা চাঙমা ফন্টে কম্পোজ গরি জানিধাক নয়। ইচ্চে গরিলে সরকারে এসসিইআরটিত বা সরকারী প্রেসত এক জন চাঙমা কম্পোজার রিক্রুত গরিপারে। তিবুরা সরকারে ধারাজ গরিলে সিএডিসি-য়ো বই দিবো ভিলি বার বার জানেয়ে সিধুগোর এডুকেশনর ইএম সুনানু ড. বুদ্ধধন চাঙমা। আঝল হধাগান অহ্লদে, আমা শল্লাদারী কমিটির মেম্বারুনে হয়েকজনে যদি চাঙমা লেঘা জানিধাক সালে পিত্থিমিঘান এত্তোমান আন্ধার ন’ দেলাক্কুন তারা।

৩॥ (ইয়েন বানা হয়েক জনে তুল্লোন্নে) আমি সরকারী চাগুরি গরিই আমি চাঙমা লেঘার হধা তুলি ন’ পারিই ঃ চাঙমা ভাষা ভালেদি জধা ইক্কো সরকারী কমিটি। তার মেম্বারুনোরে নব্ভাচ গরে সরকারে। হন’ জনরে শল্লাদারী কমিটির চাবাঙী নব্ভাচ গরিভার অত্থ অহ্লদে তারে সরকারে হত্তে, তুই আমারে চাঙমা ভাষার হিঙিরি ভালেদ অহ্ব’ সে পইদ্যানে শল্লা-পরামর্শ দে। সালে ‘শল্লা দি ন’পারিই’ হনার মানে সরকারী অর্ডারর উগুধো গরানা। সে উগুধো হধাগানই তিবুরার চাঙমাগুনোরে আমা চাঙমা ভাষা ভালেদি শল্লাদারী কমিটির মেম্বরুনে বুঝাদন। যিগুনে শল্লাদারী কমিটিত থেনেই হোভাক আমি ‘শল্লা দি ন’পারিই’, তারার আর এক্কেনায়ো অহ্লিপ ন’গরিনেই কমিটিত্থুন লামি যেবার দরকার আঘে। সালেই চাঙমা জাদর ভালেত অহ্ব।

৪॥ সভানানুয়ে আরকানি ন’নেযায়, আমি হি গত্তঙ ঃ কমিটিবো হি বানা সভানানুর ? যদি স্যা অহ্দ’ সালে কমিটি বানেবার হন’ দরকার ন’ এল। মিটিঙ ডাগিবাত্যায় হয় জন মেম্বারে সভানানুরে হোয়েন চিধি দুওন ? জধার নিয়ম মজিম হন’ জধার তিন ভাগর দি ভাক মেম্বারে যদি মনে গরন, হন’ পইদ্যানে তেম্মাঙ গরিভার দরকার আঘে সালে সভানানুয়ে তেম্মাঙ ডাগদে বাধ্য। আ তুয়ো যদি ন’ডাগে সালেন মেম্বারুনে সভানানু ছাড়ায়ো তেম্মাঙ গরি পারন। আ তেম্মাঙত বঝিলে সিদ্ধান্তর হধা যদি তুলো অহ্য় সালেয়ো হো যায় বেচ ভাক মেম্বারুনে যদি হন’ হিচ্চুর পইদ্যানে সিদ্ধান্ত নিধাক চা’ন, সালে সিয়েনো সভানানুয়ে মানি নেযাদে বাধ্য। সালে আমি মনে গরিই সভানানুরে বাঝেই দেনা মানে নিজ’ বুগিবো পররে বুগেই দিবার চেষ্ঠা ছাড়া আর হিচ্চু নয়।

