বিঝুমেলা-২০১১

বঝর পত্তি বিঝু মেলা যদি আমি তিবুরার চাঙমাগুনে ন গত্তঙ সালে পারাপাঙ আমা সুদোমর ভালোক্কানি দোল দোল জিনিচ আহ্জেই ফেলেলঙন। বিঝু মেলাত আমি জানিই ন জানিই নাজিই, পারি ন পারি গিত গে’ই। তুও আমার নাচ-গীত বাজি থোক, বলবলা ওহ্ই উধোক – এ ধারাজে। গদা বঝরবো ক্রিকেট-ফুটবল আ নানাক্কান বেজাদি খারালোই লুদুপুদু গরি থেনেই বঝর’ শেজত এক বার অহ্লেয়ো সিদেন’ হোনা বিজিরেই নিহ্গিলেই আমা ঘিলে-নাদেঙুন। মা-ভোনুনে পিনোন পিনোন-খাদি। চান্দা-ভিক্কে গরি, সিলুমোর জেপ বিজিরেই বিজিরেই অহ্লেয়ো ছাবেদঙ চেই ইক্কো চাঙমা বই। গিত গেয়েগুনেয়ো লাভ-লোকসানর হধা পিঝেদি লুঙিমারি চাঙমা জিঙহানির ধারাচ পুরোন ইক্কো গিদোর সিডি ফগদাঙ গরি। বিঝু দিনোত আমা সিধু হাক্কনত্তেই অহ্লে লতা-কিশোর-কুমার সানু ডাগিত্তুন ডাঙর অহ্য় অভিক কুমারে।

বিঝু মেলার হালে­াংঙো আমি যদি আ এক্কা ডাঙর গরিই সালে বানা নাচ-গিত নয় জুদো দরকারি জিনিচ্চানিয়ো আদিবো অহ্লে! যেমন ইক্কু বিঝুরে মুজুঙে লোনেই গদা পিত্থিমির চাঙমা গুনোর মিলিবার এক্কান জাগা বানেবার হধা চিদে গরা অহ্র। দিল­ী, কোলকাতা আ বিদেঝত থান্নে আমা জাত ভেই-ভোনুনোরো তারা তারা মিলিবার জু বানা বিঝুবো। সেধক্যে বিঝু দিন্নোত যদি তিবুরা, মিজোরাম, অরুনাচল, দেচকুল আ আরাকানর আনক্যা, তোঙতোঙ্যা আ দৈংনাক্যা চাঙমাঘুন এক উদোনত মিলি পারিদোঙ সালে সিয়েনত্তুন পারা দোল আ হিচ্ছু ন থেলুন।

এবারর বিঝু মেলাবো হয়ত বিজগত নাঙ রাগেব’ যদি তার আরেয়ে হামানি গমে সির নেজেই পারে – ১) তিরিচ বঝর পরে যুগোর লগে তাল মিলেনেই এবারর বিঝু মেলাত হয়ত ‘তিবুরা রেজ্য হাবর বিঝু মেলা’ তার ঠায়ঠিক ‘লোগো-ভো পে’ই পারে। ২) রেজ্য হাবর বিঝু মেলা এজেত্তে বঝর হন জাগাত পরিবো সিয়েন আগাম ঘোষনা দি থবার সুদোম হয়ত এ বিঝু মেলাত্তুন ধরি চল ওহ্ই পারে। লগে বানানি ওহ্ই পারে তিবুরা রেজ্য হাবর বিঝু মেলার নানু জধা। যদি পারা যায় সালে আমি হোয় পারিবোঙ তিবুরার বিঝু মেলার তিরিচ বঝরে এক্কা এক্কা লেবাঙ’ ফোর গে’ল সালে !

বিঝু নিজেনিহ্, ২০১১

Advertisements

বিঝুমেলা ২০১২

অরুনাচল, আসাম, মিজোরাম, তিবুরা, দেচহুল – গদা চাঙমা-পিত্থিমিত বে’ক চাঙমাঘুন এক তোলোয়োত বঝিবার এক মাত্র জাগা তিবুরার বিঝুমেলা। আঝা রাঘেই দৈঙনাক্যে-তোনচোঙ্যে-আনোক্যে বুদ্ধিজীবীঘুন বঝরে একবার মিলিবার আরকানিয়ো গরি পারিবোঙ ইয়োত মুজুঙোর দিনুনোত। দেচহুলোর ‘আদিবাসী মেলা’, মিজোরামর ‘সিএডিসি ডে’ আর’ নানান চিগোন-দাঙর জধার বৈ-সা-বি পালনী/বিঝু পালনীদো আঝা গরিই এ পইদ্যেনে এক্কা-উক্কো চিদে গরাহ্ অহ্ব’।

এ বঝর ৩১ পল্লার বিঝুমেলা ফেলা অহ্র। এ বঝরত্তুন ধরিনেই বিঝুমেলাগানরে নুও ধগে সাজেবার আরকানি নেজা অহ্ল’। গদা তিবুরারে অট্ট্যভো বামে ভাক গরিনেই বামে-বামে খারা আ নাচ-গীদর জিদেজিত্যে এ বঝরত্তুন ধরিনেই চালু গরা অহ্ল’। লগে আমার জে জিনিচ্ছানি আহ্জি জাল্লোই সে – উভো গীত, ঝরা গীত, অলি গীত, তান্যাবী গীত, হেঙগরঙ বানা, ধুদুক বানা, শিঙে বানা, পোত্তি খারা, ঘিলে খারা, নাদেঙ খারা, বাদল তাক চানা, ফু তাক চানা – এ বাবদর জিনিচ্ছানি বামানিত্তেই হামাক্কায় গরি দ্যে ওয়ে। হয়েক বঝর পরে এ জিদেজিত্যেগানি চাঙমা সাংস্কৃতিক জগদত নুও তুবোল আনি দিবো ভিলি আমার আন্দাচ।

বিঝুর তিন্নো দিন বেঘর গমে হাদোক, সুঘে হাদোক। মায়ুগাঙ, ধিকনদী, লাঙফের, সাজেক-থেগা-তৈজোঙ, দেরগাঙ-মনুগাঙ-গুমেত, কাজলঙ-মেয়েনি-চেঙেই গাঙর অঝার হলগত বোই জোক হুঝির বরব’। চাঙমা জাদর জয় ওহ্ক।

