Changmhaghun Actionist na Reactionist?

 

Nanan leghat ami onsur deghiy `omuk reactionist’ `somukdaghi reactionist’. Ajhole `reactionist’ hi ? Reactionistore bangladhi honne`protikriyashil’. Tar mane ohlode `je protikriya ba reaction gore’. Sadharon cholti meaning ohlode je hono political ba social change goribhar actionot reaction gore aa se changot gor diber chestha gore.

Tobe ami iyot reactionist-or exact meaningot no jebong. Ami iyot uju uju bujibonge, je hono hamot reaction deghai te reactionist. Se nojore judi chei sale debhong ami Changmaghun bhekkun reactionist. Hono jonor hono action sara amar nijo action no oi. Ami je historically jat ijhebe reactionist tar proman aghe. 18th centuryt Ingrecchunor bech tulo-hhajana maganar reaction ijhebe ami taralloi juddho gochyei, 1947-t dech belogor somoyot CHTgan Pakistanot phelei dile reaction gochye S. K. Chakma, 1960s-t Pakistan sorkaror Borgangot godha aa tar fole ek lhagor hure hure manuch dubonar reaction gochye M. N. Larma aa siyen poredhi dangor ohnei dech-hulor ikkunur self determinationor andolonot solong bodolye. Aa ikkuyo Arunachal, Tibura aa Mizoramot Changmagunor je ham/movement-ani degha jar siyeniyo nimon gori rini chele bhekkani reactionary characteror.

রুধুক মরা জাদর লেমপচ্যা রাজনীতি

 

১৯৪৭ সনর ১৫ আগস্ট ভারদ স্বাধীন অহ্য়। তার ঠিক দি বঝর দি মাঝ পরে তিবুরা রেজ্যঘান ভারদর লঘে মিঝি যায় ১৯৪৯ সনর ১৫ ই অক্টোবরত। সারা ভারদর লঘে ১৯৫২ সনত তিবুরাদো ভোট অহ্য়। লোকসভা আ ইলেকটোরাল কলেজর ভোট। সেক্কেনর চাঙমাঘুনোর রাজনৈতিক ভাবে হন চেতনা এল ভিলি মনে ন অহ্য়। যদিও সেক্কেনে মাছমারার লেদ্রাই দেওয়ান তিবুরার রাজা বীর বিক্রম কিশোর মানিক্যর সভাত ‘সর্দ্দার’ উপাধি লোনেই তিবুরা রাজসভাত বজিভের জু পেয়ে আ কাঞ্চনপুরর ফরা কিংকর চাকমার দশরথ দেবর গণমুক্তি পরিষদর লঘে যোগাযোগ এল ভিলি শুনো যেয়্যে। সেবাদে ত্রিশর দশকর ত্রিপুরা রাজ্য গণ পরিষদ বা ত্রিপুরা রাজ্য জনমঙ্গল সমিতি, চলি­শর দশকর জনশিক্ষা সমিতি, গণমুক্তি পরিষদ বা কংগ্রেস-কমিউনিস্ট-ফরোয়ার্ড ব্লক হন দলদোই চাঙমাঘুন গমেদালে ঘুনজি-মুনজি এলাক ভিলি খবর পা ন যায়। যদিও উপজাতির মধ্যে তারা লোক সংখ্যাদি এলাক দ্বিতীয় আ শিক্ষাদীক্ষাধিয়ো এলাক ত্রিপুরী স¤প্রাদায়র ঠিক পরে। তিবুরার চাঙমাঘুনোর এ রাজনীতি অনীহার হয়েকখান কারন আঘে। সিয়েনি অহ্লদে-

ন দোরেম মুই হমলে

লারেই লারেই লারেই চে’ই, লারেই সারা গুদি নেই। সেই লারেই গত্তে দরেলে ন অহ্য়। জাদত্তেই, দেঝত্তেই ঘিলেগান পিঝেদি দিনেই লারেয়োত বুক ফুলেই মুজুঙেধি উজেই জা পরে। পাদারা জাদে, পাদারা মানুঝে লারেই গোরি ন পারন আ লারেই গোরি ন পারিলে অধিকারর হধা হনায়ো তারা মুওত ন সাজে।

মাত্তর আমা তিবুরার চাঙমাগুনোরে রিনি চেলে হধাগান মিঝে মনে অহ্য়। আমাত্তুন হুও ন হুরিনেই পানি পরানে মাঘে, ন মাক্যে গোরি বে’ক বাবদর অধিকার পরানে মাঘে। হয়েক জন সমাচ্যে মিলিনেই আমার ইয়েন নেই, উভোন নেই, আমারে ইয়েন ন দোন, উভোন নদোন হলে আমি বিরেত আন্দোলন গরি ফুরেয়েই মনে গরিই। আ দঝ’ মুজুঙে চাঙমা জাত্তো এবাবদর. চাঙমা জাত্তো ওবাবদর গরি গবি পারিলেধ’ হধাই নেই – সিবেরে আমি জাত ভালেদি হামত্তেই মেডেল দিবেত্তেই ধারাচ গরিই।

বেঘত্তুন বেচ আমক ওহ্বার হধা – আমা গদা জিঙহানিগানত ন দোরেনেই এক্কা ধিবে হুহ্লি অহ্ক হধা হোভাত্তেই হন’ সময় নেই। গদা জিঙহানিগানত ন দোরেবার হন’ সময় নেই আমার। ছাত্র লক্কে আমি দোরেই – নিজো জাদত্তেই হধা হলে লেঘা-পড়া শিগি-সাগাই চাগুরি ন পেভঙ। চাগরি পেলে আমি দোরেই – বেচ বেচ গোল্লে মরে উতারা প্রমোশন ন দিবাক, জু-সুনজুক ন দিবাক, বর বর সরকারি কমিটিত বর বর পোস্ট ন দিবাক আ নলে রুখ্যাঙত বদলি গরি দিবাক (অনেগে দর দেঘান, সাসপেন্ডো গরি পারন) । চাগুরি সেচ গরি পেন্সনত গেলেয়ো আমার দর ন জায় – আমার পেন্সন বন্ধ ওহ্ই পারে বা ম পো-সাবাগুনে চাগুরি ন পে’ই পারন।

