রুধুক মরা জাদর লেমপচ্যা রাজনীতি

 

১৯৪৭ সনর ১৫ আগস্ট ভারদ স্বাধীন অহ্য়। তার ঠিক দি বঝর দি মাঝ পরে তিবুরা রেজ্যঘান ভারদর লঘে মিঝি যায় ১৯৪৯ সনর ১৫ ই অক্টোবরত। সারা ভারদর লঘে ১৯৫২ সনত তিবুরাদো ভোট অহ্য়। লোকসভা আ ইলেকটোরাল কলেজর ভোট। সেক্কেনর চাঙমাঘুনোর রাজনৈতিক ভাবে হন চেতনা এল ভিলি মনে ন অহ্য়। যদিও সেক্কেনে মাছমারার লেদ্রাই দেওয়ান তিবুরার রাজা বীর বিক্রম কিশোর মানিক্যর সভাত ‘সর্দ্দার’ উপাধি লোনেই তিবুরা রাজসভাত বজিভের জু পেয়ে আ কাঞ্চনপুরর ফরা কিংকর চাকমার দশরথ দেবর গণমুক্তি পরিষদর লঘে যোগাযোগ এল ভিলি শুনো যেয়্যে। সেবাদে ত্রিশর দশকর ত্রিপুরা রাজ্য গণ পরিষদ বা ত্রিপুরা রাজ্য জনমঙ্গল সমিতি, চলি­শর দশকর জনশিক্ষা সমিতি, গণমুক্তি পরিষদ বা কংগ্রেস-কমিউনিস্ট-ফরোয়ার্ড ব্লক হন দলদোই চাঙমাঘুন গমেদালে ঘুনজি-মুনজি এলাক ভিলি খবর পা ন যায়। যদিও উপজাতির মধ্যে তারা লোক সংখ্যাদি এলাক দ্বিতীয় আ শিক্ষাদীক্ষাধিয়ো এলাক ত্রিপুরী স¤প্রাদায়র ঠিক পরে। তিবুরার চাঙমাঘুনোর এ রাজনীতি অনীহার হয়েকখান কারন আঘে। সিয়েনি অহ্লদে- ১) রেজ্যর রাজধানীত্তুন দুরোত থানা, ২) জুম হাহ্নার কারনে বরবেজ ডাঙর আ ঠায়ঠিক আদাম বানি ন থানা আ ৩) সেক্কেনর রাজনৈতিকভাবে নবজাগরিত ত্রিপুরী স¤প্রাদায়র লঘে হধার অমিল। এ অমিলর কারনেই জনশিক্ষা সমিতি বা গণমুক্তি পরিষদ চাঙমাগুন্নোয় বরবেজ হুদুম বানেই তুলিবার চেষ্টা ন গরে। সুযোগ পেধ’ মনুগাঙর মাধব চন্দ্র চাকমা জনশিক্ষা সমিতির নেতাগুন্নোয় আহ্দ মিলেলুন ভিলিনেই আমার বিশ্বেজ। যেহেতু তে একই সময়ত একই চেষ্টা গরিভার চেয়ে চাঙমা বামানিত। এমনকি মহারাজা বীরবিক্রম তার যে ‘পঞ্চ ত্রিপুরা প্রজা তালিকা’ নিহ্গিলেয়ে সুয়োদ চাঙমাগুনোর নাঙ ন এল।

দেঝভাগর লক্কে দঘিন কুলত্তুন এচ্ছে নেতাগুনেয়ো ইধু রাজনৈতিকভাবে তেমন প্রভাব বিস্তার গরি ন পারন্ধি। একমাত্র øেহকুমার চাকমা তার ট্রাইবেল ইউনিয়ন নিনেই হিঝু চেস্টা গচ্ছে। হিন্তু মূলতঃ দশরথ দেবর লঘে তার মতাদর্শগত ফারগ থানার ফলে তে ইধু বরবেজ প্রভাব বিস্তার গরি ন পারে। তার মতাদর্শ এল জাতীয়তাবাদী হিন্তু দশরথ দেব কমিউনিস্ট । আর ত্রিপুরী স¤প্রাদায়ত দশরথ দেবর প্রভাব সেক্কেনে হোবার নয়। ত্রিপুরী স¤প্রাদায়র জাতীয়তাবাদ তার অনেক পরে গাবুচ্যাঘুনোর আহ্ত ধরিনেই ১৯৬৭ সনত উপজাতি যুব সমিতি জনম দেনার মধ্যেদি পত্থম প্রকাশ পেয়ে।