উগুরোর হধানিত্থুন তিবুরার চাঙমাগুনে আন্দাচ গরি পারিবাক যে, গেল্লে ২৭ বঝর ধরি তিবুরাত হন বাবদর মানুঝোর শল্লা মজিম চাঙমা ভাষার ভালেত অহ্র। সিগুনোর মুজুঙোত্থুন যে চাঙমা ভাষা ভালেদির ফাইল আহ্জি যেবগোই, বেজাদি উগর হাবর অফিসারুনে যে মনেমনজক্কা গরিভাক, সিয়েনদ’ জানা হধাই। সে বাবদর মানুচ্যুনোর জকমজিম শল্লাদারী জধা আর হয়েক্কো দিন চলিলে চাঙমা জাত্তো যেত্তোমান তলে লামিবো সিত্থুন টানি তুলোদে গুমুত্যা বলীরো হের মের যেব’।

মাদি, নভেম্বর, ২০১০, আট্য বঝর, নাদা-৫৬

এক জাত এক অহ্রক

ইক্কো জাদর দি বা তিন বাবদর অহ্রক কনদিন ওহ্ই ন পারে। ইক্কো জাদর দি/তিন বাবদর ধর্ম অহ্লে হি দুর্গদি অহ্য় সিয়েন এক্কেনা চেরোপালা শিরে পাগেলে আমি গমে মেহ্ত গরি পারিই। আমার হবাল গম যে দৈংনাক্যা-তোঙতোঙ্যা-আনক্যা বেঘে এভ’ আহ্জার ধুচ খেনেয়ো বুদ্ধ ধর্মগান আজা গরি আঘন। পর’ জাদে আমারে ন’ মাদেয়ে গরি আমা দেশ্চান ভাক গরি দিলেয়ো আমা ধর্মঘান ভাক গরি দি নপারন। ইয়েন এভ’ আমার একখান বিরেত বল।

আনক্যাগুনোসান তোঙতোঙ্যা আ দৈংনাক্যাগুনেয়ো এভ’ সঙ চাঙমা লেঘা লারচার গরন। ভারত-বাংলাদেশ-বার্মা, পিত্থিমির যে হন’ হোনাত থেয়ে চাঙমায়, চাঙমা লেঘাগানরে এভ’সঙ নিজর লেঘা মানন। সেনত্যায় আমা ভিদিরে ফারক্কান হমেবাত্যায় ইয়েন আমার একখান দবদবা পধ। আর এই দবদবা পত্থান নাদেই দিবাত্যায় আমাত্থুনোই হয়েকজনে দিন-রেইত মাধার ঘাম ঠেঙত ফেলাদন। আমি যেধক বেচ পধ ফুরেবার চেই সেধক বেচ তারার কালা আহ্ত্তানি লিকলিগেই উধে। মাত্তর বিজক সাক্ষী আঘে, যে জাদর মাজরা যেধক বেচ লুগেই দিবার চেষ্ঠা গরা অহ্য়, সেধক বেচ সে জাদর মানুষ্যুন সোজেই উধোন।

ইয়োত আমি ‘স্যামি’ জাত্তোর হধা ঈদোত তুলি পারিই। ১৭ শতকত নরওয়ে আ সুইডেন সরকারে তারারে ভেক্কুনোরে খ্রীষ্টান বানেবার চেষ্ঠা চালেয়ে আ তারার নিজর ভাষাদি হধা হনা নিষিদ্ধ গরি দ্যা। মাত্তর দমেই পাচ্চে হি ? নরওয়ে, সুইডেন, ফিনল্যান্ড, রাশিয়া – চের/পাচ্চান দেঝত ভাক ওনেয়ো তারা এভ’ সঙ তারা ভাষাগান বুঘোত গরি বাঝেই রাঘেয়োন। সে দেচ্চানির ভালক্কানি মিউনিসিপ্যালিতিত এচ্চে স্যামি ভাষাগান সরকারী ভাষা। তারার ভাষা আ সংস্কৃতি বাজেই রাগেবাত্যায় ১৯৯০-৯১ সনত সে দেচ্চানির সরকারে আইন পাশ গরদে বাধ্য ওয়ে। অথচ স্যামিগুন গদা পিত্থিমিত চাঙমাগুনোর মাত্র ১২ ভাগর ১ ভাক। তারারে চেলে আমি হয়দুনো ধুরোত আঘিই। তে তারা পারিলে আমি হেত্তেই ন পারিবোঙ ?