                                 বালাতুলি মনকঝড়া বেক ফেঝেড়া, মানেই উধো জাগিরে
ফি-বলা, আপদ বলা, দূরত যোক – কই উধে বিঝুপেঘে ডাগিরে।
– জনেশ আয়ন চাকমা।

বিঝু নিজেনিহ্, ২০১২

হেত্তেই বিঝুমেলাঘান সোর গরিভার দরকার

আমি, তিবুরার চাঙমাগুনে গেল্লে ৩০ বঝর ধরি বিঝুমেলা গরির। ৩০ বঝর সময় হেচ্চার হধা নয়। মাত্তর ৩০ বঝরে তিবুরা বিঝুমেলাঘান সানে আ সিক্যেই জেত্তোমান দোল আ পতপত্যে ওহ্ই উধিবার হধা এল’ সেত্তোমান জে ন অহ্য় সিয়েন ভেক্কুনে খাম খেই পেভাক। জে জে উনোগানি আমার তিবুরা রেজ্য হাবর বিঝুমেলাত চোঘত পরে সিয়েনি তোলেই চা’ জোক –

১) নাঙে রেজ্য হাবর বিঝুমেলা অহ্লেয়ো আমি হন’ বঝর হন’ বিঝুমেলারে ঘেচ্ছেক গরি তিবুরার গদা চাঙমাগুনো সিধু লুঙেই দি ন পারিয়োই। জেমন, আগেরে গুমেত বামর তুইচাঙমাত জুদি বিঝুমেলা পরে সালে দেরগাঙর বাঘেইসুরি আদামর হন’ চাঙমার তিবুরাত বিঝুমেলা অহ্র গরি হিয়েত হন’ ব’ ন লাগে।

২) চাঙমা সুধোমর বে’ক ধেলাগুন তিবুরা বিঝুমেলায় লেহ্বেই ন পারে। জেমন, হন’ বিঝুমেলাত আমি ঝরা গীত, উভো গীত, ওলি গীত, ধুদুক বা’না, হেঙগরঙ বা’না বা পত্তি খারার জিদেজিত্যে ওয়ে গরি ন শুনিই। জার ফলে, তিবুরার বিঝুমেলাগানে চাঙমা সুধোমরে আরকানি মজিম বা’ক ধরি উজেই ন নেজেনেই, হনক্কান বিঝুমেলা বানা তার আরকানি গরিয়ে হয়েক জনর গমপানা-নপানা মজিম চাঙমা সুধোমরে ফগদাঙ গরি এঝের।

৩) জেহেতু রেজ্য হাবার বিঝুমেলা, সেনত্যেই সুওত রেজ্যর বেঘত্তুন দোল নব্ভাচ গোচ্ছে জিনিচ্চানি লুহ্ঙিবাল্লোই হধা এল। মাত্তর তিবুরা রেজ্য হাবর বিঝুমেলা হন’ হন’ বিঝুত এমনো দেঘা জেয়ে তার ধক, হন’ থুমোথুমি আদামর কামসিরিত্তুনো অদ্দরম।

৪) তিবুরা বিঝুমেলার কামসিরিগানির অজন আ অক্ত, আরকানি নানুগুনেই আন্দাচ গরি ন পারন, সেক্কে চেয়েগুনে। সেনত্যেই হা নাচ হক্কে, হা গীত হক্কে, রেত হয়ভো সঙ প্রোগ্রাম চলিবো – বে’ক থায় ঈজেবর বারে। জার ফলে অক্তে অক্তে প্রোগ্রামে রেদে ন হুলোই আ ধগে ন অলে সময় কাদেবাত্যেই অনেগরে বলে বলে থেলি থেলি স্টেজত তুলি দ্যে পরেগোই। ইয়েনি বে’ক আমার দি চোঘে দেঘা।

এ বেক পগরাগানি তুনিবেত্যেই রেজ্য হাবর বিঝুমেলা জে মুক্খ্যে হুচ বারেবাত্যেই জার পারাপাঙ হামত লাগিবো। তবে তা পিঝেদি জে খরচ আ জুক্কোলানি লাগিবো সিয়েনি হোত্তোমান জুগুলেই পারা জেব’ সিয়েনোই বেঘত্তুন দাঙর হধা। এবারত বাচ্ছেই আঘিই বিঝুমেলার আরকানি আ রিবেঙ জধার নানুগুনোর তোকতোক্যে আ কাবিলেনি চাঘি চেবাত্তেই।

মাদি, জুন, ২০১১, ন’ বঝর, নাদা-৬৩

হমলে সোর অহ্বঙ আমি ? হমলে সোর অহ্ব’ আমার বিঝুমেলা ?

পত্তি বিঝু মেলাত আমার হিঝু না হিঝু ভুল অহ্য় আ হোয় এযেত্তে বঝর গমে দালে গরিবোঙ। বিঝু হুরে হুরে তে আমার উছ্য উধে বিঝু মেলা গরিভার। সে পরেধি বানেবঙ ইক্কো সংসার পারা কমিটি। বেচভাক মেম্বারেই খবর ন পা’ন তারা বিঝুমেলা কমিটিত আঘন গরি আ খবর পেলেয়ো খবর ন পান কমিটিবোত তার আঝলে হন দায়িত্ব আঘে নেনা। আ একদাঘির কমিটির হাগোচ্চান আহ্দত পরিনেই হবাল চিধে অহ্য় – বঝর বাগেনে তা নাঙান থায়, আ এবারত হি নেই ? সিয়েন হা হরম ? তে ইন্ধি দিনে-রেদে খাদি খাদি মরিবাক বানা হয়েক জন। মাত্তর অক্ত এলে কারবারির রাত নেই। সেক্কে হাত্তুন হন্না দাঙর ফোলেই পারে তার জিদেজিত্যে চলে। বিঝুমেলার আগেধি মেলাঘান হিঙিরি দোলগরি পারা যায় সেনত্যায় বল দিবার হনজন নেই, কিন্তু মেলার পরেধি মেলাঘান হেত্তেই দোল ন অহ্য় সে চর্য্যা গরিয়ে সয়সাগর।