তিবুরার চাঙমাঘুন আধুনিক গণতান্ত্রিক রাজনীতির লঘে পত্থম মুওমি ওহ্য়োন যেক্কে ১৯৬৭ সনত বিধান সভার ভোট ওহ্ইয়ে। সে পরেধি ১৯৭২ সনত তিবুরা তজিম রেজ্য অহ্লে গদা তিবুরাত পুরোদমে রাজনীতি আরাম্ভ অহ্য়। ছড়াছড়ি থুমোর চাঙমাগুনোর মোনো ঘরে-ঘরেয়ো ভোটর রাজনীতির আহ্বা লুঙো ধচ্ছেগোই সেক্কেত্তুন ধরি।

সিত্তুন ধরি ইক্কুনু সঙ চাঙমাঘুনোর রাজনীতির নাললো গমেদালে রিনি চেলে একখান হধা পরাগ পরাগ অহ্য়দে যে, তিবুরার চাঙমাঘুনে আঝলে নিজে হন রাজনীতি ন গরন, তারারে অন্য মানুঝে বা দলে রাজনীতি গরান্নে। চাঙমাঘুন হয়ত এভ রাজনীতির র-বাদাজ ন পেয়ে গরি একঘাচ্চে গরি থেলাক্কুন-যদিনা তারার ভোটতুনো লুভে হন দল আক্কোয় ন এধ’। ইলেকসনত জিদিদ’ গেলে ভোটর দরকার আ সে ভোটর হন জাত নেই। সেনত্তেই চাঙমাঘুনো ইধু যা পচ্চে বলে অহ্লে। হিন্তু চাঙমাঘুনত্তুন এ চেতনাঘান ন এলধে যে, ভারদ স্বাধীন ওহ্ইয়ে, তিবুরা পূর্ণ রেজ্য ওহ্ইয়ে, এবার আমাত্তুন আমি একজন পাধেবং দেঝ শাসনত আমার সুঘ দুঘর হধা হোভাত্তেই। যিয়ানরে হলঙুন আমি রাজনৈতিক চেতনা। যেককে মানুঝে রাজার আহ্নজামে দায়িত্বশীল সরকার দাবী গত্তন, তজিম রেজ্যত্তেই দাবী গত্তন – সেক্ষেনে চাঙমাঘুন এলাক অঘুর ঘুমত। এভ সঙ সে ঘুম ন ভাঙে।

চাঙমা নেতাঘুন রাজনীতি এক্কা উক্কো গত্তন ধরিনেই মূলতঃ কংগ্রেস আ সিপিআই(এম)- এ দিব্যা সর্বভারতীয় দলত থেনেই রাজনীতি গচ্ছোন। হিন্তু হন দলদোই তারা নিজর জাদর রাজনৈতিক গুরুত্ব বাড়েই ন পারন। সেনত্তেই তারা নিজর জাদর হন’ দাবীয়ো আদায় গরি ন পারন। উপজাদিঘুনো ভিদিরে জন সংখ্যাধি দিনম্বর অহ্না সত্বেয়ো এভ’ সঙ তারারে হন’ দলেই একখানত্তুন বেজ কেন্দ্রত নমিনেশন ন দে। তারার ভাষা সুমুত্তো হন’ ইস্যুই হন’ পাধির নির্বাচনী ইস্তেহারত জাগা জুরি লোই ন পারে। ইয়েনি ভেক্কানি চাঙমাঘুনোর রাজনৈতিকভাবে গুরুত্ব ন থানার কারনে – রাজনৈতিক অসচেতনতার কারনে। ইয়োত আমি তেকহাবা গরি সর্বভারতীয় আ আঞ্চলিক দলত আবুজি চাঙমাঘুনোর রাজনীতি গরিভার বৈশিষ্ট্যঘানি তলবিচ গরি পারিই –