ইক্কুনু আমি যদি চাবত পড়িনেই নানান দেঝত/রেজ্যত নানান অহ্রক গঝি লোই সালে সিয়েন অহ্ব’ আমা জাদত্তেই নাত দিবার দড়ি আহ্দত তুলি লোভার সঙ। যেক্কে আমার হিচ্চু ন এল’ সেক্কে বৈদ্য/লুরিগুনে আমা চাঙমা লেঘাগান বাজেই রাঘেয়োন। ইক্কুনু পিত্থিমিয়েন যেক্কে আহ্দর মুহ্দোত, সেক্কে আমা বৈজ্ঞানিক/ইঞ্জিনীয়ারুনে আমা চাঙমা লেঘাগানরে সফ্টওয়্যার বানেনেই নুও পরান দুওন। ছাবাদে/লেঘদে আমার আর হন’ জাগুলুক নেই। সালে হেত্তেই আমি এভ’ সঙ আমা লেঘাগান একদুরোত থবঙ ?

মাদি, অক্টোবর, ২০১০, আট্য বঝর, নাদা-৫৫

জাদর দুলো ধরিয়ে গুনোত্তুন সাবধান

দুলো ধরিয়ে – মানে জাল্যার পিঝে পিঝে মাছ লোভাত্তেই যেমন দুলো ধরিয়েই ঘুরোন ঠিক সেধক্যা গরি নিজর সুযোগ-সুবিধে আদায় গরিবেত্তেই হয়েক জন চালাক মানুষ আঘন যিগুনে পরর জাদর নেতার পিঝে পিঝে ঘুরোন সিগুনোরে দুলো ধরিয়ে হুয়ো অহ্য়। তারার চরিত্র অহ্ল’দে তারা সাংঘাতিক মুখ চালাক – মানুষ ভারেই পারন হাক্কেনে, নিজর ধক্কানো বদলি পারন ঝিমিদত আ পরর ঠেঙত মাধা লোঙেয়ে অহ্লেয়ো তারা নিজ’ মানুঝর মাধা খাদে রেক্ষজরেয়ো দিয়েই যান্নোই।

পত্তি জাদত অনসুর অনসুর সুমানেইয়র জনম ন’ অহ্লেয়ো এ বাবদর দুলো ধরিয়ে বেক জাদত যুগে যুগে জনম লন। বিভীষণ, কুইসলিং, মীর জাফর – ইঘুন ওলাক্কে বিজগত বেগে চিনিয়ে হয়েকজন বিরেত বিরেত দুলো ধরিয়ে। ইগুনে পরর জাদর ইধু পুরস্কার পা’ন অনসুর গরি। যেমন নিজর, জাত ভেই, নিজর সদর বড় ভেইয়োর লঘে বেইমানি গরিলেয়ো বিভীষণরে বাঘেনি গরা ওয়ে রামায়ণত।

এ বাবদর দুলো ধরিয়ে আমা জাদদো আঘন। তারা নিজর জাদর চিনত্তেই (মানে ট্রাইবেল ইজেবে) চাগুরি পেলেয়ো নিজর জাত্তোরে পুরি ফেলান্নোই। তারা পরে বুঝিবাত্তেই নিজর বাপ্পোর লঘে বাংলাদি হধা হন। তারার পন্ডিগি হধানি বুঝিবার মত মানুষ তারা নিজর জাদত নেই মনে গরন। সেনত্তেই তারা পরর ভাষাদি লেঘা-লেঘি গরন। নিজর গদির লুভে নিজর জাত-ভেই হাবা খাদে, ধাবা খাদে চোখ খাদি থান। নিজে নাঙ হামেবাত্তেই পরর মাজারাগানি লুগেই দিবার চেষ্ঠা গরন। নিজর তলবিচ-চানোই তারা মনে গরন থুম হধা। এ বাবদর আর’ সয়সাগর গুন তারাত্তুন আঘে। সিয়েনি গনি বুরেই এধ’ নয়। ধর্মধন পন্ডিগে এ যুগোত জনম লধ’ সালেন পারাপাঙ লিঘি পারিলুন – ‘দুলো ধচ্যার বারমাস’।