গদা পিত্থিমিত পারাপাঙ একমাত্র তিবুরার চাঙমাগুনেই আঘন্নে জারা নিজোত্তেই, নিজো জাদত্তেই হধা হনাগান পাপ মনে গরন, দুচ মনে গরন। পেদর পিঝেদি দুমুরোদে গরিপ্পুনোর জাদর হধা ভাবিবার সময় নেই, ধনিগুনোর জাদর হধা ভাবিবার গরচ নেই। ছাত্রই ন ভাবিবাক, চাগরিবলাই ন ভাবিবাক, গরিবে ন ভাবিবাক, ধনিয়েয়ো ন ভাবিবাক – সালে জাদর হধা ভাবিবো হন্না ?

এই জে আমার জনমভুরি পিত্তোমরা ভাপ, নিজোরে চিগোন মনে গরানা, নিজোরে পরর অধীনত্তল মনে গরানা – ইয়েনর হি হন’ দারু আঘে ? অভিধম্মর বিদর্শনরসান আঘে নেনা হন’ পত, জিয়েনে এ আহ্জার বঝরর পাদারা ঔপনিবেশিক মানসিকতাগানি হাজেনেই আনি দি পারে স্বাধীন মানসিকতা ?

মাদি, আঘস্ত, ২০১১, ন’ বঝর, নাদা-৬৫

চুমুলোঙ তেম্মাঙ

চাঙমা হধাত আঘে, ‘পুনোত ঘু থেনেই, মাধাত পানি ধালানা।’ ইয়েনই গরির আমা তিবুরার চাঙমাগুনে ইক্কুনু। আমার রাচনৈতিক অধিকার দিনোদ্দিন লেজাত লামি যাল্লোই, আমার হধা-লেঘা আহ্জি যাঙ যাঙ – সে কিত্যে আমার আমল নেই। আমি অনসুর চুগি থেই হনে হিঙিরি চুমুলোঙ গরের চেবাত্যেই, আ এক্কা বেতিরিক্কে দেলে তারে ‘চাঙমা সুধোম সুম মারেই দিলো’ হোনেই বিজেরত তুলিবাল্লোত্তে। এমনকি তারে আদামত এক ঘাচ্ছে গরিবারো পুদুপাদা চলে।

দেঘা যোক আমা চাঙমা মেলাত চুমুলোঙান আজলে হি। চাঙমা মেলা-জামেয়েগানি গমে রিনি চেলে আমি তিনান হত্থা দেঘিই -১) জরা বানি দেনা, ২) চুমুলোঙ আ ৩) খানা সিরেনা।

এ তিনান হত্থাত্থুন ‘জরা বানি দেনা’গানরে আমি মেলার আঝল হত্থা ধরি পারিই। হারন, যক্কে ‘জরা বানি দিবার উগুম আঘে না নেই ?’ হনার পরে বেঘে হোই উধোন ‘আঘে আঘে’ সুয়োদই নুও বৌ-জামেয়ে তারার জদন ওয়ে গরি দঝর অনুমোদন পা’ন। চুমুলোঙ আঝলে নুও বৌ-জামেয়োর ভালেত বর মাগিনেই পুজো দেনা। ইক্কুনু হন’ জনে হয়ত মনে গরিবো তার পরমেশ্বরী, কালিয়্যে আ নেনাঙ্যেরে পুজো দিলে তার মুজুঙোর দিনুন গমে হাদিবো আ হন জনে হয়ত মনে গরিবো তার মঙ্গল সূত্র শুনিলে গম অহ্ব’। সিয়েন তারে আমিদ’ বলে বলে বিশ্বেচ গরা বাজেই দি ন’পারিই।

বেঘত্থুন ডাঙর হধা, আমি চাঙমাঘুন শাক্য জাদর মানুচ হোলেই, সে ঈজেবে হন জনে যদি তা জামেয়ে বৌদ্ধ মতে গরে আমি তারে হন’ দিন গর দি দিন’পারিই। তে যদি কালী পূজো গরিনেই মেলা সিরেদ’ সালে হিঝু হধা থেলুন। তবে ইয়েনো ঠিক যে, হন’ জনে যদি ঘেচ্চেকগরি কালী পূজো গরিনেই মেলা গরেধে অহ্য়, সালে চাঙমা সুধোম দিন-রেত চুগি থেয়েগুনে হিচ্ছু হোভাক গরি আমার মনে ন’ অহ্য়। যদি হোধাক, সালে ইক্কুনু যিগুনে হিন্দুগুনো সান মেলা লক্কে নিজোর ঝিরে জাগা-গাড়ী-বাইক-খাট-আলমারী-চেয়ার-টেবিল-সোফা এমনকি রোজেই-বালুচ পজ্জোন্ত দেদন, তারারেয়ো হলাক্কুন। ইগুনেহি চাঙমা সুধোমরে ভারি গরি জোলজোল্যে গরধন ? আ তারারে হি আমা মুরুব্বিগুনে এক ঘাচ্ছে ন’গরন ? যিগুনে বৌদ্ধ ধর্ম মানিনেই মেলা গরধন, তারাধ’ নিজোর ধর্মগানরে অজলত তুলোধন আ যিগুনে ‘পণ প্রথা’ নাঙর ফারাঙীগান আমা জাদর হিয়েত সাজুরাদন তারাধ’ পরেয়ের ফেলেয়ে সেপ ফুদো লিয়েই তুলোধন, তারাহি সিয়েন ভারি দোল গরধন ?