১) সর্বভারতীয় দলত থেনেই রাজনীতি গরানা ঃ- তিবুরার হন’ রাজনৈতিক দলই উপজাতি ভোটতুন এলাফেলা গরি ন পারন। কারন তারার ইক্কো ডাঙর চিল্যার সমর্থন ছাড়া তিবুরাত হন দলই ক্ষমতাত তিগি থেই পাত্ত নয়। হিন্তু চাঙমাঘুনে হন সর্বভারতীয় রাজনৈতিক দলদই থক ন পান। কংগ্রেস বা কমিউনিস্ট বা তারার ছাত্র সংগঠনুনোর রেজ্য কমিটির মেম্বারর তালিকাঘানি চেলে সিয়ান পতপত্যা গরি বুঝি পারা যায়। সেবাদে এ দলুনোর ‘ত্রিপুরী তোষণ নীতি’ চাঙমা, মগ আ অন্য চিগোন-চাগোন উপজাতিঘুনোর রাজনীতিত ডাঙর ওহ্বার পধত গর ওহ্ই থায়।

২) উপজাতি ভিত্তিক আঞ্চলিক দলত থেনেই রাজনীতি গরানা ঃ- নাঙ উপজাতি ভিত্তিক রাজনৈতিক দল অহ্লেয়ো হিন্তু ইঘুন মূলতঃ ‘বরক জাতীয়তাবাদী’ রাজনৈতিক দল। ইঘুনোর উগ্র বরক জাতীয়তাবাদর ঠেলা চাঙমাঘুনোর আর বেজ গায় ন সুওয়।

হিন্তু উগুরোর দো জাদর রাজনৈতিক দলই চাঙমাঘুনোরে লারঝার গরন – তারার ভোটব্যাঙ্ক বারেবাত্তেই। চাঙমাঘুনোর রাজনৈতিকভাবে গুরুত্ব ন থেবার আর হয়েকখান কারন আঘে। সিয়েনি অহ্লদে –

১) ধারাবাহিক রাজনৈতিক তম্ভার অভাব ঃ- নেতার বেঘত্তুন ডাঙর হাম ভিলে নেতা বানানা। হিনতু চাঙমা নেতাঘুনে তারা বানেয়ে জাগাগানি আর গমেদালে ধরি রাঘেবাত্তেই হন’ নুও গাবুচ্যা নেতা তম্ভা তুলি ন পারন বেজভাগে।

২) নেতাগুনোর ঘন ঘন দল বদলনা ঃ- চাঙমা নেতাঘুন, বিশেষ গরি মাচ্ছেঙ আ চিগোন সাইজর নেতাঘুন হাক্কে হাক্কে দল বদলাদে দেঘা যায়। ফলে তারা লঘে সয়সাগর কর্মীরো হন’ রাজনৈতিক থিদাবি ন থায়। ফলে সামগ্রিকভাবে চাঙমা সমাজ এচ্ছে ‘ফ্লোটিং ভোটার’ত পরিণত ওহ্য়োন।

৩) নেতাগুনোর মধ্যে গম রাজনীতিবিদর অভাব ঃ- চাঙমা রাজনৈতিক নেতাঘুন হুব সহজভাবে নেতা ওহ্দাক চান। তারার অনেকর শিক্ষাগত যোগ্যতায়ো হম। ফলে তারার চিন্তা আ নেতৃত্বত গভীরতা ন থায়। তাছাড়া বেজভাগ নেতায় বিশেষ গরি মাঝারি আ চিগোন নেতাগুনে হন মতাদর্শগত বা ইস্যুভিত্তিক রাজনীতি ন গরন। তারার রাজনীতির লক্ষ্য হন দাবী আদায় বা হন মতাদর্শর থিদাবি ন ওহ্নেই সাধারণ চিগোন-চাগোন ব্যক্তি স্বার্থ – যেমন, চাগরী পানা, লোন পানা বা অন্যান্য সুযোগ-সুবিধে পানা- এধক্কে উদ্দেশ্য লোনেই রাজনীতি গরানার ফলে তারার হন স্থায়িত্ব ন থায়। যেধকদিন পর্যন্ত চাঙমাগুনর এ সুবিধাবাদী রাজনীতি থেব সেধকদিন পর্যন্ত চাঙমাগুনে আঝল রাজনীতির উদো ন পেভাক আ রাজনৈতিক পরিপক্কতা আ দূরদর্শিতায়ো ন জন্মিবো। এঝ সঙ নেতাঘুন সুমুত্তো তিবুরার গদা চাঙমা সমাজচোর হার’ জন ইধু হন’ স্থায়ী গুরুত্ব নেই।