সে যা ওহ্ক, আঝল হধাগান অহ্লদে আমার তারারে চিনে পরিবো আ তারার বজঙ হামানি ত’ গরিদ্যা পরিবো। পরেয়ে মানুজে চুজিলে দেঘে, খবর পা’ যায়। মাত্তর নিজ’র গা’ চামে যদি লুও চুজে আমি হিঙিরি টের পেভঙ ? সেনত্যায় এ বাবদর মানুচ্চুন জাদর বেঘত্তুন ডাঙর শত্র“। পরেয়ে জাদে ইগুনোরে নল বানেনেই আমারে চুজদন। লগে নল্লোয়ো হিঝু বাদা পা’র। এ বিষ পড়াগুন গম গরি ন পারিলে আমা জাদর হন’ ব্যাধি গম অহ্দ’ নয়, হন’ দারুয়েও ধত্ত নয়।

মাদি, সেপ্টেম্বর, ২০১০, আট্য বঝর, নাদা-৫৪

চাঙমা লেঘা : মাঘি পেভঙ নিজত্তুন নিজে

চাঙমা লেঘাগান আমার নিজর লেঘা। হন হন পিত্তসদ’ হাঙেলভাঙা পন্ডিগে ইয়েনরে উধোর লোয়ে হলেয়ো চাঙমা লেঘাগান আমি বেঘে নিজর ভিলিই মানিই। পোচপেলে পালক পুওয়ো সদর পুওত্তুন বেচ। আর পিত্থিমির বিজগত দেঘা যায় যে ৯৯% জাদর, এমনকি ইংরেজী ভাষার অহ্রক্কুনো উদোর লোয়ে। সেনত্যাই সে হধাগান চিগোন হধালোই জাগুলুক তুলি দিনেই নিজর ভুদিবো সামেলেয়ে মানুচ ছাড়া ন তুলোন।

ইক্কুনু আমা চাঙমা লেঘাগান মানে চাঙমা জাদর পরানান চাঙমা ভাষ ভালেদি শল্লাদারী জধার আহ্দত। তারাই একমাত্র পারন চাঙমা জাদর পরানানরে বাজেই রাঘেই। শল্লাদারী জধার চাবাঙীগুনে হয়ত নানা জনে নানান হধা হোভাক কিন্তু তারা তারার দায়িত্ব হন দিন খাম ন খেই ন পারিবাক। কারন চাঙমা লেঘা দাবী গরিনেই যে হন মন্ত্রী, নেতা বা অজল হাবর অফিসারর ইধু গেলেই তারা উজু গরি হন, তিবুরা সরকারে চাঙমা ভাষার পইদ্যানে যে হন সিদ্ধান্ত আ আরকানি নেযায় শল্লাদারী কমিটির হধা মজিম। সেনত্যায় চাঙমা লেঘা চালু গরানা ন গরানা গদাঘান তারার উগুরে।

সেবাদে Right to Information Act-র আহ্নজামে সেক্কেনর চাঙমা ছাত্র জধার কাবিদ্যাঙ অনিরুদ্ধ চাঙমা ট্রাইবেল ল্যাঙ্গুয়েজ সেলত্তুন হয়েক্কান পুজোরর জুয়োপ চেলে চাঙমা ভাষ ভালেদি জধার কনভেনর শ্যামলী দেববর্মা পরাক পরাক গরি জানেয়ে যে তিবুরাত বাংলা অহ্রগে চাঙমা হধা চালু গরা ওয়ে শল্লাদারি জধার হধা মজিম। সেনত্যায় ঘুরিফিরি হধাগান যিয়ে সুওত লুঙেগোই। শল্লাদারি কমিটিয়েই একমাত্র চাঙমা লেঘাগান চালু গরিভার মালিক। আর হনজনে নয়।