মাদি, মার্চ, ২০১১, ন’ বঝর, নাদা-৬০

ন’চাঙ যেবার এ জাগান ছাড়ি …

ভালক বঝর আগে আমা লেগিয়েগুনে গীত জরেয়োন আ গীতগেয়েগুনে গীত গেয়োন ‘‘ন’চাঙ যেবার এ জাগান ছাড়ি…” – মাত্তর আমি চাঙমাগুনে এ গীদোর ভেদ হনদিন ন’বুঝিলোঙ। নিজোর জাগারে পোচপানা, নিজোর মাদিত্তেই লাড়েই গরানা, নিজোর দেঝত্তেই পরান ধালি দিবার অমক্খর শবৎ খানা আমা চাঙমা পরানত নেই। রুনু খান, মানবেন্দ্র নারায়ন লারমা – ইগুনোর লাড়েই আমা চাঙমা গুত্যেত গমে ন’ভেদেগোই। আমি এক্কা ডর দেগেলে আদাম ছাড়ি যেই, জুদো জাগা এক্কা দোল দেলে পরঙ ওয়োই। পরঙ অহ্দে অহ্দে আমি পিত্থিমির বে’ক জাগাত ইক্কুনু নাদা গুলেক, এমনকি নিজো জাগাদো। ফল – পত্তি জাগাত পরর অধীনত্তল।

হন ইঙরেচ আমলত সেক্কেনর ইঙরেচ সরকারে চাঙমা রাজারে হোয়েধে, ‘চাঙমা রাজা নরপতি, ভুপতি নয়’। মানে চাঙমা রাজা বানা চাঙমাগুনোর রাজা বা মালিক, জাগার রাজা বা মালিক নয়। সিত্তুন ধরি আমার হন’ মাদি নেই, আমি পরর দেঝত থেই পে’র। দেচ ন’থেলে অধিকার হিঙিরি থেব’ ? জাগা ছাড়া হি পঝা লোই পারে ?

আমি ইক্কুনু যে চিগোন চিগোন জাগানি ছিত্রিবঙচগরি ধরি আঘিই সিয়েনিয়ো অনসুর বেজাদিগুনে হারি লোভার তকতোগান। দেচকুলোত, অরুনাচলত, মিজোরামত, তিবুরাত – হুধু নয়। মিজোরামত চাঙমা ডিস্ট্রিক্ট কাউন্সিল হোনেই যিয়েন পেয়েই, সিয়েন দেদেয়ো ৩৮ বঝর আগে আমালে­াই চুবুলি গরা ওয়ে। যেত্তোমান বাম সিএডিসি ভিদিরে ভরেবার হধা এল’ তার বানা চের ভাগর এক ভাক লোনেই সিএডিসি বানানি ওয়ে। তিন ভাগর দি-ভাক চাঙমা রোয় যেয়োন্নোই তার বারেহ্।

ইক্কুনু মিজোরাম সরকারে চাঙমাগুনে যাতে সিএডিসি-বো ডাঙর গরেবার দাবী গরি ন’পারন সেনত্যায় লারে গরি চাঙমাগুনোর মাদিগানি গঝক গরিবার আরকানি গরের। তার এ নুও ভেইলে­া অহ্লদে, চাঙমা বামানি চেই চেই রিজার্ভ ফরেস্ট বানেই দি দি চাঙমা বামানি চিমেই দেনা। একবার রিজার্ভ ফরেস্ট বানেই দিনেই তুলি দি পারিলে, জনমত্তেই জাগাঘান তারা আহ্দত যেবগোই। এমনকি সেনত্যায় তারা লাখ লাখ তেঙা ধালদেয়ো চিদে ন’গত্থন।

হয়েকদিন আগে মামিত জেলার আন্ধারমানেক, রাজীপনগর, শিলসুরি আ নাবা – এ চের আদাম চাঙমারে দাম্পা টাইগার রিজার্ভপান অঝার গরিবোঙ হোনেই ধাবেই দিয়ে ওয়ে। এবারত শুনো যার লুঙলে জেলার সিত্যেপারা, পুনকায় আ মুন্ডো – এ তিনান চাঙমা আদাম ভরেনেই পুনকায় রিজার্ভ ফরেস্ট বানানি অহ্ব’। পত্তি বারর সান এবারদো চাঙমা মুকপাত্তিগুনে বড়গাঙত কাপ্তেই গধা বানধে চাঙমা রাজা ত্রিদীব রায়ে চেই রোয়ে পারা গরি চেই থেবাক। আদাম্মেগুনে যেবার ন’চেলে সরকারে তারারে তারারে হয়েক লাখ তেঙা গুজেই দিবো। সিগুন লোনেই তারা হয়েকদিন মদে-ভাঙে খেবাক। সে পরেধি ….. আঝা গরঙ আর লিঘিবার দরকার নেই। ভেক্কান আমা জাদত বার বার ঘদি যেয়ে পুরোন ঘটনা …. বানা জাগাঘান আ মানুচ্যুন জুদো।