বেগ’ জেরে চাঙমা রাজনীতির দিয়েন নুও পধ তলবিচ গরিবোঙ-

১) নুও বাবদর উপজাতি ভিত্তিক রাজনৈতিক সংগঠন ঃ– ইক্কুনর উপজাতি ভিত্তিক রাজনৈতিক সংগঠনুনোর এই উগ্র বরক জাতীয়তাবাদ হিন্তু একদিন এ বরক জাদিগুনোরেই ক্ষতি গরিব। তারার তারার মধ্যে অমিল বাদ দিলেও তিবুরার ১৯ চো উপজাতিত্তুন অর্ধেকর মত লোকসংখ্যা এ বরক জাদর বারে। অর্ধেক উপজাতির রানৈতিক উচ্ছাকাঙ্খা পূরণ অবার হন আরি ন থেলে বেসুনজুক দেঘা দেদে বাধ্য। সেনত্যেই বরক জাতীয়তাবাদর বিপরিতে বেক উপজাতিঘুনর লোকসংখ্যা অনুপাতে সুযোগ থায় পারা (অনেকটা হিল চাদিগাঙর আঞ্চলিক পরিষদর মডেল) এমন হন রাজনৈতিক প্লাটফর্ম খাড়া গরেলে বেঘর ইধু গ্রহনযোগ্য অহ্ব ভিলি আমার মনে অহ্য়।

২) চাঙমা ভিত্তিক নুও রাজনৈতিক দল বানানা ঃ– এত হম লোকসংখ্যালোই ছিনে-ছিন্নে চাঙমা বাম্মোই বানা চাঙমাত্ত্যেই হন রাজনৈতিক জধা বানেবার হধা হলে বেজভাগে অসম্ভব মনে গরিভাক। হিনতু কোয়ালিশন পলিটিকস্-র যুগোত হন হিচ্ছুই অসম্ভব নয়। সিয়েন এক্কান সহজ উদাহরন দিলেই বুঝো যেব’। মনে গরি হন এক্কান বামত ১০০ জন ভোটার আঘন আ সুওত দিবে ডাঙর দল আঘন। তারার সমর্থকর সংখ্যা মনে গরি, গেলে­ বারত জিন্নেদে ইভের ৬০ আ ন জিনেদে ইভের ৪০। এবাম্মোত মনে গরঙ ১০০ জনর ভিদিরে ৭০ জন চাঙমা। এই ৭০ জন চাঙমাত্তুন মুই যদি ১৫ জন ভোটারো টানি পারঙ্গে অহ্য় সালে মুই যে পাদিরে মনে অহ্য় সে পাধিরে জিদেই দি পারিম। আর মুই বিরোধিতা গরিম্মে পাধিবো জিবনে জিদি ন পারিবো। এস্যান পজিশনত এলে যেকোন ডাঙর দলই ত লঘে কোয়ালিশন গত্তে বাধ্য। ‘রাজনৈতিক অধিকার’ নিজে হন দাবী নয়। রাজনৈতিক অধিকার অহ্লদে পধ। পধ ন থেলে যেমন হন জাগাত্তুন হন জিনিষ আনি ন পারেগোই সেধক্ক্যে রাজনৈতিক অধিকার ন থেলে হন দাবী পূরণ অহ্বার নয়। সুনানু এম এন লারমা হোয়্যে “রাজনৈতিক অধিকার ন থেলে হন অধিকার তিগি থেই ন পারে।” আমার চেষ্টা থেব’ সেনত্যেই চাঙমাঘুনোর রাজনৈতিক চোগ ফুদেই তুলিনেই রাজনৈতিক অধিকারর পত্থান আগে বানানা দবদবা গরি, সালেই ইস্কুলত আমার চাঙমা অহ্রগে চাঙমা লেঘা চালু সুমুত্তো অন্যান্য হন দাবিই অপূরণ ন থেব’।

(বিঝুগুলো-৭, ২০০৫)