রেজ্যভিত্তিক, বামভিত্তিক, আদাম ভিত্তিক – বে’ক ভিত্তিক বিঝুমেলার আমার এগই আহ্বাল। আঝলে আমিই ঠিক নেই, তে আমার বিঝু মেলা হিঙিরি ঠিক থেব’ ? আর ভাবিলে আনুধোর লাগেদে এই কারনে যে ২৯ বার জঘা চেনেয়ো যার ন অহ্য় তার আঝলে হনদিন অহ্ব’ নেনা।

এবারত তেম্মাঙ চলের ইন্টারন্যাশনাল বিঝু ফেস্টিভ্যাল মানে আন্তর্জাতিক বিঝুমেলা মানে গদা পিত্থিমির চাঙমাগুনোরে লোনেই গদা পিত্থিমির চাঙমাগুনোত্তেই বিঝুমেলার আরকানি গরিভার। মানে যে ঘরর উদোনত লদক-ধদক গরি আহ্দে তে যেব’ অলিম্পিকত দুমুরিবাত্যায়। এবারত আমি তারে হি আহ্দা-আহ্ত্যা যে যিঙিরি পারে বল দিবঙ নাহি বাচ্যেই থেবঙ গদা পিত্তিমি মুজুঙে লাজ ফেলোক ফেলোক গরি, লাজ ফেলেলে তে থাজা গরি জোল গরিবোঙ।

মাদি, মে, ২০১০, আট্য বঝর, নাদা-৫০

বিঝু আমার ধার তাগলান

বিঝুত আমি আহ্জি-রঙ্গে দিন হাদেবঙ। সঙ-সমাজ্যে মিলিবোঙ। দুরোদুরিত যিঘুন থেই নিজ নিজ আদামর ঘরত এভঙ। বাপ-মা, ভেই-বোন্নোই মিলিবোঙ। ইত্য-সহুদুমে মিলিবোঙ। পুরোন বেক চিগোন-চাগোন মন বিজিরা-বিজিরি, বন্নাম গরাহ্-গরিহ্ পুরিহ্ ফেলেনেই নুও জিংহানির বাক আগুলেবার মনঝুক গরিবোঙ।

বিঝুত আমি তবনা গরিবোঙ বেঘর জিংহানি ভরি উধোক তজিম সুঘে। বেঘর সুঘেই নিজর সুঘ। চেরোপালা আগুন বাঝেই দিলে নিজর ঘরানো আগুনে লেহ্বায়। আগুনে নানু ন চিনে। সেনত্তেই বিঝুত আমি বানাহ্ বার দেঘেবাত্যাই জিদেজিত্যা গরি গোরবা-গোরবিরে দামী দামী ‘কোল্ড ড্রিঙ্কস্’ ’ ‘হট ড্রিঙ্কস্’-র বদল নহ্ গজেবঙ। লগে থেব’ আমার পোচপানার নরম আহ্দে বানেয়ে বিনি পিধে, সান্যে পিধেয়ো। বিঝু আমার দানর দিন। সেনত্যেই বেঘ’ আগে পোত্যে মাধান আমি কুরোহ্ আধার দান দেনার মধ্যেদি বিঝু দিন্নো ফাঙ গরিই। সারা দিন আমি দান গরিই – সুওত গুরো-গুরি ন লাগে, জাত-বেজাত ন লাগে। সে দানর ফলানরে গারুহ্ গরিবাত্যাই হিঝু শীলো যে আমার পালা পরিবো এ হধাগান আমি পুরিহ্ ন ফেলেবঙ্গোই।

বিঝুত আমার মনত উধে – পিত্থিমির যে যে হনাত থেদঙ সাত – আমি চাঙমা। জাদর সুধোম-সংস্কৃতিরে পোতপোত্যা গরিভার দিন আমার ইভ্যা। জাগায় জাগায় আমার বিঝু অক্তত বিঝু মেলা, বিঝু পালনী, সাংস্কৃতিক উৎসব – ইয়েনিত আমার নাচ, গীত, হাহ্রা – এ শিঙোরানি দরহ্মরহ্ গরিভার আরকানি নেযেবঙ। চিগোন-ডাঙর জধায় হধাআলাম ফগদাঙ গরি আমার ভাষাগানরে বলবলা গরিবোঙ। বিঝুদিন – মিলিবার দিন। এ দিন্নোত আমি বেঘে মিলি তেম্মাঙ গরিবোঙ – আমাহ্ জাত্তোরে হিঙিরি ধর্ম, শিক্ষে, অর্থনীতি, রাজনীতি – এ বেক হিত্যাধি তজিমপুরো গরিবোঙ।

মাদি, এপ্রিল, ২০১০, আট্য বঝর, নাদা – ৪৯

তিবুরার বিঝুমেলা হন পধে-ফুল সদক শাক্য

Bijhumela LOGO SemiF

আমা তিবুরার চাঙমাগুনোর বেঘত্তুন বেচ বার গরি পারে পারা সম্পত্তিগান অহ্লদে আমার রেজ্য হাবর বিঝুমেলাগান। গদা পিত্তিমির চাঙমাগুনোর একমাত্র বিঝুমেলা ইয়েন। ২০১০ সনত তিবুরা চাঙমা ছাত্র জধার গদা তিবুরার কলেঝর ছাত্রগুন্নোই হজমা গঝিলনা আরম্ভ ওহ্বার আগেধি চের বঝর পর পর অল ইন্ডিয়া চাকমা কালচারেল কনফারেন্সরে বাদ দিলে বিঝুমেলা এল’ এ রেজ্যর চাঙমা গুনোর নাচ-গিত মুচ্চেভার এগাতারা জাগা। তিবুরার চাঙমাগুনোর নুওগরি জাগিবার সলাত্তুনধরি বিসেচগরি ২০০০ সাল সঙ বিঝুমেলা এল’ আমার সাহিত্য-সংস্কৃতি আ বে’ক বাবদর নুও চিন্দে-চেতনা ফগদাঙ গরিভার বেঘত্তুন সোরসোচ্যে নাল। এ বঝর তিবুরার বিঝুমেলা ৪০ বঝরত প’ল (১৯৭৪ সনত মাচমারাত পলিম বিঝুমেলা ওয়ে)। গদা তিবুরার বেঘত্তুন বেচ পুরোনি এ মেলাগানেহ্ আমারে হি দিলো হি নহ্দিলো এক্কেনা তলেই চেভার গরচ আঘে।