মাদি, ফেব্রুয়ারী, ২০১১, ন’ বঝর, নাদা-৫৯,

এগত্তরর জধা বানেবঙ ফারগর নয়

চাঙমা লেঘাদি তিন মাস্যা সার্টিফিকেট বলাগুনে ‘চাঙমা ভাচ ভালেদি জধা’ নাঙে ইক্কো নুও জধা বানেয়োন। চাঙমা লেঘা জনে জনে শিগোদোক তারার মনঝুক। এর আগে গেল্লে মাহ্জত ‘চাঙমা গাবুচ্যা জধা’ (YCA)-র তিবুরা ধেলা বানানি ওয়ে। শুনো যেয়ে তারা ২০১১-র ভিদিরে গদা তিবুরাত চাঙমা গাবুচ্যা জধার ধেলা বানেবাক। চাঙমা জাদর ভালেত গরানা তারার মনর ধারাচ।

ইন্ধি তিবুরা চাঙমা ছাত্র জধা এতা ভিদিরে মোটামুটি গদা তিবুরার চাঙমা বেচ কলেজচানিত তারার ধেলা বানেই ফুরেয়োন। তারায়ো চাধন জাদর ভালেত গরিভার। সেবাদে আঘন গন্ডাছড়ার সি.এস.সি.ডি.এস. (চাকমা সোসিেেয়া কালচার‌্যাল ডেভেলপমেন্ট সোসাইটি), শান্তির বাজারর সি.এস.সি.ও. (চাকমা সোসিেেয়া কালচার‌্যাল অর্গ্যানাইজেশন), কাঞ্চনপুরর ওয়াই.বি.এস. (ইয়ং বুদ্ধিস্ট সোসাইটি) আ আদামে আদামে নানান চিগোন-ডাঙর জধা, আঘে নুও-পুরোন ক্লাবপানি। বেঘর আহ্ওচ আমা জাদর ভালেত।

বেঘর ধারাচ যদি জাদর ভালেত অহ্য়, সালে আমি এক সমারে হাম গরি পারিবঙনি ? যদি ন পারিই সালে আজলে হি আমি জাদর ভালেত চেই ? আমি যদি বাম ভাক গরিনেই জাগায় জাগায় এগই হাম এক লঘে গরি পাত্তঙ। আদামত যদি দিব্যা জধা থান সালে আমি আদামান দি-ভাক গরিনেই একসঙে হাম গরিলে আর’ বেচ হাম অহ্ব’। এ উজু হধাগান বুঝিলে, মানিলে, তে মানা যায় আমি ঘেচ্চেক গরি জাদর ভালেত চেই।

অনেগে আরক্কান হধা ইয়োত তুলি পারন। হধাগান অহ্লদে – আমি যদি ভেক্কুনে মিলিনেই ইক্কো জধা বানেই পারিই ? হধাগান শুনোদে যেত্তোমান উজু, ঘেচ্চেক গরি গরদে সেত্তোমানই আগাত্যা। ইয়েনর উজু জুওপ অহ্লদে – হন’ জধা যদি ঘেচ্চেকগরি হাম গরদে অহ্য় সালে সিবে লারে লারে ডাঙর অহ্ব’ হামাক্কায়গরি। আ যদি হাম ন গরে সালে সিবে লারেগরি মিলেই যেবগোই। হন জনে যদি হাম ন গচ্যা গরি আঝা গরে তা জধাবোত দুনিয়ের বেক চাঙমাঘুন এগত্তর ওহ্বাক্কি, সালে তার চাঙমাগুনোরে ‘পাল্লাত তুল্যা বেঙ’ ভিলি বন্নাম তাঙেই দেনা বাদে হন’ পথ নেই।

সেনত্যায় নিজো জাত্তোরে বন্নাম ন গরি, অন্য বেক জধাগুনোর সমারে আহ্দে-আহ্ত ধরা-ধচ্যা গরি হাম গরানা। সমার এক জন পেলে এক জন্নোই, দি জন পেলে দি জন্নোই ন জিরেয়ে গরি হাম গরানা। হামে আমারে এগত্তর গরেব’ – হামে আমারে ভালেত আনি দিবো।

মাদি, জানুয়ারী, ২০১১, ন’ বঝর, নাদা-৫৮

এক জাত এক অহ্রক

ইক্কো জাদর দি বা তিন বাবদর অহ্রক কনদিন ওহ্ই ন পারে। ইক্কো জাদর দি/তিন বাবদর ধর্ম অহ্লে হি দুর্গদি অহ্য় সিয়েন এক্কেনা চেরোপালা শিরে পাগেলে আমি গমে মেহ্ত গরি পারিই। আমার হবাল গম যে দৈংনাক্যা-তোঙতোঙ্যা-আনক্যা বেঘে এভ’ আহ্জার ধুচ খেনেয়ো বুদ্ধ ধর্মগান আজা গরি আঘন। পর’ জাদে আমারে ন’ মাদেয়ে গরি আমা দেশ্চান ভাক গরি দিলেয়ো আমা ধর্মঘান ভাক গরি দি নপারন। ইয়েন এভ’ আমার একখান বিরেত বল।

আনক্যাগুনোসান তোঙতোঙ্যা আ দৈংনাক্যাগুনেয়ো এভ’ সঙ চাঙমা লেঘা লারচার গরন। ভারত-বাংলাদেশ-বার্মা, পিত্থিমির যে হন’ হোনাত থেয়ে চাঙমায়, চাঙমা লেঘাগানরে এভ’সঙ নিজর লেঘা মানন। সেনত্যায় আমা ভিদিরে ফারক্কান হমেবাত্যায় ইয়েন আমার একখান দবদবা পধ। আর এই দবদবা পত্থান নাদেই দিবাত্যায় আমাত্থুনোই হয়েকজনে দিন-রেইত মাধার ঘাম ঠেঙত ফেলাদন। আমি যেধক বেচ পধ ফুরেবার চেই সেধক বেচ তারার কালা আহ্ত্তানি লিকলিগেই উধে। মাত্তর বিজক সাক্ষী আঘে, যে জাদর মাজরা যেধক বেচ লুগেই দিবার চেষ্ঠা গরা অহ্য়, সেধক বেচ সে জাদর মানুষ্যুন সোজেই উধোন।