এ হধাগানর আর’ এককান হত্থা আঘে। আমার ভেক্কুনোর চাঙমা লেঘা শিঘে পরিবো, চাঙমা লেঘা লারচার গরা পরিবো – যদি আমি ঘেচেছকগরি চাঙমা লেঘা পোচপেই। আঝলে আমি যদি ভেক্কুনে জানিই, ভেক্কেিন লারচার গরিই সালে হন জাত বিরোধী শল্লাদারী কমিটিয়েই তারে মাজারা লুগেই দি পাত্তাক নয় আর আমি যদি চর্চা ন গরিই হন’ শল্লাদারি কমিটি বা হন’ সরকারেই তারে তিগেই রাগেই পাত্ত নয়।

মাদি, আগস্ট, ২০১০, আট্য বঝর, নাদা-৫৩

মন সরান বান সরান

সরান, জিয়েন বাংলাদি স্বাধীনতা হন সিয়েন নিজর ভালেদ চিদে গরদে এগপরা দরকার। যে জাত পরর অধীনত্তল তে হিঙিরি নিজর ভালেত চিদে গরিবো ? হিন্তু হেয়ের বান সরেবার আগে মনর বান সরানার দরকার আঘে।

চাঙমাঘুন হয় বজরত্তুন ধরি পরর অধিনত্তল আঘন তার হন ঠায়ঠিক ঈজেপ পা ন যায়। … … মগর তলে, সে পরে মোঘলর তলে, সে পরে ইংরেজর তলে, সে পরে … …। পরর তলে থাগদে থাগদে চাঙমাগুনো মনানি এমন পিত্তসুদো ওহ্ইয়ে যে গোলামির মানসিকতা (বইয়র ভাষায় ঔপনিবেশিক মানসিকতা) যেন তারার লো লঘে মিঝি যেয়েগোই। হধাগান অনেগর শুনোদে সুওত লাগিদো নয়। হিন্তু পিড়ে ধাগি থনা গম নয়।

এ পিড়েগানর সলেই কিন্তু চাঙমাগুনো আহ্দত জনম লোয়ে চান্দবী বারমাস, মেয়্যাবী বারমাস ধগর আধা চাঙমা-আধা বাংলা ধগর কাব্য (যিগুন বাংলা অহ্রগেদি পড়িনেই বেজাদি ভাষা কাবিলুনে চাঙমা ভাষাগানরে ‘বাংলার উপ ভাষা’ত প্রমোশন দুওন), নিজর আ নিজর জাগার নাঙ বদলি ফেলান – রাধামনরে ‘রাধা মোহন’, ধনপুদিরে ‘ধনপতি’, রাঙামাত্যারে ‘রাঙ্গামাটি’, হুগিল চুক্কোরে ‘কোকিল টিলা’, বরচোঘারে ‘বড়চোখা, এলমারারে ‘আইলমারা’ আর সয়সাগর।

এ পিড়েগানর সলেই চাঙমা মিটিং-সেমিনারত ইক্কো বেজাদি গরবা এলেই আমা মুওত্তুন আর চাঙমা হধা ন নিহ্গিলে। আমা মা-ভোনুনে পিনোন-হাহ্দি পিনিবার লাজান। মিটিঙর রেজিলিউশন আমি লিঘিই বাংলাধি, এমনকি ঘরর চিগোন-চাগোন নোট লিঘি থনা, ঈজেপ লেঘানাত পর্য্যন্ত আমি বাংলাদি লেঘিই। সালে আমি হেত্তেই চাঙমা লেঘা দাবি গরিই ?

নিজর মনর ভিদিরে এই দাসত্বসুলভ মনোভাপ আগে আমার পুঝি ফেলা পরিবো। আমার মনর মালিক আমি নিজে, সালে আগে আমা মনানিরে আমি সরান দিই, ঔপনিবেশিক মানসিকতা ঝারি ফেলেই। আমি আমার হধা, হাবর-চোবর, নাচ-গীত ইয়েনিলোই ন লাজেবঙ, সালেই আমার দাবির অর্ধেক গারেগায় পুরন অহ্্ব’।

মাদি, জুলাই, ২০১০, আট্য বঝর, নাদা-৫২

হমলে গরি জানিবোঙ আমি রাজনীতি ?