সাহিত্য ঃ বানা ইধু নয়, দেচহুলোধো দেঘা জেয়ে বিঝুবোরে মুজুঙে থোনেই আমা চাঙমা সাহিত্যর চিগোন সরাত হয়েক দিনোত্তেই অহ্লেয়ো ঝরঝরানি বারি জায় আবাধাগরি। লেগা থুবেবাত্যেই আহ্দা-আহ্দি, তেঙা-পোঝে তোগা-তোগি, রেত জাগি লেঘা উহ্বোনা – ফুলবিঝু সঙ সাহিত্য হাবিদ্যেঙুনোর নিঝেচ ফেলেবার সরে ন থায়। বিঝুমেলা ফগদাঙ ওহ্বার আগেধি জিঙিরি সিঙিরি আমা বোইভুও বিঝুমেলাত লুঙো পরিবগোই। বিঝুমেলা ন থেয়ে গরি বানা ঘরে ঘরে জার ধগে তে বিঝু পালেদঙ অহ্লেব’ আমি ইয়েনি ন দেলঙন।

সংস্কৃতি ঃ এজাবতসঙ বিঝুমেলাগানেই আমা নাচ-গিদোরে ধরি রাঘেয়ে। তিবুরা চাঙমাগুনে বানেয়ে পলিম নাচ বিঝু নাচ। বিঝুনাজর বলে তিবুরার চাঙমাগুনে ভারদরর আন্দামানত্তুন ধরি সিমলা সঙ এমনকি রাশিয়া সঙ ভঙি এচ্চোন্নোই। ভারদর গাবুচ্যে মিলোনি (যুব উৎসব)-ত চাঙমার বানা এক্কান জিনিচ জাগা পায় – সিয়েন অহ্লদে বিঝু মেলাগান। চাঙমাগুনোর এ জাতীয় নাচ্ছান দাঙর-দিঘোল ওহ্য়ে বিঝুমেলার হরত। সে বাদে তিবুরার বেচভাক ন হোনেই বেক গিত গেয়েগুন হোই পারে বিঝুমেলারে ভর দিনেই উধি এচ্ছোন। বঝরপত্তি নুও নুও গিত জরানা আ সিগুনোত ঘজা বজানা, নুও নুও নাচ বানানায়ো গরা অহ্য় আজলে বিঝুমেলাগানরে ঈদোত রাগেনেই।

চাঙমাগুনোর মধ্যে এগত্তর ঃ জুদো জাদে আমা বিরেত বিরেত তিন/চের পাদার বিঝুমেলার কমিটিগুন দেলে দরান। আমা রেজ্যর বেঘ’ দাঙর দিভ্যে রাচনিতিক জধা-কংগ্রেস আ সিপিএম-র রেজ্য কমিটিগুন আমা বিঝুমেলা জধাগুনো অক্কে হিচ্ছু নয়। এমনো দেঘা জেয়ে, বিঝুমেলা বিদি জেবার একবঝর পরে তে সে মানুচ্য হবর পেয়েধে জে তেয়ো গেল্লে বঝরর বিঝুমেলা কমিটিত এল’। তবে এ ভলকসা আরকানি জধাগুনোর গম সিজেবো অহ্লদে – সিগুন আঝলে বানা কমিটি নয়, তিবুরার গদা মুলুক মুলুক চাঙমাগুনোর সার্ভে রিপোর্ট। ইগুনে আজলে আমা ভিদোরর সদচ্যেগান আ আমার এগত্তরে থেবার ধারাচ্চান ফগদাঙ গরে। আমা বিঝুমেলা কমিটিগুনোত দেরগাঙ, মনুগাঙ, গুমেত, ফেনী, দেন্যো মুলুক, বাঙ্যো মুলুক, লিঘিয়ে, দঝর হাম গরিয়ে, বর অফিসার (তে সমাজর ভালেদর হধা ভাবোক ন ভাবোক), লিগিয়ে, গিত গেয়ে – হাররে বাত দ্যে ন অহ্য়। হয়েক বঝরে তিবুরার বিঝুমেলা কমিটিত অরুনাচল, মিজোরাম, দেচহুল আ আরাকানর চাঙমা মুলুক্কুনোর নাঙো দেভঙ ভিলি আমি আঝা গরির। সে বাদে বিঝুমেলাত সমার বদিবাল্লিত্তে গদা তিবুরাত্তুন দাগা অহ্য় এমনকি সেদামে হুলোদে মিজোরাম, অরুনাচল আ দেচহুলোর জাত ভেয়ুনোরেয়ো বাত্যেনি পাদানি অহ্য়। ইয়েনিয়ে আমা চাঙমা জাদত এগত্তর বারাদে ভজমান এজাল দ্যে ভিলি আমি দায়হাম মারি হোই পারিই।

সরকারর লঘে হুদুম জুরোনি ঃ বঝর সেচ হাজেনেই বিঝুপেক্কো ‘বিঝ’ু ‘বিঝু’ গরি দগরানা আরম্ভ গরিলেই আমার পরানে হোক ন হোক সরকাচ্যে ঘরমুক্যে দুমুরো পরে বিঝুমেলার বলাবল মাগিবেত্যেই। চাঙমা লেঘা দাবি গরিনেই অক্তে অক্তে দেপুতেসন দেনাঘান বাত দিলে আমি চাঙমাঘুন ইক্কো জাত ঈজেবে সরকারর সিধু জেই বজরে এ এক বারই। ইয়োদই আমার জা মাগিবের মাঘিই, মন্ত্রী-তন্ত্রী জারে জারে বাত্যেনি দিবের দিই। আমার আগরির বিদিজেয়ে মুখ্যমন্ত্রী সুনানু নৃপেন চক্রবর্তী ভিলে একবার কাঞ্চনপুর জাদে পধত মাচমারার বিঝুমেলা দেগিনেই ভারি গম পেয়ে আ বিঝুমেলাত্যেই সরকারর বলাবল জাজি দ্যে। সে পরেধি তে বিঝু তাগিনেই সরকারর সুতিয়ো ঘোসনা দ্যে। সে পরেধি তিবুরা সরকারর তক্কিনেই বইমেলা, শিল্পমেলা, বস্ত্রমেলাত্তুন ধরিনেই ইক্কুনুর সরসমেলাসঙ জেদক্কানি মেলা অহ্য় সে ভেক্কানির ধুর ফুরেয়েবো হোই পারিই আমা বিঝুমেলাগানরে। আজলে বিঝুনাচ, বিঝুমেলা আ বিঝুভুও অহ্লদে আমার সরকারর লগে হুদুমোর ইক্কো গোরগোচ্যে নাল।