Advertisements

মুই নয়ঃ আমি-ফুল সদক শাক্য

love-quotes-pics-sayings-pictures-e1434456688638

দুই বা তাত্তুনবেচ মানুচ সঙমনঝুগে সঙবদিলে জধা বদানাহ্ হুও অহ্য়। একঝাক ‘মুই’ সঙমনঝুগে জধাত ‘আমি’ অহ্ন আ জধার আঝল বলান এ ‘আমি’ উগুরে। জধাত হাম গরধে ‘মুই’য়ানি জেধক বেচ দুবিবগোই সেধকবেচ ‘আমি’য়ান পরাক পরাক অহ্ব’ আ জধাবোর বলান সেধকবেচ বারিবো। তলর চিগোন চিগোন হামানি গরিলেহ্ আমা জধাগুনোত ‘আমি’য়ান বলবলা অহ্ব’ঃ

(১) বেঘরে জানেনেই হাম গরানাঃ পত্তি জধাত আঝলে হয়েকজন মুলুগেই উধিচ আ পইধ্যে থির গরন। মাত্তর তুও সিয়েনি ভেক্কুনোরে জানা পরে আ সিয়েন গরা পরে হামাক্কায় থির গরিভার আগে। হন’ চাবাঙিয়ে জেন হন’ দিন ভাবিবার জু ন’ পান জে বানা হয়েকজনে মনেমনজক্কাগরি জধাবো চালাদন। ‘হি গরিভোঙ’, ‘হেত্তেই গরিভোঙ’ আ ‘হিঙিরি গরিবোঙ’ – এ পুঝোরানির পোতপোত্যে জুওপ ন’ থেলে হন’ জনে মুরভেদি হাম গরি ন’ পারন। সেনত্তেই জেধক বেচ চাবাঙিরে আমি বে’ক হিঝু আগে ভাগে ভাঙিচুরি জানেই থবঙ সেত্তোমান বেচ তারা জধাবো লঘে এগত্তর ওহ্বাক আ ‘আমি’ মাত্তুও ভাজাদি উধিবো।

(১) বেঘরে জানেনেই হাম গরানা ঃ পত্তি জধাত আঝলে হয়েকজন মুলুগেই উধিচ আ পইধ্যে থির গরন। মাত্তর তুও সিয়েনি ভেক্কুনোরে জানা পরে আ সিয়েন গরা পরে হামাক্কায় থির গরিভার আগে। হন’ চাবাঙিয়ে জেন হন’ দিন ভাবিবার জু ন’ পান জে বানা হয়েকজনে মনেমনজক্কাগরি জধাবো চালাদন। ‘হি গরিভোঙ’, ‘হেত্তেই গরিভোঙ’ আ ‘হিঙিরি গরিবোঙ’- এ পুঝোরানির পোতপোত্যে জুওপ ন’ থেলে হন’ জনে মুরভেদি হাম গরি ন’ পারন। সেনত্তেই জেধক বেচ চাবাঙিরে আমি বে’ক হিঝু আগে ভাগে ভাঙিচুরি জানেই থবঙ সেধক বেচ তারা জধাবো লঘে এগত্তর ওহ্বাক আ ‘আমি’ মাত্তুও তারা মনত ভাজাদি উধিবো।

(২) বাগেনিহ্ গরানা ঃ বাগেনিহ্র ধারাচ মানেয়োর মনর আরাঙ হাচ্যেক। হাম গরধে বাগেনিহ্ মানুঝো মনত উচ্ছো আনি দে। বাঘেনি সারা হাম গরানা জেন হুলুক পানিলোই গাধে পারা। গাধিলুঙ মাত্তর বলপেয়ে ন ওহ্লুঙ। হন’ চাবাঙিয়ে হন’ হাম গমে উহ্বেলে জেমন তারে বাগেনিহ্ গরিভার দরকার আঘে সেজান হন’ মুলুগোর মলাহ্দারিত হন’ বাক ধুজিলেগোই তারেয়ো আমার হামাক্কায় বাঘেনি গরা পরিবো। বাগেনিহ্ অঝার মনর চিন। পাদারা মানুঝে হাররে বাগেনিহ্ গরি ন পারন। চিদোর বধুত্তুন আমি তারে তে বাগেনিহ্ গরি পারিলে জধাত ‘আমি’য়ান বোনবোন্যে ওহ্ই উধিবো।