সুনানু বিদি যেয়ে এম. এন. লারমা হোয়ে, ‘‘রাজনৈতিক অধিকার ছাড়া হন অধিকার তিগি থেই ন পারে।’’ রাজনৈতিক অধিকার অহ্ল’ সে বলা মাদিঘান যুওত যে হন অধিকার – অর্থনৈতিক, সামাজিক, ধর্মীয় বা ভাষাগত অধিকারর চারা লাগেলে সে অধিকারর ভালেদর ফসল আমি ঘরত তুলি পারিই। আর রাজনৈতিক অধিকার যদি হন জাদর ন থায় সালে হন অধিকারর বিজিই সে জাদর বুঘত গেজেই ন পারন। সেনত্তেই, আমি রাজনীতি গমপেই বা ন পেই, জিগুনে রাজনীতি গরন তারারে হোচপেই বা ন পেই – রাজনীতি আমা জিঙহানিঘান চেরোপালাত্তুন বেরেই থেবই থেব।

এম. এল. এ. ওহ্বাত্তেই রাজনীতি, চাগুরি পেভাত্তেই রাজনীতি – ইয়েনি রাজনীতি নয়, সুবিধেনীতি। দঝর ভালেদত্তেই দঝরে লোনেই হাম গরানাই অহ্লদে আঝল রাজনীতি। আর এ দঝর ভিদিরে নিজরে যেমন গনি পারে, তেমনি ধরি পারে নিজর ঘোরবো আ জাদরে। সেনত্তেই দোল রাজনীদিয়ে দঝর ভালেদর লঘে নিজর, নিজ’ ঘোরবোর আ নিজ জাদরো ভালেদ গরিবো হামাক্কায়।

একখান হধা আঘে, ‘তিবুরার চাঙমাগুনে নিজে রাজনীতি ন গরন, তারারে পরে রাজনীতি গরান্নে।’ হধাগান তোলেই চেলে মিঝে নয়। একজন প্রকৃত রাজনৈতিক কর্মীর হামেধি তার জাদর, বামর জনগনর আহ্ওজর ছাবা ফুদি উধিবো। কিন্তু চাঙমা রাজনৈতিক কর্মীগুনে তারার জাদর মানুষ্যুনোর রাজনৈতিক চেতনা ফুদেই তুলনার মধ্যেদি নিজর সমস্যা নিজে সমাধান গরিবার আন্দোলনত নেতৃত্ব দি ন পারন। তারা হাম গরন নিজ জাদর গনতান্ত্রিক ধাবপানিরে চাবেই থোবার বা জুদো পধেদি নেযেবার এজেন্ট ঈজেবে। তারা নিজর জাদর হধা মু খুলি হধে এমন ডড়ান যে, মানুজে মনে গরিভাক তারা হন খুন বা ডাগেদি গরিভার তেম্মাঙ গরধন। অথচ তারারই আকমোলিগুনোর জিঙহানি তলবিচ গরিলে আমি দেঘিই যে, তারা আন্দোলন গড়েই তুলিবাত্তেই হন’ এক্কান বামত যেনেই সে বামর মানুষ্যুনোর সমস্যা জানিবার চেষ্টা গোচ্চোন্দোয়, পরেধি সে সমস্যাগানি উগুরে ভর গরিনেই গণ আন্দোলন গড়ি তুল্যন। কারণ, গণতন্ত্রত দঝর ধাপ-আহ্ওজই আঝল হধা। যে তন্ত্রয় দঝর ইচ্ছেরে দাম ন দিবো সিয়েন যে কোন তন্ত্রই ওহ্ক, গণতন্ত্র কিন্তু নয়। সেনত্তেই যেধকদিন সঙ চাঙমা রাজনীতি গরিয়েগুনে নিজর বামর, নিজর জাদর মানুষ্যুনোর ধাপ-আহ্ওচ্চানিরে দাম ন দিবাক সেধকদিন সঙ তারার নিজর থিধেবি যেমন দরমর ন অহ্ব’ নিজর জাদরো হন ডাঙরমাক্যা ভালেত ন অহ্ব’।

মাদি, জুন, ২০১০, আট্য বঝর, নাদা-৫১

হমলে সোর অহ্বঙ আমি ? হমলে সোর অহ্ব’ আমার বিঝুমেলা ?