সেবাদে লোরবো-মিদুঙি জলতুঙি বানানা, ভবচক্র বানানা, বুনো-হাদা, সাহিত্য আ চাঙমা জাদর হাবিলেনি সাজেই-দেঘানা-এ নুও বাবদর চিদেগানি ফগদাঙ গরিভের জু পেয়েই আমি বিঝুমেলার এগেমে। সেনত্যেই বিঝুমেলাগান তিবুরার চাঙমা জাদর উজোনি জেবার এক্কান গঙবলা ন’ এল’ হলে আমি সবায় গালত ন পরিবোঙ।

বিঝুমেলাগানরে সোর গরিভার আরকানি ঃ ইরুক হালর তম্ভাবোই নুও ধগে বিঝুমেলাগানরে সোর গরিভার বাক আরেয়োন। ২০১১ সনর পেজাত্তলর বিঝুমেলাত পলিম বারত্তেই দাঙ্গু সুজয় চাঙমা আ দাঙ্গু কুসুম কান্তি চাঙমার আরকানিত তিবুরার রেজ্য হাবর বিঝুমেলার ইক্কো লোগো বানানি ওয়ে। সে বঝরদই পলিম বারত্তেই এক বঝর আগে সে পর’ বঝরর বিঝুমেলার জাগা ফগদাঙ গরি পারা জেয়ে। সিত্তুন ধরি পত্তি বিঝুমেলার গোচ্যেপোচ্যে দিন তা উল্লো বঝর বিঝুমেলা হুধু পরিবো সিয়েন ফগদাঙ গরা অহ্র। ২০১১ সনর বিঝুমেলার পর পরই বানানি ওয়ে এমএলএ সুনানু অরুন কুমার চাঙমারে সভানানু, সুজয় চাঙমারে হাবিদ্যেঙ আ তন্ময় চাঙমারে ভান্দালি গরিনেই বানানি ওয়ে তিবুরা রেজ্য হাবর বিঝুমেলা রিবেঙ জধা। জিবে ইক্কুনু বিঝুমেলা হুধু পরিবো, বিঝুমেলা হন পধে জেব’ আ বিঝুমেলারে দোলত্তুন দোল গরিবাত্যেই আরকানি জধাগুনোরে সল্লা দিবের হামানি গরি এঝের। বিঝুমেলা রিবেঙ জধায় ২০১২ সনর মাধপ মাচতর আদাম বিজুমেলাত্তুন ধরিনেই গদা চাঙমা বামানি ৮-ভুও বামে ভাক গরিনেই নাচ-গিত-খারার জিদেজিত্যে গরিভার মনঝুক গরা ওয়ে আ পত্তি বামত্যেই উভো গিত, ঝরা গিত, ওলি গিত, তান্যেবি গিত, নুও জোরেয়ে গিত, সুধোম মাক্যে নাচ, নুও বানেয়ে নাচ, ধুদুক বানা, হেহ্ঙগরঙ বানা, বাঝি বানা, সিঙে বানা, পোত্তি হাহ্রা, নাদেঙ হাহ্রা, ঘিলে হাহ্রা, বাদল তাকচানা, ফু তাক চানা – এ পত্তানিত হামাক্কায় ভাকলুও পরিবো ভিলি বান ভিরি দ্যে ওয়ে। সে বাদে ২০১২ সনত বিঝুমেলা রিবেঙ জধা আ আরকানি জধায় এক্কান চাঙমা বাবতা গঝি লোয়োন জিয়েন সে পরেধি তিবুরা চাঙমা ছাত্র জধায়ো চাঙমা বাবতা ইজেবে মানি লোয়ে। ইক্কুনু সিয়েন গদা তিবুরাত চাঙমা বাবতা ইজেবে মানি লধন আ মিজোরামদো সিয়েন গঝি লোভার তেম্মাঙ চলের।

আমার হি গরানা এভ’ সঙ বাগি রোয়ে ঃ তিবুরার বেঘত্তুন পুরোনি আ চাঙমাগুনোর বেঘত্তুন দাঙর আহ্ত্যেরানত এভ’ সঙ সয়সাগর উনো রোই জেয়েগোই। তলে হয়েক্কান নব্ভাচ গোচ্যে উনো আ সিয়েনি আমি হিঙিরি তুনি পারিবোঙ সে পইদেনে তলবিচ তুলি ধরা অহ্ল’ঃ

(১) তিবুরার বিঝুমেলাঘান নাঙে রেজ্য হাবর অহ্লেয়ো হামে রেজ্য হাবর নয় ঃ তিবুরার রেজ্য হাবর বিঝুমেলাঘানত গদা তিবুরাত্তুন বে’ই বে’ই আ অক্তে অক্তে দেচকুল, মিজোরাম আ অরুনাচলত্তুনো নাজিয়ে-গিতগেয়ে দলি দাগানা অহ্লেয়ো বেচভাক চাঙমা বামত্তুন বিঝুমেলাত এনেই সমার বদি ন পাত্তাক্কি। এক হিত্যেধি হন’ হন’ আদামত্তুন তিন-চেরভো দলি বিঝুমেলাত নাজিবের-গিতগেবার জু পেধাক আ ওহ্বোলাদি হন’ হন’ আদামত্তুন এক জনেয়ো জু ন পেদাক। তেঙা-পোঝের পইদেনেয়ো সেজান-জে বামত পরিবো সে বামর মানুচ্চুনো মাধা উগুরেধি বরব’ বোই জেদ’ আ বাগি হলগ’ মাদিয়ানিয়ে থানো ন পেদ’। তেঙা-পোঝে আ নাচ-গিদেধি গদা তিবুরার চাঙমা বামানির সঙ সঙ ভাক জুরোনা হামাক্কায় গরিবেত্যেই ২০১২ সনত্তুন ধরি বিঝুমেলা রিবেঙ জধায় বাক আরেয়ে। আগেরে দেরগাঙ, এহ্দে দেরগাঙ, আগেরে মনুগাঙ, এহ্দে মনুগাঙ, আগেরে গুমেত, এহ্দে গুমেত, ফেনিগাঙ আ তাউন – গদা তিবুরার চাঙমা চাগালানি এ আত্তোভো (এ বঝর ‘মুহুরি গাঙ’ নাঙ দিনেই ইক্কো নুও বাম বানেবার তেম্মাঙ চলের) বামে ভাক গরিনেই পত্তি বামত্তুন সঙ সঙ সাংস্কৃতিক পদত্তেই সঙ সঙ হাবিল ভাক লোবাল্লি জু গরিধে ওয়ে। সেবাদে বামানিরে হোজোলি গরা ওয়ে দলিঘুন বানাদে পত্তি আদামত্তুন হমেধি একজন অহ্লেয়ো জাতে হাবিল ফাগত ভরানি অহ্য়। সে বঝরত্তুন ধরিনেই হরচ-বিরোচ্চুনো পত্তি ভামে সঙ সঙ গরি ভাক গরিবার মনঝুক গরা ওয়ে।