(৩) বেঘর হধাত সঙগরি আমল দেনা ঃ জধাত চাবাঙি ওহ্ক, মলাহ্দার ওহ্ক বেঘর হধাত সঙ আমল দ্যে পরিবো। হন’ চাবাঙিয়ে জ্যেন তারা হধানি জধাত হন’ হামত ন জুওই – এ হধাঘান ভাবিবার জু ন পা’ন। হন’ জনর হন’ হধা জনি হন’ হারনে আমল দি পারা ন জায় সালে হুও পরিবো – অমুগে হোয়েধে হধাগান জনিয়ো ভারি দোল মাত্তর সিয়েন গরিলে আমার এই এই বাবদর লভাদোচ্ছে ওহ্ই পারে। সেনত্তেই সিয়েন আমি এক্কেনা পাজারা ফারিনেই এধক্কে গরি গরি পেভঙ। ইঙিরি গরিলে দেঘা জেব’, হুরোভোয়ো ন মরিবো গরবাভোয়ো হুহ্জি অহ্ব’। আঝল হধাঘান অহ্লদে, জেধক্কন সঙ বেক চাবাঙিগুনে মনে ন’ গরিভাক, এ জধাবো আমা বেঘর হধায় চলের, বানা এক বা দিজনর হধায় ন চলের, সেধক্কন সঙ তারা সে জধাবোরে নিজোর মনে ন’গরিভাক আ ‘মুই’য়ান উগুরে উধিবো, ‘আমি’ঘান তল পরি থেব’।

(৪) হধা হধে সজাক থানা ঃ দঝ’ হাম গরিলে দচ জন্নোই উধোন-বঝন গরা পরে। দচ জন্নোই উধোন-বঝন গরিলে দচ জনর মন রাঘেনেই হধা-বাত্তা হুও পরে। গঙে গঙে বেথারত দাদ’ সেরেদি নিহ্গিলি জেয়ে চিগোন চিগোন হধায় হন’ জধারে রুক্যে বানেই পারে। সেনত্যেই হধা হধে আমার অনসুর সজাক থা পরিবো। গপ দেনা আ নিজোর বাঘেনি গরানা জধার থবাক ওহ্জোরেই নেজায়। জিগুনে মনে মনে নিজোরে চিগোন ভাবন, সিগুনে পর’ ঈদু গপ দিনেই নিজোরে দাঙর বানেদাক চা’ন। গপ ‘আমি’রে চাবিনেই ‘মুই’বোরে অজল গরে আ লগে জধার এগত্তররে পগরা বানায়।

(৫) ওমি ন অহ্না ঃ মুই হঙত্তে সিয়েন ওয়ই পরিবো, তারা হদন্নে হধানি ভেক্কানি বজঙ – এ মনর ভাপ্পান থেলে জধা গরি ন পারে। পরর হধা মানি নেজানা চিগোন অহ্না নয়, সিয়েন অঝার মনর চিন। বেঘর মতামতে তেম্মাঙত জিয়েন গঝি লুও অহ্ব’ সিয়েন মুলুক-চাবাঙি বেঘে মানি চলিলে পেজাল উধিবার হধা নয়। ইয়েনো অনসুর দেঘা জায়দে জে, তেম্মাঙত বঝিলে বেচভাক চাবাঙিয়ে অলর গরি থেবাক আ তেম্মাঙত্তুন নিহ্গিলিলে তে’ ইয়েন ন’অহ্য়, উভোন ন’অহ্য়, তারে ইয়েন, উতারে উভোন হোভাক। জধা গত্তে এ হাচ্যেক্কানি এগ’পরা বজঙ। আ একদাঘি আঘন, তারা গদা বঝরভো হন’ হিচ্ছু উদো ন’লোয়ে গরি থেবাক, হলেয়ো নানান হিচ্ছু দেঘেনেই পাজারা ফারি জেবাক্কোই। মাত্তর হন’ হাম গত্ত গেলেই তারা আগে র’ মেলিভাক – সিয়েনদ’ এধক্কে গত্তাক না দোল ওহ্লুন, মরে দ’ ন’ জানান – আর’ হদ’ হি। এ ভেক্কানি আমা সান চিগোন চিগোন জধা গরিয়ে গুনোত্তেই বর বর হেরাপ। ইয়েনি ভেক্কানি ভেলে ভেলে পার ওহ্ পরে। তেম্মাঙত ভালা-বজঙ বে’ক বাবদর হধা হোভার জু দ্যে পরিবো। হারর হধা থে’ ন’হেয়ে অহ্লে সিয়েন হেত্তেই তারে পরাক পরাক গরি বুঝেই দ্যে পরিবো আ বেঘর মতামতে সিয়েন পাজারা ফারা পরিবো। হারর হধা, সিয়েন জেধক চিগোনই ওহ্ক না মনে হলে, ফুন দিনেই উরেই দিলে, মানুঝোর মনত দুক ফুদে আ মানুঝোর মনর দুঘে জে হন’ জধারে পিঝেদি তানে।