পত্তি বিঝু মেলাত আমার হিঝু না হিঝু ভুল অহ্য় আ হোয় এযেত্তে বঝর গমে দালে গরিবোঙ। বিঝু হুরে হুরে তে আমার উছ্য উধে বিঝু মেলা গরিভার। সে পরেধি বানেবঙ ইক্কো সংসার পারা কমিটি। বেচভাক মেম্বারেই খবর ন পা’ন তারা বিঝুমেলা কমিটিত আঘন গরি আ খবর পেলেয়ো খবর ন পান কমিটিবোত তার আঝলে হন দায়িত্ব আঘে নেনা। আ একদাঘির কমিটির হাগোচ্চান আহ্দত পরিনেই হবাল চিধে অহ্য় – বঝর বাগেনে তা নাঙান থায়, আ এবারত হি নেই ? সিয়েন হা হরম ? তে ইন্ধি দিনে-রেদে খাদি খাদি মরিবাক বানা হয়েক জন। মাত্তর অক্ত এলে কারবারির রাত নেই। সেক্কে হাত্তুন হন্না দাঙর ফোলেই পারে তার জিদেজিত্যে চলে। বিঝুমেলার আগেধি মেলাঘান হিঙিরি দোলগরি পারা যায় সেনত্যায় বল দিবার হনজন নেই, কিন্তু মেলার পরেধি মেলাঘান হেত্তেই দোল ন অহ্য় সে চর্য্যা গরিয়ে সয়সাগর।

রেজ্যভিত্তিক, বামভিত্তিক, আদাম ভিত্তিক – বে’ক ভিত্তিক বিঝুমেলার আমার এগই আহ্বাল। আঝলে আমিই ঠিক নেই, তে আমার বিঝু মেলা হিঙিরি ঠিক থেব’ ? আর ভাবিলে আনুধোর লাগেদে এই কারনে যে ২৯ বার জঘা চেনেয়ো যার ন অহ্য় তার আঝলে হনদিন অহ্ব’ নেনা।

এবারত তেম্মাঙ চলের ইন্টারন্যাশনাল বিঝু ফেস্টিভ্যাল মানে আন্তর্জাতিক বিঝুমেলা মানে গদা পিত্থিমির চাঙমাগুনোরে লোনেই গদা পিত্থিমির চাঙমাগুনোত্তেই বিঝুমেলার আরকানি গরিভার। মানে যে ঘরর উদোনত লদক-ধদক গরি আহ্দে তে যেব’ অলিম্পিকত দুমুরিবাত্যায়। এবারত আমি তারে হি আহ্দা-আহ্ত্যা যে যিঙিরি পারে বল দিবঙ নাহি বাচ্যেই থেবঙ গদা পিত্তিমি মুজুঙে লাজ ফেলোক ফেলোক গরি, লাজ ফেলেলে তে থাজা গরি জোল গরিবোঙ।

মাদি, মে, ২০১০, আট্য বঝর, নাদা-৫০

বিঝু আমার ধার তাগলান

বিঝুত আমি আহ্জি-রঙ্গে দিন হাদেবঙ। সঙ-সমাজ্যে মিলিবোঙ। দুরোদুরিত যিঘুন থেই নিজ নিজ আদামর ঘরত এভঙ। বাপ-মা, ভেই-বোন্নোই মিলিবোঙ। ইত্য-সহুদুমে মিলিবোঙ। পুরোন বেক চিগোন-চাগোন মন বিজিরা-বিজিরি, বন্নাম গরাহ্-গরিহ্ পুরিহ্ ফেলেনেই নুও জিংহানির বাক আগুলেবার মনঝুক গরিবোঙ।

