দৈংনাক্যা চাঙমা

এ লেঘাগান ফাঙ গরা জোক হয়েককো র’লোই। র’ঘুন ওহলাককে বিসু, পাইনুন, তারু হল আ হাললান।পরিয়ে সগললককুনোর র’ঘুন পারাপাঙ চিনোঙ চিনোঙ না না লাগের। ইয়েনি বাসিং চাকমা, মংসানু চাকমা, ম্যামা প্রত চাকমা, মেয়ং চাকমা, ঝামং চাকমাদাঘির মুওর হধা। তারার ঘর হিল চাদিগাঙর দঘিনেধি কক্সবাজার জেলার থেকনাপ বামত। তারা ভেককুন দৈংনাক্যা চাঙমা। তারাললোই আমি ফারক ওহয়েই এচচেততুন ৬/৭ সত বঝর আগে। সেনততেই আমাললোই তারার মুওর হধাগানি এততোমান ফারক। বানাহ মুওর হধাদি নয়, তারাললোই আমি উরোন-পিনোনদি আ রিদি-সুধোমদিয়ো ফারক ওহই জেয়েয়োই ভজমান। ভালক বঝর আগে বিজগর বিজোল তেগত আহরা-আহরি ওহইয়ে সে দৈংনাক্যা চাঙমাগুনো পইদ্যেনে আমি এচচে হয়েককান হধা তুলোপারা গরিভোঙ।

আনক্যা, তনচোঙ্যে আ দৈংনাক্যা চাঙমাঃ চাঙমাগুনোর আঝল তিননো ধেলা- ক) আনক্যা চাঙমা, খ) তনচোঙ্যে চাঙমা আ গ) দৈংনাক্যা চাঙমা। আনক্যা চাঙমাঘুন বাংলাদেঝর হিল চাদিগাঙ, ভারদর তিবুরা, মিজোরাম, অরুনাচল প্রদেচ আ আসাম রেচজোত বেচভাগে আঘন। তনচোঙ্যে চাঙমাঘুনোর বেচভাগর ঘরপাদা হিল চাদিগাঙর রাঙামাত্যা আ বানদরবান জেলা। সেবাদে ভারদর মিজোরাম আ তিবুরাদো আঘন। দৈংনাক্যা চাঙমাঘুনোর থান বার্মা বা মিয়ানমারর আরাকানর উততোর বামর রাসিদং, ভুসিদং, ক্যকত আ বাংলাদেঝর থেকনাফ বামত। জনেধি চেলেহ বেঘততুন নাদা উজুলো ওহলাককে আনক্যা চাঙমাঘুন, সে পরেধি দৈংনাক্যা চাঙমাঘুন আ বেঘততুন হম তনচোঙ্যে চাঙমাঘুন। হধা-হাবর-চুবোর-সুধোম রিনি চেলেহ ভারদর আরজো সুধোমর বেঘততুন হায়হুই আনক্যা চাঙমাঘুন, সে পরেধি তনচোঙ্যে চাঙমাঘুন আ আরজো সুধোমলোই বেঘততুন ফারক দৈংনাক্যা চাঙমাঘুন। তারা উগুরে বার্মা-আরাকানর প্রভাপ বেচ। সিয়েন অবস্য ওহবারো হধা। এ বার্মা-আরাকানর প্রভাপ তনচোঙ্যেগুনো উগুরেয়ো হম নয়। তবে জে জিধু জে নাঙে থাদোক চাঙমাঘুন আমি ভেককুন বুতধ ধর্মী।