(২) নব্ভাচ গোচ্যে দোল জিনিচ্চানি বিঝুমেলাত উধি ন এজানা ঃ নাঙে রেজ্য হাবর বিঝুমেলা অহ্লেয়ো আমা বিঝুমেলাগানে অক্তে অক্তে আদাম’ হাবর বিঝুমেলাসান হাচ্যেক আ ধক দেঘায়। আমা তিবুরার চাঙমাগুনোর দোলত্তুন দোল বার গরি পারে পারা জিনিচ্চানি ইয়োত থুবেবাল্লিত্তেই আদাম ভিত্তিক জুক দেনা বাত দিনেই বাম ভিত্তিক জুক দেনা আ তারার ভিদিরে জিদেজিত্যে চালেবার আরহানি নেজা ওয়ে। পত্তিবামত্তুন নব্ভাচ গোচ্যে হাবিলে হাবিলে জিদেজিত্যে গরিভার জু গরি দেনায় এবারত তুগুনো হাবর জিনিচ্চানি নিহ্গিলি এভ’ ভিলি হিয়েচ গরা জায়।

(৩) বিঝুমেলার অক্ত-সাঙু ধেমাতালা অহ্না ঃ আগেধি রিনি চেয়েগুনোর হধাদ’ বাত, নিজে আরহানি জধার নানুগুনেই উদো ন পেধাক হন দিন্নোত হন হন আদামত্তুন হয়েন নাচ নাজিবেক্কি, হন হন হাবিলুনে হোয়ভোদরে গিত গেভাক্কি আ সেবাদে আর’ হি হি সে দিন্নোর অক্ত-সাঙু তালিগোত থেব’। অক্তে অক্তে হাবিলর রাধে রেত সম্ভাক ন অহ্দ’দ’ অক্তে অক্তে বে’ক হাবিলুনোরে জু গরি দি ন পারানায় রাক জলি-জালায় জেদাক্কোই। অক্তে অক্তে এমনো দেঘা জেয়ে রেত জেধক বারের সেধক বেচ ওঘির পিঝেদি জেনেই আমি এক্কান নাচ দিবোঙ, মুই ইক্কো গিত গেম্মোই হোনেই পচ্চনি-নানুদাঘির গুত্যে উম উম গরি দোন্নোই। আরেকদাগিয়ে আমা সিয়েন আক্কে দ্যো, ওমুক দাঘি সিয়েন হক্কে দ্যে অহ্ব’, তারা সিয়েন হেত্যেই এভ’সঙ দ্যে ন অহ্ল গরিনেই উম উম গুত্যেঘান ভগলক ভগলক উদুরেই দিবাল্লোই উনোনেই জায়-জুক্কোল গরন্নোই। এ ভেক্কানি সোর গরিবার চেলেহ্ হামাক্কায় আমার বিঝুমেলা রিবেঙ জধায় জে জে আরকানিগানি নেজার সিয়েনি দর’মর’ গরি বলাবত গরধে বলাবল দিবার গরচ আঘে।

(৪) তেঙা-পোঝের জাগুলুক ঃ বিঝুমেলা জনম লোভার দচ বঝর পরত্তুন ধরি, মানে ১৯৮৪ সালত্তুন ধরি তিবুরা সরকারে বিঝুমেলাত তেঙা-পোঝে বলাবল দ্যে ধচ্যে। মাত্তর সে বলাবলর অজন এতই হম জে দ’ সোচ্যে ঘরত একধ’ চোল রানে পারা, পোয়োত ন’ পত্তে ভাতপিলে চরত বাজেগোই। আ সিগুনো এক্কা জনি অক্ত মজিম পা’ জেদ’ তুও সারিলুন। এমনো দেঘা জেয়ে বিঝুমেলার বিলোর তেঙা পাধে পাধে তা উল্লো বঝরর বিঝুমেলা লুহ্ঙেগি। সেনত্যেই জে বামত এক্কা ঝল্লমল্ল মানুচ ঝাগাঝাগা আ নলে মানুচ্চুন এক্কা মুহ্ত ভিচ্ছে ওহ্বাক সে বামানিত বিঝুমেলা গত্তে আরকানিনানুদাঘির চান্দা তুলোধে তুলোধে থেঙত ফজা উধি জায়োই। এ বেসুনজুক্কান হাদেই উদিবেত্যেই ইক্কুনু পত্তি বামে বামে হহ্রচ্চুন ভাক গরানা আ জেধক বেচ পারে নিজেনিভুওত এড থুবেবার আরহানি নেজা অহ্র। এ দ’পল্লা ধিবেবো গমে হাম গোচ্ছে ২০১২ সনর মাধপ মাচতর আদাম বিঝুমেলাভুওত।