ইয়োত আমি ‘স্যামি’ জাত্তোর হধা ঈদোত তুলি পারিই। ১৭ শতকত নরওয়ে আ সুইডেন সরকারে তারারে ভেক্কুনোরে খ্রীষ্টান বানেবার চেষ্ঠা চালেয়ে আ তারার নিজর ভাষাদি হধা হনা নিষিদ্ধ গরি দ্যা। মাত্তর দমেই পাচ্চে হি ? নরওয়ে, সুইডেন, ফিনল্যান্ড, রাশিয়া – চের/পাচ্চান দেঝত ভাক ওনেয়ো তারা এভ’ সঙ তারা ভাষাগান বুঘোত গরি বাঝেই রাঘেয়োন। সে দেচ্চানির ভালক্কানি মিউনিসিপ্যালিতিত এচ্চে স্যামি ভাষাগান সরকারী ভাষা। তারার ভাষা আ সংস্কৃতি বাজেই রাগেবাত্যায় ১৯৯০-৯১ সনত সে দেচ্চানির সরকারে আইন পাশ গরদে বাধ্য ওয়ে। অথচ স্যামিগুন গদা পিত্থিমিত চাঙমাগুনোর মাত্র ১২ ভাগর ১ ভাক। তারারে চেলে আমি হয়দুনো ধুরোত আঘিই। তে তারা পারিলে আমি হেত্তেই ন পারিবোঙ ?

ইক্কুনু আমি যদি চাবত পড়িনেই নানান দেঝত/রেজ্যত নানান অহ্রক গঝি লোই সালে সিয়েন অহ্ব’ আমা জাদত্তেই নাত দিবার দড়ি আহ্দত তুলি লোভার সঙ। যেক্কে আমার হিচ্চু ন এল’ সেক্কে বৈদ্য/লুরিগুনে আমা চাঙমা লেঘাগান বাজেই রাঘেয়োন। ইক্কুনু পিত্থিমিয়েন যেক্কে আহ্দর মুহ্দোত, সেক্কে আমা বৈজ্ঞানিক/ইঞ্জিনীয়ারুনে আমা চাঙমা লেঘাগানরে সফ্টওয়্যার বানেনেই নুও পরান দুওন। ছাবাদে/লেঘদে আমার আর হন’ জাগুলুক নেই। সালে হেত্তেই আমি এভ’ সঙ আমা লেঘাগান একদুরোত থবঙ ?

মাদি, অক্টোবর, ২০১০, আট্য বঝর, নাদা-৫৫

জাদর দুলো ধরিয়ে গুনোত্তুন সাবধান

দুলো ধরিয়ে – মানে জাল্যার পিঝে পিঝে মাছ লোভাত্তেই যেমন দুলো ধরিয়েই ঘুরোন ঠিক সেধক্যা গরি নিজর সুযোগ-সুবিধে আদায় গরিবেত্তেই হয়েক জন চালাক মানুষ আঘন যিগুনে পরর জাদর নেতার পিঝে পিঝে ঘুরোন সিগুনোরে দুলো ধরিয়ে হুয়ো অহ্য়। তারার চরিত্র অহ্ল’দে তারা সাংঘাতিক মুখ চালাক – মানুষ ভারেই পারন হাক্কেনে, নিজর ধক্কানো বদলি পারন ঝিমিদত আ পরর ঠেঙত মাধা লোঙেয়ে অহ্লেয়ো তারা নিজ’ মানুঝর মাধা খাদে রেক্ষজরেয়ো দিয়েই যান্নোই।

পত্তি জাদত অনসুর অনসুর সুমানেইয়র জনম ন’ অহ্লেয়ো এ বাবদর দুলো ধরিয়ে বেক জাদত যুগে যুগে জনম লন। বিভীষণ, কুইসলিং, মীর জাফর – ইঘুন ওলাক্কে বিজগত বেগে চিনিয়ে হয়েকজন বিরেত বিরেত দুলো ধরিয়ে। ইগুনে পরর জাদর ইধু পুরস্কার পা’ন অনসুর গরি। যেমন নিজর, জাত ভেই, নিজর সদর বড় ভেইয়োর লঘে বেইমানি গরিলেয়ো বিভীষণরে বাঘেনি গরা ওয়ে রামায়ণত।

এ বাবদর দুলো ধরিয়ে আমা জাদদো আঘন। তারা নিজর জাদর চিনত্তেই (মানে ট্রাইবেল ইজেবে) চাগুরি পেলেয়ো নিজর জাত্তোরে পুরি ফেলান্নোই। তারা পরে বুঝিবাত্তেই নিজর বাপ্পোর লঘে বাংলাদি হধা হন। তারার পন্ডিগি হধানি বুঝিবার মত মানুষ তারা নিজর জাদত নেই মনে গরন। সেনত্তেই তারা পরর ভাষাদি লেঘা-লেঘি গরন। নিজর গদির লুভে নিজর জাত-ভেই হাবা খাদে, ধাবা খাদে চোখ খাদি থান। নিজে নাঙ হামেবাত্তেই পরর মাজারাগানি লুগেই দিবার চেষ্ঠা গরন। নিজর তলবিচ-চানোই তারা মনে গরন থুম হধা। এ বাবদর আর’ সয়সাগর গুন তারাত্তুন আঘে। সিয়েনি গনি বুরেই এধ’ নয়। ধর্মধন পন্ডিগে এ যুগোত জনম লধ’ সালেন পারাপাঙ লিঘি পারিলুন – ‘দুলো ধচ্যার বারমাস’।