(৬) মুলুক মানানা ঃ মুলুক বানানা আ মুলুক মানানা জধা চালাদে বেঘত্তুন আগাত্যে হাম। গম মুলুক অহ্দে গেলে ভিলে আগে গম চাবাঙি ওহ্ পরে। জে নিজে মুলুক ন’মানে, তে’ হন’দিন মুলুক ঈজেবে মান ন’পায়। বুরো-বুরিয়ে হোয়োন, ‘হোলি দিনোর হোহ্দা ভিলে চোঘো পাদাত’। সেনত্যেই, গম চাবাঙিয়ে তার
নিজোর ভালাত্তেয়োই মুলুক মানি চলন। তে তা মুলুক্কুনোরে জে বাবদর লোবিয়োত গরিবো তে মুলুক অহ্লে তা চাবাঙিগুনোত্তুন থিক সে বাবদর লোবিয়োত পেভ’।

(৭) গম মুলুগোর হাম তাত্তুন অজল মুলুক বানানা ঃ এগা আহ্দে বে’ক হাম গরানা হন’ জনর পক্কেই সম্ভব নয়। জে জধার মুলুক/চাবাঙিঘুন জেধক বেচ হাবিল ওহ্বাক সে জদাবো সেধক বেচ ঝাদি আক্কোব’। সেনত্যেই নিজোরে, লগে জধার ভেক্কুনোরে চোহিত্যেধি হাবিল বানানা ইক্কো মুলুগোর রিবেঙ আরহানির ভিদিরে পরে। পত্তি মুলুক চাবাঙিয়ে জনি বুঝি পারন-‘মুই হি গরিম’, ‘হেত্তেই গরিম’ আ ‘হিঙিরি গরিম’- সালে সে জধাভুওর হাম গত্তে বরবেচ থেবরক হেহ্বার হধা নয়। সে বাদে, হন’ মুলুগেই নিজো আহ্দে তে আরেয়ে বেক হামানি উভেই জেই ন’পারন। সে বুদ্ধোই ওহ্ক বা মহাত্মা গান্ধী- এ হধাগান বেঘর বেলায় সঙ সঙ সত্য। সেনত্যেই তে আরেয়ে হামানি তা পরেধি দোলে আক্কোই নেজেবাত্যেই তা সঙ সঙ, পারিলে তাত্তুনো উজুলো মুলুক বানেই পারানাঘান তার বেঘত্তুন দাঙর হাম।

(৮) দঝর জধা দঝর হধায় চলিবো ঃ এক্কান হধা আমার পরাক পরাক গরি ঈদোত রাঘা পরিবো জে, এক জনে, তে জেত্তোমানই হাবিল হি, সে ওহ্বোলা ওহ্ক না মনে হলে, এক জনে হন’দিন জধা ন’অহ্য়। এক জনে হন’ দিন বে’ক বাবদর হামত হাবিল ওহ্ই ন’পারে আ হাবিল অহ্লেয়ো গায় গায় বেক হামানি ঊবেই ন’পারে। পারিলে মানুঝে জধা ন’বানেলাক্কুন। জধাত বেক বামত্তুন বে’ক বাবদর মুকপাত্তি ন’থেলে আমি সিবেরে তজিম জধা হোই ন’পারিই। এ হধাগানধই ধরা পরে, আমি জধা হিঙিরি চালেই পেভঙ। নানান বাবদর নানান বামর নানান মানুচ জুয়োত এগত্তর ওহ্বাক-সুয়োত আমি হিঙিরি ভাবি পারিই তারা ভেক্কুনে এক বাবদর ভাবিবাক ? সিগুনে ‘পাল্লাত তুল্যে বেঙ’ অহ্নাগানই স্বাভাবিক, অলরগরি সরলগরি মরা বেঙ ওহ্নেই পরি থানাগান অস্বাভাবিক। সালে আমার হি গরা পরিবো ? হারন, বেঘে একসুর, একগঙ, একতাল, একঘজা ওহ্ই ন’পারিলেদ’ ইক্কো দরমর জধা বানেই ন’পারিবোঙ। নানান রঙর, নানান তুম্বাঝর, নানান জাদর ফুলর সান আমারে এক্কান সুদোত গাদেনেই ফুলসরা সান জধা বানায় আমার ‘হি গরিবোঙ’, ‘হেত্তেই গরিবোঙ’ আ ‘হিঙিরি গরিবোঙ’-এ তিনেন হধায়। এ তিনেন হধাত আমি জেধক বেচ একমত ওহ্ই পারিবোঙ, সেধক বেচ আমি এগত্তর ওহ্ই পারিবোঙ। এ তিনেনত্তুন জে হন’ এক্কানত গরবর থেলে বা’ চাবাঙিগুনোর বুঝোদে অসম্বিচ্য থেলে, জধা লভাদঝা অহ্ব’ হামাক্কায়।