(৫) নিজোর আরাঙ সুধোমনি জেদা রাঘেবার বলাবল দি নপারানা ঃ আমা নাচ-গিদ ইক্কুনু আমা আরাঙ নাচ-গিদোত্তুন ভজমান পাজারা-ফারি জেয়েগোই। নাজর ধক্কানি দেলে আ গিত্তুনোর ঘজাগুন সুনিলে অক্তে অক্তে জেন সিগুনোরে চাঙমা জাদর সাদাঙা পুও-সাবা ভিলি মনে অহ্য়। ধুদুক, বাঝি. সিঙে, হেহ্ঙগরঙ বানা আমা জধা নাঙানিত তেঙেরা ঘিরে জেয়ে আ আরাঙ হাহ্রানি দিন দিন আগাসুচ্ছো ওহ্ই জাল্লোই। আমি বাদল হিহ্জি হোই পারিই বিঝুমেলা আমার এ বানিমরা সয়-সম্পত্তিগানি দোকদোক্যে গরিভার হন’ জু গরি দি ন পারে। সেনত্তেই ইক্কুনু চাঙমা জাদর পুরোনি তেবন্যেতপোচ্যে আরাঙ সম্পত্তিগানি লঝা বানেবাত্যেই আ সিয়েনির লঘে আমা নুও বানেয়ে নাচ-গিত্তুনোর রেগা দিবেত্তেই উভো গিত, ঝরা গিত, ওলি গিত, তান্যেবি গিত, নুও জোরেয়ে গিত, সুধোম মাক্যে নাচ, নুও বানেয়ে নাচ, ধুদুক বানা, হেহ্ঙগরঙ বানা, বাঝি বানা, সিঙে বানা, পোত্তি হাহ্রা, নাদেঙ হাহ্রা, ঘিলে হাহ্রা, বাদল তাকচানা আ ফু তাক চানার জিদেজিত্যে বিঝুমেলাত গরিভার বাক আরা ওয়ে।

(৬) বিঝুমেলার আজু-নানু ন থানা ঃ বিঝুমেলাগাররে আমি বেঘে পোচপেই আ বেঘে চে’ই সিয়েন দিনে দিনে জোলজোল্যেত্তুন জোলপোল্যে ওহ্ই উধোক। মাত্তর ফারক ফারক এ উজোনি চিদেগানি এগত্তর গরিভার আ সিয়েনিরে হামত বদলেবাত্তেই আমার হন’ সিঙোবা ন এল’। সেনত্তেই ইক্কুনু বানানি ওয়ে তিবুরা রেজ্য হাবর বিঝুমেলা রিবেঙ জধা। রিবেঙ জধা ইক্কু নুও দমগে বিঝুমেলাগানর হরঙা-হাবিবার ধুর ফুরোর। রিবেঙ জধা ইক্কু চিদে গরের বিঝুমেলাঘান হন পধে গেলে চাঙমা চাদর ভালেদি হামর এক্কান চিমচিম্যে ধার তাগল ওহ্ই উধিবো। সুওত আমি হিঙিরি আনক্যে-দৈনাক্যে-তোঙচোঙ্যে, অরুনাচল্যে-মিজোরাম্যে-তিবুরা হুল্যে-দেচহুল্যে-আরাকান্যে চাঙমা এক তোলোয়োত বঝি জাদর নুও বেল তুলিবোঙ সে চিদে গরের। হন বঝর বিঝুমেলা হন বামত পরিবো সিয়েন আগেত্তুন ধরি তেম্মাঙ গরানা আ সিয়েন হিঙিরি গমে সির জেব’ সে পইদেনে আরকানি জধারে বলাবল দেনা হামান রিবেঙ জধায় ২০১১ সনত তার জনমত্তুন ধরি নিমোনগরি গরিহ্ জার। এ রিবেঙ জধাবোর ইক্কুনু বেগ’ উজুলো তুচ্ছেগান অহ্লদে তার তেঙা-পোঝের রাত। ইয়েন হাদেই উদিবেত্যেই আমার মনে অহ্য় বিঝু নিজেনিহ্ভুও রিবেঙ জধায় নিজো আহ্দত রাগেভার গরচ আঘে। রিবেঙ জধা আ আরহানি জধার ভিদিরে ফিবিলি ফিক্যে অহ্নাআনো অক্তে অক্তে বাঝুক-বাঝাক ওহ্ই উধে। ইয়েনত্তেই মাধপ মাচতর আদাম বিঝুমেলাত রিবেঙ জধার বে’ক মনঝুক্কানি গমে ধুজেই পারা ন জায়। রিবেঙ জধাবোরে আর’ বলবলা গরিবেত্যেই রিবেঙ জধার চাবাঙিগুন আর’ তোকতোক্যে ওহ্বার আ রিবেঙ জধা আহ্দত হিঝু মা লক্খিমার বল থুবেবার হামাক্কায় দরকার।

(৭) বিঝুমেলাঘান অজনমাক্যে দাঙর ন অহ্না ঃ তিবুরার বিঝুমেলাঘান গদা পিত্তিমির চাঙমাগুনোর এগাতারা বিঝুমেলা। দেচহুলোত বিঝু আক্কে আদিবাসী সাংস্কৃতিক উৎসব আ মিজোরামর চাকমা অটোনমাস ডিস্ট্রিক্ট কাউন্সিলর বিঝুর পরে (২৯ এপ্রিল) সিএদিসি দিন পালোনি চাঙমা জাদর সবুল নানুগিরিত ন অহ্য়। সেবাদে সিয়েনি এভ’সঙ নিজো নিজো ময়ালদই ধুজিবান্যে আঘে এভ’সঙ। একমাত্র তিবুরার বিঝুমেলাঘান হধ’গেলে বঝরপত্তি মিজোরাম আ দেচহুলোত্তুন গরবা-হাবিল থুবেবাল্লির এজালে ইক্কুনু ইয়েনরে ইন্টারন্যাশনাল বিঝুমেলা হলে হোই পারা জায়। মাত্তর চাঙমা জাদর একমাত্র এ বিঝুমেলাগানরে জদেপদে ইন্টারনেশন্যাল বানেবার চেলে আমাত্তুন আর’ সয়সাগর আরা হারা পরিবো। অরুনাচল, মিজোরাম, দেচহুল আ আরাকানত্তুন আনক্যে, তোঙচোঙ্যে আ দৈংনাক্যে চাঙমা বঝরপত্তি লাঙেলথিগে ইয়োত সমার বদন্নি পারা তার আরি বানা পরিবো। বানা নাচ-গিদোর হাবিল নয়, বিঝুর তিন্নোদিন রঙে-ধঙে হাদেবার সমারে সমারে আমা বিদিজেয়ে বঝরভুও তলবিচ গরিবেত্যেই আ মুজুঙোর দিনুনোত হন পধে আহ্দিবোঙ সে তেম্মাঙ গরিবেত্যেই পত্তি ময়ালত্তুন চাঙমা জাদর মুলুক মুলুক্কুনোরেয়ো বাত্যেনি দিলে গম অহ্য়। সালে আমা পত্তি বঝরর বিঝুমেলাগানি এক-এক্কান ওয়ার্ল্ড চাকমা কনফারেন্স ওহ্ই উধিবো জিয়েন এজেত্তের দিনুনোত চাঙমা জাত্তোরে এগত্তর গরধে ভজমান বলাবল দিবো।