সে যা ওহ্ক, আঝল হধাগান অহ্লদে আমার তারারে চিনে পরিবো আ তারার বজঙ হামানি ত’ গরিদ্যা পরিবো। পরেয়ে মানুজে চুজিলে দেঘে, খবর পা’ যায়। মাত্তর নিজ’র গা’ চামে যদি লুও চুজে আমি হিঙিরি টের পেভঙ ? সেনত্যায় এ বাবদর মানুচ্চুন জাদর বেঘত্তুন ডাঙর শত্র“। পরেয়ে জাদে ইগুনোরে নল বানেনেই আমারে চুজদন। লগে নল্লোয়ো হিঝু বাদা পা’র। এ বিষ পড়াগুন গম গরি ন পারিলে আমা জাদর হন’ ব্যাধি গম অহ্দ’ নয়, হন’ দারুয়েও ধত্ত নয়।

মাদি, সেপ্টেম্বর, ২০১০, আট্য বঝর, নাদা-৫৪

হমলে গরি জানিবোঙ আমি রাজনীতি ?

সুনানু বিদি যেয়ে এম. এন. লারমা হোয়ে, ‘‘রাজনৈতিক অধিকার ছাড়া হন অধিকার তিগি থেই ন পারে।’’ রাজনৈতিক অধিকার অহ্ল’ সে বলা মাদিঘান যুওত যে হন অধিকার – অর্থনৈতিক, সামাজিক, ধর্মীয় বা ভাষাগত অধিকারর চারা লাগেলে সে অধিকারর ভালেদর ফসল আমি ঘরত তুলি পারিই। আর রাজনৈতিক অধিকার যদি হন জাদর ন থায় সালে হন অধিকারর বিজিই সে জাদর বুঘত গেজেই ন পারন। সেনত্তেই, আমি রাজনীতি গমপেই বা ন পেই, জিগুনে রাজনীতি গরন তারারে হোচপেই বা ন পেই – রাজনীতি আমা জিঙহানিঘান চেরোপালাত্তুন বেরেই থেবই থেব।

এম. এল. এ. ওহ্বাত্তেই রাজনীতি, চাগুরি পেভাত্তেই রাজনীতি – ইয়েনি রাজনীতি নয়, সুবিধেনীতি। দঝর ভালেদত্তেই দঝরে লোনেই হাম গরানাই অহ্লদে আঝল রাজনীতি। আর এ দঝর ভিদিরে নিজরে যেমন গনি পারে, তেমনি ধরি পারে নিজর ঘোরবো আ জাদরে। সেনত্তেই দোল রাজনীদিয়ে দঝর ভালেদর লঘে নিজর, নিজ’ ঘোরবোর আ নিজ জাদরো ভালেদ গরিবো হামাক্কায়।

একখান হধা আঘে, ‘তিবুরার চাঙমাগুনে নিজে রাজনীতি ন গরন, তারারে পরে রাজনীতি গরান্নে।’ হধাগান তোলেই চেলে মিঝে নয়। একজন প্রকৃত রাজনৈতিক কর্মীর হামেধি তার জাদর, বামর জনগনর আহ্ওজর ছাবা ফুদি উধিবো। কিন্তু চাঙমা রাজনৈতিক কর্মীগুনে তারার জাদর মানুষ্যুনোর রাজনৈতিক চেতনা ফুদেই তুলনার মধ্যেদি নিজর সমস্যা নিজে সমাধান গরিবার আন্দোলনত নেতৃত্ব দি ন পারন। তারা হাম গরন নিজ জাদর গনতান্ত্রিক ধাবপানিরে চাবেই থোবার বা জুদো পধেদি নেযেবার এজেন্ট ঈজেবে। তারা নিজর জাদর হধা মু খুলি হধে এমন ডড়ান যে, মানুজে মনে গরিভাক তারা হন খুন বা ডাগেদি গরিভার তেম্মাঙ গরধন। অথচ তারারই আকমোলিগুনোর জিঙহানি তলবিচ গরিলে আমি দেঘিই যে, তারা আন্দোলন গড়েই তুলিবাত্তেই হন’ এক্কান বামত যেনেই সে বামর মানুষ্যুনোর সমস্যা জানিবার চেষ্টা গোচ্চোন্দোয়, পরেধি সে সমস্যাগানি উগুরে ভর গরিনেই গণ আন্দোলন গড়ি তুল্যন। কারণ, গণতন্ত্রত দঝর ধাপ-আহ্ওজই আঝল হধা। যে তন্ত্রয় দঝর ইচ্ছেরে দাম ন দিবো সিয়েন যে কোন তন্ত্রই ওহ্ক, গণতন্ত্র কিন্তু নয়। সেনত্তেই যেধকদিন সঙ চাঙমা রাজনীতি গরিয়েগুনে নিজর বামর, নিজর জাদর মানুষ্যুনোর ধাপ-আহ্ওচ্চানিরে দাম ন দিবাক সেধকদিন সঙ তারার নিজর থিধেবি যেমন দরমর ন অহ্ব’ নিজর জাদরো হন ডাঙরমাক্যা ভালেত ন অহ্ব’।