বিঝুত আমি তবনা গরিবোঙ বেঘর জিংহানি ভরি উধোক তজিম সুঘে। বেঘর সুঘেই নিজর সুঘ। চেরোপালা আগুন বাঝেই দিলে নিজর ঘরানো আগুনে লেহ্বায়। আগুনে নানু ন চিনে। সেনত্তেই বিঝুত আমি বানাহ্ বার দেঘেবাত্যাই জিদেজিত্যা গরি গোরবা-গোরবিরে দামী দামী ‘কোল্ড ড্রিঙ্কস্’ ’ ‘হট ড্রিঙ্কস্’-র বদল নহ্ গজেবঙ। লগে থেব’ আমার পোচপানার নরম আহ্দে বানেয়ে বিনি পিধে, সান্যে পিধেয়ো। বিঝু আমার দানর দিন। সেনত্যেই বেঘ’ আগে পোত্যে মাধান আমি কুরোহ্ আধার দান দেনার মধ্যেদি বিঝু দিন্নো ফাঙ গরিই। সারা দিন আমি দান গরিই – সুওত গুরো-গুরি ন লাগে, জাত-বেজাত ন লাগে। সে দানর ফলানরে গারুহ্ গরিবাত্যাই হিঝু শীলো যে আমার পালা পরিবো এ হধাগান আমি পুরিহ্ ন ফেলেবঙ্গোই।

বিঝুত আমার মনত উধে – পিত্থিমির যে যে হনাত থেদঙ সাত – আমি চাঙমা। জাদর সুধোম-সংস্কৃতিরে পোতপোত্যা গরিভার দিন আমার ইভ্যা। জাগায় জাগায় আমার বিঝু অক্তত বিঝু মেলা, বিঝু পালনী, সাংস্কৃতিক উৎসব – ইয়েনিত আমার নাচ, গীত, হাহ্রা – এ শিঙোরানি দরহ্মরহ্ গরিভার আরকানি নেযেবঙ। চিগোন-ডাঙর জধায় হধাআলাম ফগদাঙ গরি আমার ভাষাগানরে বলবলা গরিবোঙ। বিঝুদিন – মিলিবার দিন। এ দিন্নোত আমি বেঘে মিলি তেম্মাঙ গরিবোঙ – আমাহ্ জাত্তোরে হিঙিরি ধর্ম, শিক্ষে, অর্থনীতি, রাজনীতি – এ বেক হিত্যাধি তজিমপুরো গরিবোঙ।

মাদি, এপ্রিল, ২০১০, আট্য বঝর, নাদা – ৪৯

শিব চরন ঈদোদী বঝর পালানা

কবি সুনানু অনিল বরন চাঙমার ডাগনি মজিম এ বঝরবুও গদা তিবুরাত ‘আদি কবি শিব চরন ঈদোদী বঝর’ ইজেবে পালন গরা অহ্র। ইয়েন এক্খান ভারি দোল আরকানি ভিলি আমি মনে গরিই। আমার কোজলী থেব বানা তিবুরাত নয়, গদা পিত্থিমিত যিদু যিদু চাঙমা আঘন ভেক্কুনে – যে যিঙিরি পারে – মিলনী সভা গোরিনেই, লেঘা লেগিনেই, তা জিঙহানি পইদ্যানে তালাভি গোরিনেই, গীত গেনেই, কবিতা জরেনেই – যার যিঙিরি আরি আঘে এ গদা বঝরবোত আমি আমার আদি কবিবোরে ঈদোত তুলিবোঙ।

বিদি যেয়ে পয়নাঙী হাররে ঈদোদ গরানাহ্ নিজর শিঙোর তোগানা। নিজে আক্কোই যেবার পদ তোগানা। বুঘর ভিদিরে বল ভরানা। ম হিয়েত যে সে পয়নাঙী মানুচ্চুনোর লো এভ’ সঙ বোই যার, ম মাধাত যে তারার মেধাগানি এভ’ সঙ জমা আঘে সে হধাগান নুও গরি ঈদোত তুলোনা। সেনত্যেই তারারে ঈদোত তুলনা । যারারে ঈদোত তুলিবোঙ তারার নয়, আমনরই দরকার।

মাদি, মার্চ, ২০১০, আট্য বঝর, নাদা – ৪৮