বেগ’ জেরে আমার এক্কান হধা অনসুর ঈদোত রাঘা পরিবো সিয়েন অহ্লদে আমি বিজুমেলা সোর গরিই, আমা নাচ-গিত সোর গরিই – জিয়েন গত্তঙ সাত আমা আরাঙ ধক্কান জাতে সুওত লেবেদেই থায়। আমার ভেত পা’ পরিবো জে আরাঙ ধক বদলি ভালেত অহ্নাগানরে লুগেই জানা হুও অহ্য়। সেনত্যেই সে ভালেত হন’ ভালেত নয় জিয়েনে আমার আরাঙ ধক্কান মাজারা লুগেই জায়োই। সেভিলি আমি নুও চিদেগানিরে গধা বানিহ্ রাগেলে ন’ অহ্ব’। নুও চিদের পিবির পিবির আহ্বা এবাত্যেই আমি হামাক্কায় আমা ফুগুদি হানাঘুন হুহ্লি রাগেবঙ মাত্তর ঘরর বেরচাগানিহ্ জে’ন দর’মর’ থায় সিয়েন চোক দ্যে পরিবো। আঝা গরা জায় আমা ভিদোরত্তুন হন’ জনে আমা আরাঙ ধগর বেরচাগানির বান সচ গরি ন দিলে জেধক বরব’ বেধ’ সাত সিয়েনি উরেই নি পারিদো নয়।

Chakmamaadi11@ymail.com
https://chakmamaadi.wordpress.com/
http://www.facebook.com/maadi.chakma

PDF version of the article Tiburar Bizumela Hon Podhe

Guidelines for Bizumela Development Society

BDS guideline01 copy

Tripura Bizumela started its journey in 1973. After 37 years in 2011, Bizumela evolved as an organisation from an event in the way of formation of Tripura State Level Bizumela Standing Committee. In 2013, the Standing Committee transformed itself into Bizumela Development Society (Bizumela Bhaledi Jodha) and presently trying to transform the Bizumela in to a Cultural Revolution through participation of mass people in preservation and development of our cultural heritage.

Here is the short guideline of the Bizumela Development Society…BDS Guidelines

RESULTS OF BZUMELA COMPETITION-2014

Bizumela-1441st Tripura State Bizumela was held from 13th April to 15th April, 2014 at Jharjari, Ehde Gumet, Tibura. After 3 days competition in 15 cultural and 6 sports events, Ehde Dergang Baam was adjudged as Champion Baam-2014. Agere Manu and Ehde Manu Baam stood as 2nd & 3rd respectively. Here is the details…Bizu Competition Results-2014

BIZU NIJENHI-2014

BN-14 cover

Bizu Nijenhi-2014 published by Bizu Development Society on the occasion of celebration of 41st Tripura State Bizu Festival-2014 at Jharjari, Ehde Gumet, Tibura.

Cover by Prgyan Chakma.

Ubho Geet by Chitra Mallika Chakma.

Jhora Geet by Hottali Chakma.

Banha by Mon Kumar Chakma & Mangalapati Chakma.

Essay on Traditional Games by Sukbilash Chakma & Jyotirmoy Chakma.

Brief Life Histories of some of our heroes by Niranjan Chakma, Kusum Kanti Chakma & Shanti Bikash Chakma.

Poems by Shankar, Chakma Asim Roy, Janesh Ayon, Pankaj, Suniti Ranjan, Malabika, Ananda Mohan, Surath, Dharani Ranjan, Nanda Mohan, Nandalal, Kaliprasad, Merin, Dhanurdhar, Ijack, Kusum Kanti, Amar, Prasen, Sushmita, Prisati, Udyog, Rangochyeda, Monmoth, Mahim, Pragati, Brishasen, Jusmi, Swarna Jyoti, Bhabantu Bikash, Amaresh, Samaresh, Asish & Tapas Kumar.

Short Stories by Niranjan Chakma, Changma Ajit Kanti Dhamei, Fodangtang Changma & Potpotye Changma.

Critical Essays by Alok Talukdar, Pradhir Talukdar, Shanti Bikash Chakma, Mangal Kumar Chakma & Swarna Kamal Chakma.

History of Bizumela by Niranjan Chakma, Kusum Kanti Chakma & Sujoy Chakma.

Complete Book: The Chakmas: An Introduction by L. B. Chakma.

Please click to download Bizunijheni-2014

BIJHU NIJENHI-2012

POEMS by Janesh Ayon Chakma, Chakma Ashim Roy, Jogamaya Chakma, Debottam Khisa, Arun Chakma, Pathan Chakma, Pragati Chakma, Sabina Chakma, Tandra Chakma, Mon Kumar Chakma, Nipom Chakma, Malabika Chakma, Mohini Mohan Chakma, Phul Sadak Chakma & Anil Sarkar.

CRITICAL ESSAYS by Swarna Kamal Chakma, L. B. Chakma, Tejang Chakma, Chakma Ashim Roy, Pradhir Talukdar, B. B. Chakma, Paritosh Chakma, Ratikanta Tanchangya, Kabita Chakma, Ven. Dhammapiya, Mrittika Chakma, MCDF, Dhir Kumar Chakma & Jyotirmoy Chakma.

SHORT STORIES by Ajit Kanti Dhamei & Bijoy Bahan Chakma.

SHORT PLAY by Kusum Kanti Chakma.

ESSAYS by Bhabantu Bikash Chakma, Dr. Rupak Chakma & Shubha Padma Chakma.

Click here to download : Bijhu Nijenhi 2012