মাদি, জুন, ২০১০, আট্য বঝর, নাদা-৫১

চাঙমা জাদর আঝল দিভ্যে শত্তুর -ফুল সদক শাক্য

ইক্কো মানুচ বা জাদর দি বাবদর শত্তুর থান – বারর শত্তুর আ ভিদোরর শত্তুর। ওমি জাদর লঘে হোল-হোচ্যে, নাধা জাগা, আমনত্তুন উজুলো জাদ’র থেলা-মেহ্জা – ইয়েনিরে আমি বারর শত্তুর হোই পারিই আ জাদর ভিদোরর শত্তুরুন ওহ্‌লাক্কে – জাদত গম মুকপাত্তি ন থানা, সঙ ন থানা, পাদারা অহ্‌না, ধর্ম-সুধোম ন মানানা, নিজো জাদরে পোচ ন’পানা আ নানাক্কান। এক্কা চিদে গরিলে বুঝি পারা জায় জে আমার বারর শত্তুরোনুত্তুন ভিদোরর শত্তুরুন নাদাধি ভোজোমান ভোজোমান বেচ আ ভিদোরর শত্তুরুন আগে দমেই ন পারিলে আমি হন’ দিন বারর শত্তুরুনো লঘে লারেয়োত জিদিদঙ নয়।

আমা জাদর ভিদোরর জিদুক্কো শত্তুর আঘন সিগুন নিমোন গরি তলেই চেলে আজলে সিগুন ইক্কো গাঝরই ধেলা-পালা আ শিঙোর-পাঙোর ভিলি হিয়েচ অহ্য়। সে এক্কান বেধিই আঝলে আমারে নানান জাগাত নানান ধগে পাগোচ্যেসান গরি বেরেই ধরে আ লারে লারে জাবেদেই ধরি রুধুকমরা আ লেমপোচ্যে বানায়। হি সেই মুল বেধিগান? সিয়েন অহ্‌লদে – আমার চিগোন মন। চিগোন মনর মানুঝে হন’দিন গম মুকপাত্তি ওহ্ই ন পারন, চিগোন মনর মানুচ পাদারা অহ্‌ন, তারাত্তুন ঈঙঝে-পিঝুম বেচ থায় আ তারা হন’দিন সঙ ওহ্ই ন পারন, তারা ধর্ম ন মানন, সুধোম ন মানন, তারা বানা নিজোর হধা ভাবন আ সেনত্তেই তারা জাদরেয়ো পোচ ন’পান।

এ রাচবেধিগানর দারু হি ? সে পইদ্যেনে ইয়োত তেম্মাঙ ন গরিবোঙ। হারন ইয়েনর দারু এগেক জনে এগেক্কান দেঘেই দোন আ তলবিচ গরিলে হার’ জনর হধা ফেলেবার নয়। এ বেধিগানর দারু এক দাগিয়ে সয়সাগর বই ঘাদিনেয় গুথ্যে পাগিলে পেভ’ হ’ন, আরেকদ্গিয়ে গম  গম ইস্কুলোত পেভ’ হ’ন আ একদাগিয়ে হ’ন সিয়েন ভিলে আঘে একমাত্র হিয়োঙর ভান্তেগুনো সিধু। সেনত্তেই দারু তোগানা ত’ গরি থোনেই আমা হামত হ’ন দিয়েন পধেদি সিয়েনে নিজোরে ফগদাঙ গরের আ হিঙিরি সিয়েন আমা ভালেদি হামত পাদারি গাচ ওহ্ই থার সিয়েন ইয়োত আমি বিজিরেই চেভঙ।

(১) লারে লারে অহবঃ এ চিগোন হধাগান ইক্কুনু আমা জাদর ইক্কো বিরেত শত্তুর ইজেবে দেঘা দ্যে। আমি হন’ আগাত্যে হামত আহ্ত বাজেলেই আমা চাঙমা রিবেঙত সমি থেয়ে চিগোন পাদারা মনানে হোই উধে – ‘লারে লারে অহ্ব’। এ লারে লারেগানে আমা হামান আর হন’দিন গরি নদে। আমি একবারো ভাবি ন চেই, এচ্ছে জনি মুই সিয়েন আরম্ভ ন’গরঙ সালে সিয়েন হেল্লে হিঙিরি অহ্ব’ ? সিয়েন হেল্লে শুরু গল্লেদ’ পরশু তে অহ্বদে। পরশু শুরু গরিলে অহ্‌দে অহ্‌দে তরশু। এঝান গরিনেই আমার দিন গঙি জায়, উজু হামান সময়র এজাল পেনেই আগাত্যে ওহ্ই উধে আ সিয়েন আমি হন’দিন উভেই ন পারিই।

আমা বৌদ্ধ নাটকত আমি দেঘিই – শুম্ভ-নিশুম্ভর যুদ্ধ। হন’ হাম গরিবার আগেধি আমা মনত শুম্ভ-নিশুম্ভর লারেই বাঝে। সে লারেয়োত শুম্ভ জিদিলে আমি গম হাম গরিই আ ভান্যে হামানি ন গরিই। মাত্তর নিশুম্ভ জিদিলে আমি গম হামানিত পিচবাগলি হেহ্ই আ ভান্যে হামানি আরম্ভ গরিই। শুম্ভর আহ্ত্যের অঝার ন দরেয়ে মন আ নিশুম্ভর আহ্ত্যের চিগোন পাদারা মন। আমা মনানি অঝার ন অহ্‌নার হারনে আমা মনর ভিদোরর এ লারেয়োত অনসুর নিশুম্ভই জিদে আ মুওত্তুন নিহ্গিলি এঝে – ‘লারে লারে অহ্ব’।