(৯) দায়ভার গঝিলনাঃ দায়ভার দেনা আ দায়ভার গঝিলনাজধার জে’ন দিয়েন থেঙ, জে উগুরে ইক্কো জধা থিয়েই থায়। বিচ্চেচ – জে চোঘেদি ন’দেখ্যে তেঙেরাগানে ইক্কো জধারে ঘিরি বাজেই রাঘায়, সিয়েন লঝা অহ্য় দায়ভার দেনা আ দায়ভার গঝিলনার মধ্যেদি। জার জে হামান গরিভার হধা, তারে সিয়েন গরিবেত্যেই দেনারে দায়ভার দেনা হুও অহ্য়। জে হন’ হামর দায়ভার পেলে সিয়ানরে অক্তভিদিরে দোলে ঊবোনা ইক্কো মুলুক/চাবাঙির পলিম হাম। হাম ঊবেই পারিলে অজন মজিম তারে বাঘেনি গরানায়ো গরজ আঘে। দায়ভার দেনা-লনাত হাবিল অহ্লে, ইক্কো জধাত আর ‘মুই’ নয়, ‘আমি’র বলবলা এব’ হামাক্কায়।

(১০) বাক মাবানাঃ হাম গরিবেত্যেই জধা বানানা। বানেবার ভালকভিলোম পরেয়ো জনি চোঘোত পরেপারা হন’ হাম ন’অহ্য়, সালেন বানা চাবাঙিগুনোর নয়, মুলুক্কুনোরো মন চিমেই জায়। মাত্তর, ‘হাম অহ্ল’ না ন’অহ্ল’ অনেক সময় বুঝি পারা ন’ জায়। বিসেচগরি, জে জধাগুনে জাদর আইদিয়োলজি বদলেবার হাম গরন তারার হাম দেভার আ মাবিবার সেত্তোমান উজু জুক্কোল নেই। সেনত্যেই নিজো জধার হামর ফলাফল চিনেনা আ সিয়েনি চাবাঙিগুনো মুজুঙে ফগদাঙ গরানায়ো ইক্কো হাবিল মুলুগোর এক্কান বিরেত হাম। জধার তিন্নো মুর হাহ্মত্তুন ইক্কো মুর হাহ্ম-‘হি গরিবোঙ’-এ হধাগান জেধক গমে পতপত্যা অহ্ব’ সেধক বেচ ‘আমি হি গরিলোঙ’ হহ্বর পাধে উচ্য অহ্ব’। সেনত্যেই হামসিরি (হি গরিবোঙ)র ফলাফলানি – হায়, দুরোর, দেখ্যে, ন’দেখ্যে – এ চের বাবদর গরি আগেত্থুন ধুরি ভাকগরি থলে পরেধি হাম ওহ্য়ে না ন’অহ্য় সিয়েন বুজোধে উচ্য অহ্য়। বেগ’ জেরে হোই পারা জায়, গমহাম, গমত্তেই, গমেদালে গরিলে একদিন না একদিন, একহিত্যেন্দি না একহিত্যেন্দি তার ফল ভেদা দিবোই দিবো।

psshakya22@ymail.com
https://www.facebook.com/profile.php?id=100011172015065
https://chakmamaadi.wordpress.com/

পরিবেত্যেই জেরর লিঙ্কানত বাচ্চেবার হোজলি Mui Noi-Aami