(২) তারা হি ভাবিবাকঃ এ হধাগানে চাঙমা জাত্তোরে জুগে জুগে লেঙ আ বুপ বানেই থোয়ে। ইয়েনে চাঙমা জাত্তোরে খাদাল’ ভিদিরে পত্তিঙগুলোসান গরি বেরেই থোয়ে। আমা সভাত ইক্কো বেজাত থেলেই আমা পিত্তসদ’ মনানে হোই উধে – ‘আমি চাঙমাধি হধা হলে তারা হি ভাবিবাক ?’ আমি আমা জাগা নাঙানি আমা ধগে হোভার চেলেই আমা চিগোন মনানে হোই উধে – ‘তারা ন বুঝিভাক।’ আমি তরা তাঙরি ‘থেগা দুওর’ ন হোনেই ‘ঠেগামুখ’ হোই, ‘হমলানগর’ ন হোনেই ‘চোঙতে’ হোই আ ‘বাঘেইসুরি’ ন হোনেই ‘বাঘাইছড়ি’ হোই। পত্তিবার আমি আমা হধাগান পরর ধগে বদলেই আমা জাদর হিয়েত্তুন ইক্কো চিগোন লো ফুদো ঝরে। ইঙিরি চিগোন চিগোন আহ্জার আহ্জার লো ফুদো ঝরদে ঝরদে আমা জাত্তোর ইক্কু ব্লাড ক্যান্সার ওয়ে। আমার হন’ দাবি হিজেক সারি মাগিবের চেলেই আমা পাদারা পরানানে হোই উধে – ‘আমি ইক্কুনু এ দাবিঘান গোল্লেই তারা আমারে …………।’ আমি আমা মনানরে উত পেঘে শত্তুরো লঘে দুমুরে বুরেই ন এলে ধুল্যেভুয়োত মুর গুজোন পারা গরি বুচ নেজেই – ‘আমি বরঙ তারা লগে থেনেই লারে লারে গরি আমা দাবিগানি পুরেই পেভঙ।’ জিয়েনর মানে আমি দচ, হুরি, তিরিচ, চল্লিচ বঝরে তে গমে বুঝি পারিই – আঝলে সিয়েনর মানে এলধে ‘আমি বরঙ তারা লগে থেনেই লারে গরি তারা লঘে মিঝি জেয়োই।’

‘তারা হি ভাবিবাক হধাগান’ আর’ বেচ দরগরে পারা ওহ্ই উধে এই হারনে জে ইয়েন আমা সিধু বেচ ভাক সময় অঝার মনর ভেচ ধরিনেই ভেদা দেঘি। আমি শাক্য জাত – বৌদ্ধ জাত। তারা সান চিগোন হজরা মনর মানুচ আমি নয়। আমা পাদারাঘান ধাগিবেত্যেই এ অঝার মনর ভেচ ধচ্যে চিগোন মনর নিশুম্ভরে আমি আহ্ওজে পাত্তুরুতুরু জানেই। আমি পুরি ফেলেয়োই নিজোরে পোচপানা মানে পররে দেই ন পারানা নয়। নিজোর আরাঙ ধক্কান ধরি রাগানা চিগোন মনর নয় অঝার মনর চিন।

আমাহ্ মুজুঙোর পত্থানঃ মুজুঙোর দিনুনোত আমি জনি ঘেচ্ছেকগরি চিগোন অহ্‌লেয়ো হন’ জাত ভালেদি হাম গরিদোঙ চে’ই সালে আমার ‘লারে লারে অহ্ব’ আ ‘তারা হি ভাবিবাক’ – এ দিয়েন হধা পুরোপুরি পুরিহ্ ফেলা পরিবগোই। আমি জিয়েন গরিভার চে’ই সিয়েন ইক্কুই আরম্ভ গরা পরিবো। আ আরম্ভ গরিনেই থিয়েই থেলে ন’ অহ্ব’। হুচ্চুন জিত্তুমো চিগোন ওহ্দোক – মুজুঙে আ অনসুর ফেলেই ফেলেই গেলে আমি হামাক্কায় এক দিন না একদিন আমা সাল্যেঙত লুঙিবঙ্গোই। হাম জেত্তোমান ইত্তুক ওহ্ক, অনসুর গরি পারানা অহলদে আঝলান। তবে ইয়েনো থিক, পুও হুরি মত্তন পানি হেই ন পায়। মাত্তর পুও হুরোনায়ো শুরু ন গরিলে পানি হানাদ’ দুরোত, পানিত আঙুলুনো ভিজেই ন’পায়।

আমার ঈদোত রাঘা পরিবো – সাহচ মানে ন দরানা নয়। দরেই দরেই অহলেয়ো গরানাগানরে সাহচ হুও অহ্য়। দরকার জেক্কে দররে দিয়েই জায়, সেক্কে মুজুঙেধি আহ্দি পারানাঘান হঅ্লদে আঝল অঝার মনর চিন।

E-mail: chakmamaadi11@gmail.com

Blog: https://chakmamaadi.wordpress.com/

পিডিএফ ভার্সন Changma Jador Ajhol Dwibe Sattur

ব্রেইন ড্রেইন-ফুল সদক শাক্য

ব্রেইন ড্রেইন ইক্কুনু চাঙমা জাদর এক্কান বিরেত অসম্বিচ্য। ইক্কো জাত নলে এক্কান জাগাত্তুন গম গম মাধাবলা মানুচ্চুন নিহ্গিলি জানাগানরে ব্রেইন ড্রেইন হুও অহ্য়। ব্রেইন ড্রেইন ইক্কো জাদরে অলর গোরি লারে লারে গোরি মাত্তর হামাক্কায় মারেই ফেলায়। ইয়েনরে নিজো জাদরে নিজে মারেই ফেলানায়ো হোই পারা জায়।

চাঙমা জাদর ব্রেইন ড্রেইন হেত্তেই অহ্য়ঃ আমা জাদর ব্রেইন ড্রেইনত্তেই তলর দিয়েন হারনরে আমি বেঘত্তুনবেচ দায়ি ভিলি থারেই পারিই –

(১) আমা জাগানিত জু হম থানাঃ আমা আদামানিত চাগুরি আ জুদো বাবদর জু রাত অহ্নার হারনে আমা মাধাবলা মানুচ্চুন